Deuteronomio 20 - DIOSPA QHELQACHISQ

Maqanakuman yaykunapaj kamachisqakuna

¹ Awqaykichejwan maqanakoj llojsispa, ichapis rikuwajchej paykuna ashkha caballoyoj, ashkha carretayoj kasqankuta, jinataj qankunamanta nisqa aswan ashkha soldadoyoj kasqankuta. Chayta rikuspa, ama manchachikunkichejchu, imaraykuchus pichus Egiptomanta orqhomusorqachej, chay Tata Diosniykichejqa qankunawan kashan.

² Maypachachus maqanakoj yaykunaykichejpajña kashajtintaj, sacerdote soldadokunata nenqa:

³ Israelitakuna, uyariychej: Kunan awqaykichejwan maqanakoj rinkichej. Ama iskayrayankichejchu, amataj manchachikunkichejchu, nitaj kharkatitinkichejchu, nillataj q'ewakunkichejchu,

⁴ imaraykuchus Tata Diosniykichejqa qankunawan kashan. Payqa awqaykichejwan maqanakuspa, atipanaykichejpaj yanapasonqachej, nispa.

⁵ Chantá kamachejkunaqa soldadokunata nillanqankutaj: Sichus mayqenniykichejpis mosoj wasita ruwakuspa, manaraj chaypi tiyakunchu chayqa, kunanpacha wasinman tiyakapoj kutipuchun. Pajtataj maqanakupi wañojtin, wajtaj wasinta arishanman.

⁶ Sichus mayqenniykichej uva huertata churaspa, manaraj imatapis chaymanta mikhurerqachu chayqa, wasinman kutipuchun, uva huertanmanta mikhunanpaj. Pajtataj maqanakupi wañojtin, wajtaj uvaj poqosqanta pallanman.

⁷ Sichus mayqenniykichej casarakunanpaj parlasqa kanman chayqa, wasinman kutipuspa, casarakuchun. Pajtataj maqanakupi wañojtin, waj runa chay warmiwan casarashanman, nispa.

⁸ Chay jawa kurajkunaqa soldadokunata nillanqankutaj: Sichus mayqenniykichej manchachikun, q'ewakuntaj chayqa, wasinman kutipuchun, soldado masinkunata ama iskayrayachinanpaj, nispa.

⁹ Chantá kurajkuna parlayta tukojtinkutaj, soldadokunata kamachejkunaqa soldadokunaj ñawpaqenkuta maqanakoj renqanku.

¹⁰ Uj llajtaman maqanakoj chayaspaqa, ñawpajta chay llajtayojkuna qankunawan uj tratota ruwanankuta ninkichej.

¹¹ Sichus chay llajtayojkuna nisqaykichejta uyarispa, llajtankuman yaykunaykichejta saqenkuman chayqa, sinch'i ruwanata ruwanankupaj wata runaykichej kanqanku.

¹² Sichus tratota ruwana nisqaykichejta mana uyarispa, maqanakuytapuni munanqanku chayqa, llajtata jap'inaykichejpaj muyuykuspa, maqanakuyta qallarinkichej.

¹³ Chantá Tata Diosniykichej chay llajtata makiykichejman jaywasojtiykichej, tukuy qharita espadawan wañuchinkichej.

¹⁴ Warmikuna, wawakuna, uywakuna ima, chantá imachá chay llajtapi tiyan, chaykuna ima qankunapaj kanqa. Jinallataj Tata Diosniykichej jaywasusqanrayku awqaykichejmanta imatachus qhechusqaykichejqa qankunapaj kanqa.

¹⁵ Ajinallatataj qankunamanta karupi kaj llajtakunawanpis ruwankichej, mayqenkunachus mana muyuyniykichejpi kaj llajtamantachu kanku, chaykunawan.

¹⁶ Chaywanpis Tata Diosniykichej qosonqachej, chay jallp'api tiyakojkunata tukuyta wañuchinkichej.

¹⁷ Tata Diosniykichej kamachisusqanman jina, kaykunata ni uj puchuyojta tukuchinkichej: Jititakunata, amorreokunata, cananeokunata, ferezeokunata, heveokunata, jebuseokunata ima.

¹⁸ Sichus mana paykunata chinkachiwajchejchu chayqa, paykuna millayta ruwaspa, diosninkuta yupaychayta yachaykuchisonqachej. Chayta ruwaspa, qankunaqa Tata Diosniykichejpa contranta juchalliwajchej.

¹⁹ Maypachachus unayta uj llajtata jap'inaykichejpaj muyuykunkichej chaypacha, ama sach'ankunata k'utunkichejchu. Chaykunaj poqoynenqa mikhunaykichejpaj kanqa. Chantapis chay sach'akunaqa runachu kanku contrankuta maqanakunaykichejpajqa? Sach'akunaqa mana kutichikuyta atisonqachejchu.

²⁰ Manachayqa mana poqoj sach'allata urmachiyta atinkichej. Chay k'aspiwan pukarata ruwaspa, chay llajtata jap'inaykichejpaj kanqa.