Deuteronomio 11 - DIOSPA QHELQACHISQ

Tata Diospa atiynin

¹ Tata Diosniykichejta munakuychej, paypa nisqantataj tuta p'unchay junt'aychej. Kamachisqankunata, yachachisqankunata ima kasuychej.

² Tata Dios cheqan ñanman churasunaykichejpaj jasut'isusqanta yuyarikuychej. Wawaykichejkuna chaykunata mana yachankuchu, nitaj rikorqankuchu. Yuyarikuychej ari, Diospa may jina atiyninmanta, t'ukuna ruwasqanmanta ima.

³ Egiptopi kuraj kamachej faraonpa contranta, chantá tukuy suyunpa contranta ima runa mana jayk'aj rikusqan t'ukuna ruwasqanta yuyarikullaychejtaj.

⁴ Egipto llajtayojkunaj soldadonkuta, caballonkuta, carretankuta ima, Tata Dios imatachus ruwasqanta amallataj qonqaychejchu. Diosqa paykunata wañucherqa qankunata qhatiykushajtinku, Puka Mama Qochaman p'ultiykuspa. Ajinata Tata Dios paykunata wiñaypaj chinkarparicherqa.

⁵ Ch'innejta jamushajtiykichej kayman chayamunaykichejkama, Tata Dios qankunapaj tukuy imata ruwasqanta yuyarikullaychejtaj.

⁶ Chay jawa Datanwan, Abiranwan ima Dios imatachus ruwasqanta rikorqankichej. Paykunaqa Eliabpa mirayninmanta, Rubenpa jatun ayllunmanta karqanku. Paykunataqa tukuy israelitakuna rikushajtinku, ayllunkuta, jarankuta, chantá tukuy tiyapuyninkutawan ima, jallp'a kicharikuspa, oqoykorqa.

⁷ Qankunaqa Tata Diospa chay tukuy t'ukuna ruwasqanta kikin ñawiykichejwan rikorqankichej.

Canaán suyupi saminchasqa kanqanku

⁸ Chayrayku, kunan qoykichej, chay tukuy kamachisqakunata kasuychej ari. Ajinata ruwaspa kallpayoj kankichej qosqaykichej chay jallp'ata jap'inaykichejpaj.

⁹ Jinallataj chay jallp'api unayta kawsankichej. Chay jallp'ata Tata Diosniykichej ñawpa tataykichejkunaman, chantá mirayninkuman ima qonanta nerqa. Chay jallp'apeqa lechewan, abeja misk'iwan yaku jina purishan.

¹⁰ Jap'inkichej chay jallp'aqa, mana maymantachus llojsimorqankichej, chay jallp'a jinachu. Egiptopeqa mujuta tarpuspa, huertata jina qarpanaykichej karqa.

¹¹ Jap'inkichej chay jallp'arí orqokunayoj, vallekunayoj ima, chaypitaj para kallanpuni.

¹² Chay jallp'ataqa Tata Diosniykichej qhawashan. Paypa ñawenqa wata qallariymanta wata tukukuykama qhawan.

¹³ Ajinaqa qankuna, kunan qoshaykichej chay kamachisqakunata kasunkichej, chantá Tata Diosniykichejta munakunkichej, jinallataj tukuy sonqoykichejwan, tukuy almaykichejwan ima payta yupaychankichej.

¹⁴ Sichus ajinata ruwankichej chayqa, Tata Diosniykichej chay jallp'aman tiemponpi ñawpaj parata, qhepa paratapis parachimonqa. Ajina kasqanrayku qankunaqa trigota, vinota, aceitetapis ima munayta oqharinkichej.

¹⁵ Jinallataj Tata Diosqa uywaykichejpaj ashkha q'achuta wiñachenqa. Qankunapajpis mikhuna may chhika kallanqataj.

¹⁶ Chaywanpis allinta qhawakuychej ama sonqoykichejwan q'otiyachikunaykichejpaj. Tata Diosmanta amapuni t'aqakunkichejchu, waj dioskunata yupaychaspa, paykunamantaj qonqorikuspa.

¹⁷ Ajina kanqa chayqa, Tata Dios qankunaj contraykichejpi sinch'ita phiñakuspa, mana parachimonqachu. Jallp'apeqa mana imapis poqonqachu, qankunataj Tata Dios qosusqaykichej sumaj jallp'api askamalla wañunkichej.

¹⁸ Kay nisqayta sonqoykichejpi, yuyayniykichejpipis jap'iychej. Ama qonqanaykichejpaj qhelqaspa makiykichejman, chantá mat'iykichejmanpis señalta jina wataykuychej.

¹⁹ Wawaykichejkunamanpis kay nisqayta yachachiychej, ñanpi purishaspa, wasiykichejpi kashaspa, puñunaykichejpaj sirikapushaspa, tutamanta jatarishaspapis.

²⁰ Chantá wasiykichejpa sayantanpi, punkunpi ima qhelqaychej.

²¹ Ajinamanta janaj kanankama, mayqen jallp'atachus ñawpa tataykichejman Tata Dios tiluspa qonanta nerqa, chay jallp'api qankunapis, wawaykichejkunapis unayta tiyakunkichej.

²² Sichus kunan qoshaykichej chay kamachisqakunata allinta kasunkichej, sitajchus Tata Diosniykichejta munakunkichej, munasqanman jina purispataj payta qhatinkichej chayqa,

²³ pay ñawpaqeykichejmanta kay suyukunapi tukuy tiyakojkunata wijch'onqa. Qankunaqa ashkha runayoj, chantá atiyniyoj suyukunata atipaspa jap'inkichej.

²⁴ Maymanchá chakiykichej saruykonqa, chay jallp'a qankunajta kanqa. Suyuykichejpa mojonnenqa ch'innejmantapacha Libanokama, Éufrates mayumantataj Jatun Mama Qochakama kanqa.

²⁵ Tata Diosniykichejqa nisusqanman jina, maynejtachá pasankichej, chaypi tiyakoj runakuna manchachikunankuta, kharkatitinankuta ima ruwanqa. Ni pipis qankunaman sayaykuyta atenqankuchu.

²⁶ Kunan imatachus munasqaykichejta ajllakunaykichejpaj ñawpaqeykichejman churani, allin risunaykichejta, chayrí mana allin risunaykichejta.

²⁷ Allin risonqachej sichus Tata Diosniykichej kamachisqanta kunan qoshaykichej, chayta kasunkichej chayqa.

²⁸ Manataj allinchu risonqachej, sichus qankuna waj dioskunata yupaychaspa, Tata Diosniykichejpa kamachisqanta mana kasunkichejchu, nitaj nisqanman jina purinkichejchu, chaypacha.

²⁹ Jap'inaykichej kashan, chay jallp'aman Tata Diosniykichej pusaykusojtiykichejqa, Guerizín orqoman rispa, chaymanta israelitakunata allin rinanta ninkichej. Ebal orqomantataj israelitakunata mana allin rinanta nillankichejtaj.

³⁰ Chay orqokunaqa Jordán mayumanta inti llojsimuynejpi kashanku, Arabapi cananeokunaj jallp'ankupi, Gilgal chimpapi, Morepi encina sach'arara qayllapi.

³¹ Qankunaqa Jordán mayuta chimpanaykichejpajña kashankichej, Tata Diosniykichej jallp'ata qoshasunkichej, chayta jap'ej yaykunaykichejpaj. Chay jallp'ata jap'ispataj, chaypi tiyakuychej.

³² Kunan qoshaykichej, chay kamachisqakunata, yuyaychaykunata ima, junt'anaykichejmanta allinta qhawaychej.