Deuteronomio 14 - DIOSPA QHELQACHISQ

¹ Qankunaqa Tata Diosniykichejpata wawankuna kankichej. Chayrayku pipis wañupojtenqa, ama wañusqaj sutinpi ukhuykichejta q'allurakunkichejchu, nitaj chujchaykichejtapis ruthunkichejchu.

² Qankunaqa Tata Diosniykichejpata kanaykichejpaj t'aqasqa kankichej. Paymin tukuy suyumanta ajllakusorqachej, paypata uj k'ata ayllun kanaykichejpaj.

Mikhunapaj mana mikhunapaj animalkuna

³ Imachus ch'ichipaj qhawasqa kajtaqa ama mikhunkichejchu.

⁴ Qankunaqa kay animalkunata mikhuyta atinkichej: Wakata, ovejata, cabrata,

⁵ tukuy imaymana rijch'aj tarukakunata, k'ita cabrata, gacelakuna, gamokunata ima.

⁶ Ajinaqa tukuy k'anuyta yachaj animalkunata, chantá chaki sillun p'alqasqa kajta mikhuyta atinkichej.

⁷ Kay animalkunatarí mana mikhuyta atinkichejchu, k'anojpis kachunku, chayrí chaki sillunku p'alqasqapis kachunku: Camellota, qhechi qowita, qowita ima. Chaykunajta chaki sillunku mana p'alqasqachu. Chaykunata qankunaqa ch'ichi animalkunata jina qhawankichej.

⁸ Khuchitapis ama mikhunkichejchu. Chaykunaj chaki sillunkoqa p'alqasqa chaypis, mana k'anunkuchu. Qankunaqa chaykunaj aychankuta ama mikhunkichejchu, ni wañojtinkupis llankhankichejchu.

⁹ Yakupi kawsajkunamantaqa llikha lijrayojkunata, chantá qherpayojkunata ima mikhuyta atinkichej.

¹⁰ Mana llikha lijrayojkunata, mana qherpayojkunata imaqa ama mikhunkichejchu. Chaykunataqa ch'ichipaj qhawankichej.

¹¹ Tukuy llimphupaj qhawasqa phawajkunamanta mikhuyta atinkichej.

¹² Kaykunallata ama mikhunkichejchu: Ankata, kunturta, wamanta,

¹³ suwintuta, imaymana rijch'aj mamanikunata,

¹⁴ imaymana qharqañakunata,

¹⁵ surita, ch'useqata, lewqe lewqeta, imaymana rijch'aj wallpa suwata,

¹⁶ jukuta, ibista, k'ita pilita,

¹⁷ yaku pilita, suweq'arata, p'aspa p'aspata,

¹⁸ pariwanata, tukuy imaymana rijch'aj jak'ajlluta, chantá chiñita ima.

¹⁹ Tukuy lijrayoj khuruta ch'ichipaj qhawankichej. Chaykunata ama mikhunkichejchu.

²⁰ Phawajkunamanta tukuy llimphupaj qhawasqa kajkunata mikhuyta atinkichej.

²¹ Payllamanta wañoj animalta amapuni mikhunkichejchu, imaraykuchus qankunaqa Tata Diosniykichejpata kanaykichejpaj t'aqasqa ayllun kankichej. Qankunaj llajtaykichejpi tiyakoj karu llajtayojman chay aychata qoyta atinkichej chayri vendeyta, paykunataj mikhuyta atillanqanku. Ñuñushaj cabra uñataqa ama mamanpa lechenpi chayachinkichejchu.

Chunkamanta ujta Tata Diosman qona

²² Mana qonqaspa sapa wata chajraykichej poqosqanmanta sapa chunkamanta ujta Tata Diosman qonaykichejpaj t'aqankichej.

²³ Trigomanta, vinomanta, aceitemanta ima sapa chunkamanta ujta qosqaykichejta, jinallataj wakamanta, ovejamanta phiwi uñanta ima Tata Diosniykichejpa ñawpaqenpi mikhunkichej, may cheqapichus sutin kananpaj Tata Diosniykichej ajllakonqa, chay cheqapi. Ajinamanta Tata Diosniykichejta tuta p'unchay jatunpaj qhawayta yachaqakunkichej.

²⁴ Sichus Tata Diosniykichej yanapasusqanrayku, chunkamanta ujta t'aqasqaykichejta apanaykichejpaj, Tata Diospa ajllakusqan cheqa wasiykichejmanta ancha karu kanman chayqa,

²⁵ qankuna chay chunkamanta ujta t'aqapusqaykichejta venderparinkichej. Qhatuspa, qolqechasqaykichejtataj, maypichus sutin kananpaj Tata Dios uj cheqata ajllakonqa, chayman apankichej.

²⁶ Chay qolqewantaj, chaypi imachus tiyan, chaykunata munasqaykichejman jina rantikuyta atinkichej: Wakata, ovejata, vinota, chayrí ima poqosqa ujyanatapis, imatachari sonqoykichej munan, chaykunata. Chantá Tata Diosniykichejpa ñawpaqenpi chay imakunata mikhunkichej. Qanwan, aylluykiwan ima raymita ruwaspa kusikunkichej.

²⁷ Qankunaj llajtaykichejpi tiyakoj levitakunata ama jayk'ajpis qonqarparinkichejchu, imaraykuchus paykunaqa mana qankuna jina jallp'ata jap'inkuchu.

²⁸ Sapa kinsa wata pasayta, poqochisqaykichejmanta sapa chunkamanta ujninta t'aqaspa, llajtaykichejpi jallch'ankichej.

²⁹ Chaytataj levitakuna mikhonqanku, imajtinchus paykunaqa mana jallp'ayojchu kanku. Jinallataj chaymanta llajtaykichejpi tiyakoj waj llajtayojkuna, wajchakuna, warmisapakuna ima mikhonqanku. Ajinata ruwajtiykichej, Tata Diosniykichej tukuy ima ruwasqaykichejpi yanapasonqachej.