Deuteronomio 17 - DIOSPA QHELQACHISQ

¹ Diosniykichejmanqa ama iman imanasqa torota, chayrí ovejata jaywankichejchu, imajtinchus payqa chay jina jaywanata millachikun.

² Ichapis Tata Diosniykichej qosonqachej chay suyumanta mayqen llajtapipis yachawajchej qharipis, chayrí warmipis, Tata Diospa ñawpaqenpi mana allin kajta ruwasqanta, trato ruwasqantapis p'akisqanta.

³ Jinallataj qonqorikuspa waj dioskunata yupaychanman, chantá intiman, killaman, ch'askakunamanpis qonqorikuspa yupaychanman, Tata Dios chayta mana kamachejtinpis.

⁴ Chayta yachaytawankama, allinta waturinaykichej tiyan. Sichus israelitakuna ukhupi chay jina millayta ruwasqankuta sut'ita yachakonqa chayqa,

⁵ chay jina millayta ruwajta, qharipis warmipis kachun, llajtaman yaykuna punkunpi kashaj juezkunaman pusankichej. Chantá rumiwan ch'anqaykuspa, wañuchinkichej.

⁶ Iskay, chayrí kinsa rikojkuna kajtin, chay runata wañuchinkichej. Sichus uj runalla rikoj tiyan chayqa, ama chay ch'atasqa runata wañuchinkichejchu.

⁷ Rikojkunaraj ñawpajta ch'anqaykunanku tiyan, chaymantaraj tukuy runakuna ch'anqaykullanqankutaj. Ajinata qankuna ukhumanta chay jina millay ruwanata chinkachinkichej.

⁸ Ichapis justiciata ruway mana atina rikhurisunkichejman, nisunman runa wañuchiymanta, chayrí jallp'ata qhechunakunamanta, maqanakuymanta, chayrí llajtaykichejpi ima ch'ajwamanta. Jina kanman chayqa, Tata Diosniykichej ajllakonqa, chay cheqaman rinkichej.

⁹ Chaypitaj Leví jatun ayllumanta kaj sacerdoteman, chantá chaypacha pichus juez kashan, chaymanwan willankichej. Paykunataj pichus juchayoj kasqanta sut'inchanqanku.

¹⁰ Chantá Tata Dios ajllakonqa, chay cheqapi kaj juezkuna imatachus nisunkichej, chayman jina ruwankichej, paykuna yachachisusqankuman jinataj allinta ruwankichej.

¹¹ Qankunaqa chay juezkunaj nisqankuman jinapuni ruwankichej, mana pañaman, nitaj lloq'eman ithirispa.

¹² Sichus pipis machuykachaspa, Tata Diospa kamachin sacerdotej nisqanman jina, chayrí juezpa nisqanman jina mana ruwanman chayqa, payta wañuchinkichej. Ajinata israelitakuna ukhumanta chay jina millay ruwanata chinkachinkichej.

¹³ Chayta runakuna yachaspa, manchachikuyniyoj kanqanku, manataj runaykachaspa imatapis ruwallanqankuchu.

Kuraj kamachejkunapaj k'amiy

¹⁴ Tata Diosniykichej qosonqachej, chay jallp'aman yaykuspa, chantá chaypi tiyakushaspataj, mayk'ajllapis niwajchej: Kamachinawaykupaj kuraj kamachejniyoj kayta munayku, imaynatachus muyuyniykupi kaj suyukuna kuraj kamachejniyoj kanku, ajinata, nispa.

¹⁵ Jina kanman chayqa, Tata Diosniykichej qankuna ukhumanta ajllasqanta kuraj kamachej kananpaj churankichej. Ama waj llajtayojtaqa churankichejchu, israelita llajta masiykichejtapuni kuraj kamachej kananpaj churankichej.

¹⁶ Chay kuraj kamachejqa ama ashkha caballokunata rantenqachu. Nitaj Egiptomanpis astawan caballokunata rantinanpaj runata kachanqachu, imaraykuchus Tata Dios nisorqachejña: Ama jayk'ajpis Egiptoman kutirinkichejchu, nispa.

¹⁷ Manallataj ashkha warmiyojchu kanan tiyan, ama Tata Diosmanta karunchakunanpaj. Nillataj ashkha qolqeta, ashkha qorita tantanqachu.

¹⁸ Kamachinanpaj tiyaykushaspa, kay kamachisqakunata pay ñawirinanpaj uj p'anqaman thallichikonqa, Leví jatun ayllumanta sacerdotekuna jallch'ashanku, chay qhelqamanta.

¹⁹ Chay thallichisqan qhelqaqa paywanpuni kanqa. Kawsanankamataj sapa p'unchay ñawirenqa, Tata Diosninta manchachikuyta yachananpaj, kamachisqakunata kasuspa junt'ananpaj ima.

²⁰ Sichus kamachej ajinata ruwanqa chayqa, mana yuyanqachu llajta masinkunamanta aswan kasqanta, nitaj pañaman, nitaj lloq'eman Diospa kamachisqanmantapis ithirenqachu. Ajinata ruwaspa, kuraj kamachej, chantá churinkunapis unayta Israel suyupi kamachenqanku.