Deuteronomio 2 - DIOSPA QHELQACHISQ

Israelitakuna ch'innejta muyuspa purisqanku

¹ Chaymanta kutirispa, Puka Mama Qochaman rej ñannejta ch'innejman rerqanchej, Tata Dios kamachiwasqanman jina. Seir orqota muyuspataj, unayta purerqanchej.

² Chantá Tata Diosqa niwarqa:

³ Unaytaña qankunaqa kay orqollatapuni muyushankichej. Kunanqa wichaynejman riychej.

⁴ Israelitakunata kay jinata kamachiy: Qankunaqa aylluykichej Esaúj mirayninpa jallp'ankunejta chimpankichej, pikunachus Seirpi tiyakunku, chaykunaj jallp'ankunejta. Paykunaqa qankunata manchachikusunkichej. Chayrayku qankunaqa allinta qhawakuychej.

⁵ Ama paykunawan maqanakoj sayaykuychejchu, imajtinchus noqaqa mana paykunaj jallp'ankuta qosqaykichejchu, ni uj chhikantapis. Seir jallp'aqa Esaúj mirayninpajta. Chaytaqa paykunamanña qoni.

⁶ Qankunaqa paykunamanta qolqewan mikhunata rantikunkichej, jinallataj yakuta ujyasqaykichejmantapis pagankichej, nispa.

⁷ Qankunataqa Tata Diosniykichej tukuy ima ruwasqaykichejpi yanapasorqachej. Kay tawa chunka wata junt'ata qankunawan karqa, kay chhika karu ch'inkunatataj qhawaspa pusaykachasorqachej, mana imamanta pisichispa.

⁸ Ajinamanta ayllu masinchej Esaujpa miraynin Seirpi tiyakojkunaj jallp'ankuman mana yaykorqanchejchu. Elatmanta chantá Ezión Guebermantapacha, Arabaman rej ñanta rerqanchej. Chaymanta kutirispataj, Moab ch'innejman rerqanchej.

⁹ Chantá Tata Dios niwarqa: Moabitakunataqa ama t'ojpinkichejchu, nitaj paykunawan maqanakoj sayaykunkichejchu, imaraykuchus jallp'ankumanta mana ni uj chhikallantapis qosqaykichejchu. Ar jallp'ataqa Lotpa mirayninmanña qopuni, nispa.

¹⁰ Unay chay jallp'api emita nisqa runakuna tiyakoj kanku. Paykunaqa Anacpata miraynin jina, jatunkaray runakunallataj karqanku.

¹¹ Wakinkuna anaquitakunata refaitakunamanta rejsillajtaj kasqanku. Moabitakunarí paykunata “emitakuna”, nispa sutichasqanku.

¹² Unayqa Seir jap'iynejpi Hor llajtayojkuna tiyakusqanku. Qhepanejmantaj Esaúj mirayninmanta kajkuna paykunata chinkachispa, jallp'ankupi tiyakorqanku, imaynatachus israelitakuna Tata Diospa qosqan jallp'amanta cananeokunata wijch'orqanku, ajinata.

¹³ Chaymanta Tata Dios nerqa: Kunanqa puririspa, Zered mayuta chimpaychej, nispa. Noqanchejtaj chay mayuta chimparqanchej.

¹⁴ Cadés Barneamanta llojsimusqanchejmantapacha Zered mayuta chimpananchejkama, kinsa chunka pusajniyoj wata karqa. Chaykama chay ñawpa mit'amanta pikunachus maqanakupaj jina ajllasqa kajkunamanta tukuy wañorqankuña, Tata Dios tiluspa, nisqanman jina.

¹⁵ Tata Diosmin paykunaj patankuman makinta churaykorqa, tukuyninku wañuspa tukukunankukama.

¹⁶ Maypachachus ñawpa mit'a israelitakuna ukhupi maqanakupaj ajllasqa kajkuna manaña karqankuchu chaypacha,

¹⁷ Tata Dios niwarqa:

¹⁸ Kunan Moab suyunejta chimpaspa, Ar nisqa llajtaman chayankichej.

¹⁹ Maypachachus amonitakunawan tinkukunkichej chaypacha, ama paykunata t'ojpinkichejchu, nitaj paykunawan maqanakunkichejchu, Lotpa miraynin kasqankurayku. Noqaqa jallp'ankuta mana qosqaykichejchu, imaraykuchus chay jallp'ataqa paykunamanña qopuni, nispa.

