Deuteronomio 18 - DIOSPA QHELQACHISQ

Sacerdotekuna imawanchus kawsananku

¹ Leví jatun ayllumanta sacerdote ayllu nisqaqa israelitakuna ukhupi mana jallp'ata jap'enqankuchu. Paykunaqa imatachus israelitakuna Tata Diosman jaywanku, jinataj ofrendamanta imatachus apamunku, chaymanta kawsanqanku.

² Paykunaqa mana llajta masinku jinachu jallp'ata jap'enqanku, imaraykuchus paykunajta Tata Diosmin chayaqenku kanqa, imaynatachus nisqanman jina.

³ Israelitakuna Tata Diosman jaywanapaj torota, ovejata ima apamusqankumanta kaykuna sacerdotekunapaj kanqa: Wasa aychan, k'akin, wijsanin ima.

⁴ Jinallataj israelitakuna ñawpaj kaj poqoyta apamusqankumanta sacerdotekunapaj kaykuna kanqa: Trigo, vino, aceite, ovejaykichejmanta ñawpaj ruthuy millma ima.

⁵ Tata Diosniykeqa tukuy Israel ayllumanta levitakunata, chantá mirayninkutawan ima ajllakorqa, wiñaypaj Tata Diospa kamachinpi ruwanayoj kanankupaj.

⁶ Ichapis uj levita Israel suyupi mayqen llajtapipis tiyakushaspa, sonqomanta munasqanrayku Tata Diospa ajllakusqan cheqaman ripuyta munanman.

⁷ Chay levita, levitakuna masin jina, paypis chaypi Tata Diospa kamachinpi ruwanayoj kanqa.

⁸ Mikhunanpajqa imatachus levitakuna jap'inku, chayllatataj jap'enqa. Jinallataj tatanmanta chayaqetapis jap'illanqankutaj.

Israelitakuna waj llajtayojkunaj millay usunkuta mana ruwanankuchu

⁹ Maypachachus Tata Diosniykichej qosonqachej, chay jallp'aman yaykunkichej chaypacha, ama chay llajtayojkunaj millay usunkuta ruwankichejchu.

¹⁰ Ama qankuna ukhupi mayqenpis wawaykichejta q'olachispa diosninkuman jaywankichejchu. Amapuni ni mayqenniykichej watoj kaychejchu, nitaj suerteta qhawajpis, nitaj ch'askata qhawayta yachaj, nillataj layqapis,

¹¹ ni layqawan ruwachejpis kachunchu. Amallataj yachajkunata, nillataj aysirikunatapis tapukunkichejchu.

¹² Tata Diosqa chayta ruwajkunata millachikun. Chayrayku Tata Diosniykichejqa ñawpaqeykichejmanta chay runakunata wijch'onqa, chay jina millayta ruwasqankumanta.

¹³ Qankunarí Tata Diospa munasqanman jina ruwaspa purinkichej.

¹⁴ Jallp'ankuta jap'inkichej, chay suyukunapi runakunaqa layqakunata, yachajkunata ima uyarinku. Tata Diosniykichejrí manapuni chaykunata ruwanaykichejta munanchu.

Dios nin Moisesta jina uj sut'inchajta kachamunanta

¹⁵ Tata Diosniykichejqa qankuna ukhumanta noqa jina uj sut'inchajta sayarichenqa, qankunataj payta kasunkichej.

¹⁶ Qankunaqa Horeb orqopi tantasqa kashaspa, chaytapuni Tata Diosniykichejmanta mañakorqankichej, ajinata nispa: Tata Diosniykoj parlamusqanta mana ujtawan uyariyta munaykuchu, nitaj t'ukunata lawraj ninata rikuyta, ama wañunaykupaj, nispa.

¹⁷ Tata Diostaj niwarqa: Nisqankoqa walejpacha.

¹⁸ Noqaqa qanta jina llajta masinku ukhumanta uj sut'inchajta rikhurichisaj. Noqa payman nisaj, paytaj noqaj nisqayta, chantá paykunaman imatachus kamachisqayta willanqa.

¹⁹ Noqamanta sut'inchaspa, sutiypi parlajtin, sichus pipis nisqanta mana uyariyta munanmanchu chayqa, chay runamanta noqa cuentata mañasaj.

²⁰ Sichus mayqen runa sut'inchajman tukuspa, mana noqa kamachishajtillay sutiypi parlayta munanman, chayrí waj dioskunaj sutinkupi parlanman chayqa, chay runaqa wañuchisqa kanqa.

²¹ Ichapis sonqoykichejpi niwajchej: Imaynapitaj yachaykuman chay runaj parlasqan mana Tata Diospa nisqanchu kasqantari? nispa.

²² Sichus Tata Diospa sutinpi chay sut'inchajpa nisqan mana junt'akunchu chayqa, mana Tata Diospa nisqanchu. Chay sut'inchajqa wapuykachaspalla jinata parlarqa. Chayrayku paymanta ama manchachikunkichejchu.