Deuteronomio 16 - DIOSPA QHELQACHISQ

Sapa wata Pascua raymita ruwana

¹ Aviv killata Tata Diosniykichejpa sutinpi Pascua raymita ruwanamanta yuyarikunkichejpuni, imaraykuchus chay killapi uj tuta Tata Diosniykichej Egiptomanta orqhomusorqachej.

² Pascua raymipeqa wakakunata, ovejakunata ima ñak'aspa, Tata Diosniykichejman jaywankichej, maypichus Tata Dios sutin yupaychasqa kananpaj uj cheqata ajllakonqa, chaypi.

³ Uywa ñak'asqaj aychantaqa mana levadurayoj t'antatawan mikhunkichej. Mana levadurayoj t'antata qanchis p'unchayta mikhunkichej, imaraykuchus chay t'anta niyta munan “ñak'ariy t'anta”. Qankunaqa Egiptomanta usqhay usqhayta llojsimorqankichej, chayrayku kawsanaykichejkama mayk'ajchus Egiptomanta llojsimusqaykichejta yuyarikunkichej.

⁴ Chay qanchis p'unchaypeqa tukuy suyuykichejpi levadura mana kananchu tiyan. Jinallataj killa qallariy tardeyaykuyta Tata Diosman jaywasqaykichej aychamantaqa ama q'ayantinpaj ni uj chhikallanpis puchunanchu tiyan.

⁵ Tata Diosniykichej qosusqaykichej llajtakunapeqa ama mayqen llajtallapipis Pascua raymipi jaywanata jaywankichejchu.

⁶ Manachayqa Tata Diosniykichej sutin jatunchasqa kananpaj maynejtachá ajllakonqa, chayllapi jaywankichej. Pascuapi ñak'aspa uywataqa inti chinkaykuyta jaywankichej, imaraykuchus qankunaqa Egiptomanta chay phanita jina llojsimorqankichej.

⁷ Diosman jaywasqa aychataqa kankaspa mikhunkichej, maypichus Tata Dios sutin jatunchasqa kananpaj ajllakonqa, chaypi. Q'ayantintaj wasiykichejman ripunkichej.

⁸ Qankunaqa sojta p'unchayta mana levadurayoj t'antata mikhunkichej, qanchis kaj p'unchaypitaj Tata Diosniykichejta jatunchanaykichejpaj, Diospa sutinpi tantakunkichej. Chay p'unchaypeqa amapuni ruwanaykichejmanta imatapis ruwankichejchu.

⁹ Trigo ruthuy qallarikusqanmantapacha, qanchis semanaña pasajtin,

¹⁰ Semana nisqa raymita Diosniykichejpa sutinpi ruwankichej. Chay raymipi Tata Diosniykichej qosusqaykichejman jina, sonqomanta munaspa ofrendata qonkichej.

¹¹ Qankunaqa Tata Diosniykichejpa ñawpaqenpi kusikunkichej, maypichus pay uj cheqata ajllakonqa, chaypi. Kusikunkichej wawaykichejwan, kamachiykichejwan khuska, jinallataj llajtaykichejpi tiyakoj levitakunawan, waj llajtayojkunawan, wajcha wawakunawan, chantá warmisapakunawan ima.

¹² Qankunapis Egiptopi wata runa kasqaykichejta ama qonqakuychejchu. Chayrayku kay kamachisqaykunata junt'aychejpuni.

¹³ Trigoykichejta oqhariyta, uvaykichejta ch'irwaytapis tukuytawan, qanchis p'unchayta Ch'ujlla Ruwana raymita ruwankichej.

¹⁴ Chay raymipi qankuna wawaykichejwan, kamachiykichejwan khuska, chantapis llajtaykichejpi tiyakoj levitakunawan, waj llajtayojkunawan, wajcha wawakunawan, warmisapakunawan ima kusikunkichej.

¹⁵ Qanchis p'unchayta Tata Diosniykichejpa sutinpi raymita ruwankichej, maypichus pay uj cheqata ajllakonqa, chaypi, imaraykuchus Tata Diosniykichejqa tukuy chajra oqharisqaykichejpi, tukuy ruwanaykichejpi ima yanapasorqachej. Ajinata ruwaspa, qankunaqa kusiy kawsayta rikunkichej.

¹⁶ Tata Diosniykichejpa ñawpaqenpi tukuy qharikuna watapi kinsa kutita rikhurenqanku, may cheqatachus Tata Dios ajllakonqa, chaypi. Kay raymikunapi rikhurinanku tiyan: Mana Levadurayoj T'anta nisqa raymipi, Semana nisqa raymipi, Ch'ujlla Ruwana nisqa raymipi ima. Chay raymikunapeqa mana pipis ch'usaj makillaqa Tata Diosman renqachu.

¹⁷ Sapa ujniykichej ofrendaykichej oqharisqa rinkichej, imatachus Tata Diosniykichej qosunkichej, chayman jina.

Justiciata ruwana

¹⁸ Tata Diosniykichej qosonqachej, chay llajtakunapi juezkunata, kurajkunatawan ima churankichej, paykuna tukuypaj justiciata ruwanankupaj.

¹⁹ Ama justiciata q'ewinkichejchu, amataj uyankuta qhawarispa wakillanman kutikunkichejchu. Amallataj lluk'ichikunkichejchu, imajtinchus lluk'ita jap'ikunaqa aswan yachayniyoj runatapis pantachin, cheqan runakunaj nisqankutapis waj jinaman tukuchin.

²⁰ Qankuna justiciata ruwaspaqa, cheqantapuni ruwanaykichej tiyan, Tata Diosniykichej qosunkichej, chay jallp'ata jap'ispa tiyakunaykichejpaj.

²¹ Tata Diosniykichejpa altarninpa ñawpaqenpi ama yupaychana k'ulluta sayachinkichejchu, nitaj lantej sutinpi sach'atapis mallkinkichejchu.

²² Yupaychanapaj rumitaqa ama oqharinkichejchu, imaraykuchus chaykunata Tata Diosniykichej mana rikuyta atinchu.