Deuteronomio 21 - DIOSPA QHELQACHISQ

Wañusqa runa rikhurejtin imatachus ruwana

¹ Tata Diosniykichej jallp'ata qosunkichej chaypi, ichapis uj runa wañusqa rikhurinman, manataj pichus wañuchisqan yachakunmanchu chayqa,

² kurajkunawan, chantá juezkunawan ima rispa, chay ayamantapacha qayllapi llajtakama mashkha karuchus kasqanta qhawanqanku.

³ Chantá chay aswan qayllapi kaj llajtaj kurajninkuna manaraj yugoman watana uj malta wakata apamonqanku.

⁴ Chantataj kurajkuna chay malta wakata, mana jayk'aj tarpuna, chantá nitaj jayk'aj ch'akej wayq'oman apanqanku. Chaypitaj chay malta wakaj kunkanta q'ewenqanku.

⁵ Chaymantataj Leví jatun ayllumanta sacerdotekuna qayllaykonqanku, imaraykuchus Tata Diosqa paykunata ajllarqa imachus ruwanata ruwanankupaj, chantá sutinpi runakunata saminchanankupaj ima. Chantapis paykunapuni quejanaku, chayrí ch'ajwachinaku kajtin, maychus kajta allinchanankupaj kashanku.

⁶ Chantá wañusqa runamanta aswan qayllapi kaj llajtamanta kurajkunaqa kunkan q'ewisqa wakaj patanpi yakuwan makinkuta mayllakonqanku.

⁷ Chantá ajinata nenqanku: Chay runata mana noqaykuchu wañucherqayku, nitaj imaynatachus wañuchisqankuta rikorqaykuchu.

⁸ Tata Dios, preciota pagaspa Egiptomanta kacharichisqayki israelita wawaykikunata qhespichiwayku ari. Mana juchayoj runa wañusqanmanta ama juchachawaykuchu, nispa. Ajinata ruwasqankurayku chay runa wañusqanmanta mana juchachasqachu kanqanku.

⁹ Qankunaqa Tata Diospa ñawpaqenpi cheqan kajta ruwaspa, chay runa wañusqanmanta mana juchachasqachu kankichej.

Maqanakupi jap'isqa warmikunawan imatachus ruwana

¹⁰ Maypachachus awqaykichejwan maqanakoj rejtiykichej, Tata Diosniykichejtaj atipayta yanapasojtiykichej, chaypacha ichapis chay llajtayojkunamanta wakinta jap'iwajchej.

¹¹ Sichus chay jap'isqaykichej ukhumanta pipis uj k'achita warmiwan sonqonta suwachikuspa, warminpaj oqharikunman chayqa,

¹² chay warmita wasinman pusachun. Chantá chay warmeqa chujchanta ruthukuchun, silluntataj k'utukuchun.

¹³ Chaymantaqa jap'ishajtiykichej churakusharqa, chay p'achata lluch'ukuspa, wajta churakonqa. Chay qharej wasinpitaj tiyakaponqa. Chaypitaj tatanmanta, chantá mamanmanta ima uj killa junt'ata waqanqa. Chaymantaraj chay qhareqa chay warmiwan puñuykonqa. Chantá pay qosan kanqa, paytaj warmin kanqa.

¹⁴ Sichus qhepanejman qhari chay warmita manaña munakuspa t'aqakunman chayqa, payta kacharipunan tiyan. Manapuni vendeyta atinchu nitaj wata runanta jina jap'iyta atinchu, imaraykuchus chay warmin mana munashajtin, casaraspa honranta t'akarqa.

Kuraj kaj churej jap'inan

¹⁵ Ichapis uj runa iskay warmiyoj kaspa, ujninta munakunman, ujnintataj mana munakunmanchu, jinapis iskayninpi wawayoj kanman chayqa, jinataj sichus kuraj kaj churin mana munakusqan warminpi kanman chayqa,

¹⁶ mayk'ajchus tiyapuyninta wawankunaman qopunan chayamunman chaypacha, kuraj kajpa jap'inan chayaqetaqa munasqa warmej churinman mana qoyta atenqachu. Ajinatachus ruwanman chayqa, mana munasqa warminpi kuraj kaj churinpa contranpi ruwanqa.

¹⁷ Chejnisqa warmej churintapuni kuraj kaj churinpaj qhawanan tiyan, tukuy kapuyninmantataj payman iskay jinatawan qonan tiyan. Chay churenqa ñawpaj kaj yumasqan kasqanrayku, kuraj kaj chayaqeta jap'inan kashan, chaytapuni jap'inan tiyan.

Mana kasukoj churikunawan imatachus ruwana

¹⁸ Ichapis uj runaj churin mana uyarikuyta, nitaj kasukuyta munaj kanman chayqa, tatan maman k'amishajtinkupis manapuni uyarikuyta munaj kanman chayqa,

¹⁹ tatan maman llajtapi kaj kurajkunaman payta pusanqanku.

²⁰ Chantá kurajkunaman nenqanku: Wawaykoqa ancha k'ullu, mana kasuwaykuchu, nitaj k'amisqaykutapis uyarikunchu. Chantapis oqospalla, machaspallataj purin, nispa.

²¹ Chantá chay llajtapi tiyakojkuna rumiwan ch'anqaykuspa, payta wañuchenqanku. Ajinata ruwasqaykichejrayku, qankuna ukhupi chay jina millayta ruwana manaña kanqachu. Israelitakunaqa chayta uyarispa manchachikonqanku, manañataj chay jina millayta ruwayta munanqankuchu.

Waj kamachisqakuna

²² Sichus pipis wañuchisqa kananpaj jina juchachakusqanrayku, sach'aman warkhusqa wañuchisqa kanman chayqa,

²³ chay ayataqa ama tutantinta sach'api warkhusqata saqenkichejchu. Manachayqa chay p'unchaypacha chay runaj ayanta p'ampankichej, imaraykuchus warkhusqa runaqa Diospa maldicisqanmin. Ajinata ruwaspa, Tata Diosniykichej qosusqaykichej jallp'ata mana ch'ichichankichejchu.