Deuteronomio 13 - DIOSPA QHELQACHISQ

Lantikunata mana yupaychanankuta ujtawan k'amin

¹ 1 (2) Ichapis qankuna ukhumanta Diosmanta sut'inchaj, chayrí mosqoykunamanta willaj rikhurinman, paytaj ninman runaj mana jayk'aj rikusqan t'ukuna kananta.

² 2 (3) Sichus paypa nisqan junt'akojtin, pay nisunkichejman: Jaku, mana rejsisqaykichej waj dioskunaman k'umuykamunachej, nispa chayqa,

³ 3 (4) amapuni payta uyarinkichejchu. Chaynejta Tata Diosniykichej yachariyta munan cheqatapunichus tukuy sonqoykichejwan, tukuy almaykichejwan ima payta munakusqaykichejta.

⁴ 4 (5) Qankunaqa Tata Diosniykichejta qhatikuspa, payllata yupaychaychej. Kamachisqanta junt'aychej, paypa nisqantataj uyariychej. Payllaman k'askakuychej, amataj payta wasanchaychejchu.

⁵ 5 (6) Chay sut'inchajta, chayrí mosqoykunamanta willajtaqa wañuchinkichej, Tata Diosniykichejpa contranta ruwanaykichejta yuyaychasqanrayku. Qankuna Egiptopi wata runa kashajtiykichej, Tata Diosniykichejqa preciota pagaspa kacharichisorqachej. Chay runatajrí, Tata Diospa kamachisqanta mana kasunaykichejta yuyaychaspa, Diosmanta karunchakunaykichejta munarqa. Ajinata ruwaspa, qankuna ukhumanta chay mana allin kajta chinkachinkichej.

⁶ 6 (7) Ichapis kikin wawqeyki, churiyki, ususiyki, munasqa warmiyki, chayrí aswan sumaj kawsaqeyki pakayllamanta nisunkiman: Jaku, waj dioskunata yupaychamunachej, mayqentachus ni qan, nitaj tatanchejkunapis rejserqankuchu, chaykunata.

⁷ 7 (8) Chay dioskunaqa muyuyniykichejpi kaj llajtayojkunaj, qayllapi kajkunajta, chantá karupi kajkunajta ima kanku, nispa.

⁸ 8 (9) Qanrí ama chay nisqanta kasunkichu, nitaj uyarinkipischu. Ama paymanta khuyakunkichu, nitaj llakikunkichu, nillataj payta pakaykunkichu.

⁹ 9 (10) Manachayqa chay jinata parlaj runata wañuchinki. Qanpuni ñawpajta rumiwan ch'anqaykunki, chaymantataj tukuy ch'anqaykullanqankutaj.

¹⁰ 10 (11) Egiptopi wata runa kashajtiyki orqhomusorqa, chay Tata Diosniykimanta karunchasuyta munasqanrayku, payta wañunankama rumiwan ch'anqanki.

¹¹ 11 (12) Chay jina ruwasqaykita tukuy israelitakuna yachaspa, manchachikonqanku, manañataj ujtawan qankuna ukhupi chay jinata ruwaspa juchallenqankuchu.

¹² 12 (13) Ichapis Tata Diosniykichej tiyakunaykichejpaj qosunkichej, chay llajtakunapi kay jinata nejta uyariwajchej:

¹³ 13 (14) Diosta mana kasoj runakuna rikhurimuspa, chay llajtapi tiyakojkunata kay jinata nispa pantachishanku: Jaku, waj dioskunata yupaychamuna, qankuna mana rejserqankichejchu, chaykunata, nispa.

¹⁴ 14 (15) Jinapunichus manachus kasqanta yachanaykichejpaj, qankuna allinta watunaykichej tiyan. Sichus nisqanku jinapuni kasqanta, jinataj qankuna ukhupi millayta ruwashasqankuta yachankichej chayqa,

¹⁵ 15 (16) chay llajtapi tiyakojkunata, tukuy uywankukunatawan khuska espadawan wañuchinkichej.

¹⁶ 16 (17) Tukuy kapuyninkutaqa llajta plazaman tantaspa, llajtantinta ninawan kanaykunkichej. Chay tukuy imaqa q'olachisqa jaywana Tata Diospaj kanqa. Jinamanta chay llajtaqa wiñaypaj raqayllaña kanqa, nitaj jayk'ajpis watej sayarichisqachu kanqa.

¹⁷ 17 (18) Qankunaqa imachus chinkachisqa kananpaj t'aqasqa kashan, chaymanta ama imatapis jap'ikapunkichejchu. Chaykunata mana jap'ikapojtiykichej, Tata Diospa sinch'i phiñakuynin tiyaykonqa, qankunatataj khuyasonqachej, tataykichejman tiluspa nisqanman jinataj ashkhata mirachisonqachej.

¹⁸ 18 (19) Ajina kanqa sichus Tata Diosniykichejta kasuspa, kunan kamachisqasuyta junt'ankichej, jinataj paypa ñawpaqenpi cheqan kajta ruwankichej chayqa.