²⁰ Chay jallp'aqa ñawpajta refaitakunaj jallp'anku karqa, imajtinchus unay paykuna chaypi tiyakoj kanku. Paykunata amonitakunaqa “zanzumitakuna”, nispa sutichasqanku.

²¹ Refaitakunaqa atiyniyoj, ashkhataj karqanku, anaquitakuna jinataj jatunkaray runakuna karqanku. Paykunatarí, Tata Dios amonitakunanejta tukucherqa. Chaymanta amonitakuna chay jallp'ata jap'ispa, chaypi tiyakorqanku.

²² Ajinallatataj Tata Diosqa Esaúj mirayninnejta horeokunatapis chinkachillarqataj. Esaúj miraynenqa Seir jallp'api kunankama tiyakushanku.

²³ Jinallatataj Caftorkunapis Cretamanta jamuspa, Gaza qayllapi tiyakoj aveokunata chinkachillarqankutaj. Chaypitaj paykuna tiyakaporqanku.

²⁴ Chantá Tata Dios nillawarqataj: Kunan puririspa, Arnón mayuta chimpaychej. Noqataj amorreo llajtayoj Jesbonpi kuraj kamachej Sijonta, chantá tukuy suyuntawan ima makiykichejman jaywaykusaj. Qankuna suyunta jap'ej yaykuspa, paykunawan maqanakuychej.

²⁵ Kunanmanta ñawpajman tukuynejpi runakuna qankunamanta manchachikunankuta ruwasaj. Qankunamanta parlajta uyarispa, manchachikuywan kharkatitenqanku, nispa.

Israelitakuna kamachej Sijonta atipanku

²⁶ Chantá Cademot ch'innejmantapacha chaskikunata kacharqani, Jesbonta kuraj kamachej Sijonta k'achallamanta kay jinata ninankupaj:

²⁷ Jallp'aykinejta pasarichiwayku ari. Noqaykoqa cheqanta jatun ñanninta chimpasqayku, ni pañaman nitaj lloq'eman ladoyaspa.

²⁸ Mikhunataqa vendewasqayku, jinallataj yakuta ujyasqaykumantapis pagapusqayku.

²⁹ Seirpi tiyakoj Esaúj miraynin, jinallataj Arpi tiyakoj moabitakunapis jallp'anku ukhuta pasachiwarqayku. Ajinallatataj noqayku Jordán mayuta chimpaspa, Tata Diosniyku qowasqayku, chay jallp'aman rinaykupaj pasarisqayku ari, nispa.

³⁰ Jesbonmanta kuraj kamachej Sijontajrí jallp'annejta mana pasachiyta munawarqanchejchu, imaraykuchus Tata Diospuni makiykichejman payta jaywaykunanpaj sonqonta rumiyacherqa.

³¹ Chaymantataj Tata Dios niwarqa: Kunanmantapacha kuraj kamachej Sijonta, tukuy jallp'antinta makiykichejman jaywaykusaj. Jap'iyninkuman yaykuspa, chay jallp'ata jap'ikapuychej, nispa.

³² Chantá kuraj kamachej Sijonqa tukuy soldadonkunawan ima Yahás llajtapi noqanchejwan maqanakoj llojsimorqa.

³³ Tata Diosninchejtajrí paykunata makinchejman jaywaykuwarqanchej, Noqanchejtaj payta, churinkunata, chantá tukuy soldadonkunata ima atiparqanchej.

³⁴ Atipaspaqa, tukuy llajtankunata thuñerqanchej. Chantá qharikunata, warmikunata, wawakunata ima wañuchispa, mana ujtapis kawsashajta saqerqanchejchu.

³⁵ Noqanchejqa uywallankuta, chantá chay llajtakunapi imachus karqa, chayllata apakaporqanchej.

³⁶ Aroer llajtamantapacha, Arnón mayu chimpapi valle kashan, chaypi kaj llajtamantapacha, Galaad llajtakama tukuyninta jap'erqanchej. Tukuy chay llajtakunata Tata Diosqa makinchejman jaywaykuwarqanchej.

³⁷ Chaywanpis Tata Diosninchej kamachiwasqanchejman jina, amonitakunaj suyunkuman, Jaboc mayu tukuynin jallp'aman, orqonejpi llajtakunaman ima mana qayllarqanchejchu, imaraykuchus Tata Diosninchej chayman yaykunanchejta mana munarqachu.