Deuteronomio 19 - DIOSPA QHELQACHISQ

Pakakunapaj llajtakuna

¹ Maypachachus Tata Diosniykichej chay jallp'amanta tiyakoj runakunata chinkachispa jallp'ankuta qosonqachej, qankunataj llajtankupi, wasinkupipis tiyakunkichej chaypacha,

² Tata Diospa qosqan, chay jallp'api kinsa llajtakunata t'aqankichej.

³ Chay llajtakunaman rej ñantaqa sumajta pichankichej. Jinallataj, Tata Dios qosonqachej, chay jallp'ata kinsaman t'aqankichej, mayqenpis runa masinta wañuchej, chay t'aqapi kaj llajtaman pakakoj ayqekuyta atinanpaj.

⁴ Pichus runata wañuchejqa ama pay wañuchisqa kananpaj chay llajtaman ayqeyta atenqa, sichus mana yuyasqallamanta, nitaj paywan phiñanasqa kashaspa wañuchisqanta sut'ita rikuchenqa chayqa.

⁵ Ichapis ajina kanman: Iskay ukhumanta monteman llant'aj rinkuman. Sichus ujninku ch'ejtashajtin jacha cabonmanta ch'utaspa uj runata jap'erparinman, chay runataj wañunman chayqa, chay wañuchej runa chay kinsa llajtamanta ujninman ayqekuyta atenqa. Ajinamanta runa masinta wañuchejta mana wañuchenqankuchu.

⁶ Ichapis uj pakakuna llajta ancha karupi kasqanrayku, wañojpa qaylla ayllun maypichus kashasqanta yachaspa, chantá manchay phiñasqa kasqanrayku wañuchejta wañuchinman, jina kanman chayqa, chay runa mana juchayoj kashaspalla wañunman, imaraykuchus mana paykunapura chejninakorqankuchu.

⁷ Chayrayku kinsatapuni pakakunapaj llajtakunata t'aqanaykichejta kamachiykichej.

⁸ Sichus Tata Diosniykichej, ñawpa tataykichejman nisqanman jina, jallp'aykichejta jatunyachispa tukuynin jallp'ata qosunkichejman chayqa,

⁹ chaypacha ñawpajta karqaña, chay kinsa llajtaman pakakunapaj kinsa llajtatawan yapankichej. Sichus kunan qoshaykichej chay kamachisqakunata junt'ankichej, Tata Diosniykichejta munakuspataj munasqanta ruwaspa purinkichej chayqa, Tata Diospis jallp'aykichejta jatunyachillanqataj.

¹⁰ Ajinapi Tata Diosniykichej qosunkichej, chay jallp'api mana pipis qankunamanta mana juchayoj runata wañuchenqankuchu. Jinamanta qankunaqa runa wañusqanmanta mana juchachasqachu kankichej.

¹¹ Ichapis mayqellanpis runa masinta chejnikuspa wateqanman, chantá wañuchinankama maqanman, jinaspataj pakakunapaj llajtakunamanta ujninman pakakoj ayqenman chayqa,

¹² chaypachaqa chay llajtanmanta kurajkuna ayqekojta jap'ispa, wañuchisqa qaylla kaj ayllunman jaywanankuta kamachenqanku, wañuchisqa kananpaj.

¹³ Chay runataqa ama khuyankichejchu. Ajinata ruwaspa, israelitakunamanta mana juchayoj runata wañuchejta chinkachinkichej. Chaypacha tukuy imapi allin risonqachej.

Testigo llullakuspa parlajtin imatachus ruwana

¹⁴ Tata Diosniykichej qosonqachej, chay jallp'api, qayllaykichejpi kaj runa masiykichejpa jallp'anpa mojonninta ama ñit'inkichejchu. Imaynachus unaymantapacha mojonasqa karqa, jinallapuni kanan tiyan.

¹⁵ Pi runatapis ima mana allinta ruwasqanmanta, chayrí juchachakusqanmanta juchachanapajqa kinsa, chayrí iskayllapis rikojkuna kananku tiyan. Ujlla rikoj kajtenqa, mana cuentaman churasqachu kanqa.

¹⁶ Ichapis millayta ruwaj runa llullakuspa, runa masinta imallamantapis ch'ataykunman chayqa,

¹⁷ chaypacha iskaynin quejanakojkuna Tata Diospa ñawpaqenman, sacerdotekunaman, chantá juezkunaman ima renqanku, pikunachus mit'ankuman jina chaypacha kashanqanku, chaykunaman.

¹⁸ Chay juezkunaqa imaynapunichus kasqanta allinta watunqanku. Sichus rikoj llajta masinpa contranta llullakushasqan sut'i yachakonqa chayqa,

¹⁹ kikillantataj payta ruwankichej, imaynatachus payqa runa masinta ruwayta munasharqa, ajinata. Ajinamanta chay jina millay ruwayta qankuna ukhumanta chinkachinkichej.

²⁰ Ajinata ruwasqaykichejta wajkuna yachaspa, manchachikonqanku, manañataj chay jina millayta ruwayta munanqankuchu.

²¹ Chay jina ruwajtaqa ama khuyankichejchu. Manachayqa pagachinkichej: Runamanta runata, ñawimanta ñawita, kirumanta kiruta, makimanta makita, chakimantataj chakita.