Deuteronomio 1 - DIOSPA QHELQACHISQ

Moisés israelitakunata Tata Diospa nisqanmanta yuyarichin

¹ Kay jinata Moisés Jordán mayu inti llojsimuynej ch'innejpi tukuynin israelitakunaman parlarqa. Arabapi, Sufpa chimpanpi, Parán llajtawan, Tofel, Labán, Jaserot, Dizahab llajtawan ima, chawpinpi kashajtinku parlarqa.

² Horeb orqomanta Cadés Barneakama, Seir orqoman rej ñanninta rispa, chunka ujniyoj p'unchay puririy karqa.

³ Egiptomanta llojsimusqanku tawa chunka wataña kashajtin, chunka ujniyoj killa qallariyta, Tata Dios imatachus kamachisqanta, Moisés israelitakunaman willarqa.

⁴ Amorreokunaj kuraj kamachejnin Jesbonpi tiyakoj Sijonta, chantá Basanmanta kuraj kamachej Ogta atipasqanmanta qhepata chaykunata parlarqa. Kuraj kamachej Ogqa Edreypi, Astarot llajtapi ima kamacherqa.

⁵ Jordán mayu inti llojsimuynejpi, Moab suyupi kashajtinku, Moisesqa Diospa yachachisqanta israelitakunaman yachachiyta qallarerqa:

⁶ Horebpi kashajtinchej, Tata Diosqa kayta niwarqanchej: Qankunaqa kay orqopi unaytaña kashankichej.

⁷ Kunanqa tukuy imaykichejta oqharikuspa, amorreokunaj orqonkunaman riychej, tukuy muyuyninkupi kaj llajtakunaman ima. Rillaychejtaj Arabaman, orqorara cheqanejman, vallekunaman, Neguevman, mama qocha kantuman, cananeokunaj suyunkuman, Libanoman, chantá Éufrates jatun mayukama ima.

⁸ Noqa chay suyukunata qankunaman qoykichej. Chayrayku chayman rispa, chay jallp'ata jap'ej yaykuychej. Chay jallp'ata noqa Tata Dios ñawpa tataykichej Abrahamman, Isaacman, Jacobman, jinallataj mirayninkuman ima tiluspa qonayta nerqani, nispa.

Juezkunata churanku

⁹ Moisés nillarqataj: Chaypachallataj noqa nerqaykichej: Noqa sapallayqa mana qankunata pusayta atiymanchu.

¹⁰ Tata Diosniykichejqa kay chhikata mirachisunkichej, chayrayku kunan qankunaqa janajpi ch'aska jina ashkha kankichej.

¹¹ Tata Dios, ñawpa tataykichejkunaj Diosnin qankunata waranqa waranqa jinatawanraj mirachichun, nisqanman jinataj qankunata saminchachun.

¹² Chaywanpis noqa sapallayqa ch'ajwachinakusqaykichejta, quejaykichejtapis mana allinchayta atiymanchu.

¹³ Chayrayku sapa jatun ayllumanta yuyayniyojkunata, yachayniyojkunata, kawsay imachus kasqanta yachajkunata ima ajllaychej. Noqa paykunata kamachejniykichej kananpaj churasaj, nispa.

¹⁴ Qankunataj kutichiwarqankichej: Imatachus niwasqaykoqa sumajpacha, nispa.

¹⁵ Chantá sapa jatun aylluymanta yuyayniyoj yachayniyojkunata, chantá kawsay imachus kasqanta yachajkunata ajllasqaykichejta, qankunata kamachinasuykichejpaj paykunata churarqani. Wakinta waranqa runakunata kamachinankupaj churarqani, wakintataj pachajta, wakintataj phishqa chunkata, wakintataj chunkata kamachinankupaj. Wakinkunatatajrí sapa jatun ayllupi kuraj kamachejkuna kanankupaj churallarqanitaj.

¹⁶ Chaypachallataj juezniykichejkunata ajinata kamacherqani: Israelita masiykichejpa tukuy quejankuta uyariychej. Sapa ujpaj cheqan justiciata ruwaychej, jinallatataj waj llajtayojkunapajpis kikillantataj ruwaychej.

¹⁷ Justiciata ruwaspaqa, ama uyanta qhawaspachu ruwankichej. Pisi tiyapuyniyojtapis, qhapajtapis uj rejta justiciata ruwankichej. Ama pitapis manchachikuychejchu, imaraykuchus justiciaqa Diospatamin. Sichus imamanta queja cheqanchay mana atina chayamusunkichejman chayqa, noqaman apamuwaychej. Noqataj justiciata ruwasaj, nispa.

¹⁸ Chaypacha qankuna imatachus ruwanaykichejta sut'ita kamacherqaykichej.

Chunka iskayniyoj runakuna Canaanta qhawaj rinku

¹⁹ Chantá Tata Dios kamachiwasqanchejman jina Horebmanta puririspa, amorreokunaj orqorara cheqanejman chayarqanchej. Tata Diosninchej kamachiwasqanchejman jina purerqanchej, chay jina manchachikuna jatun ch'innejta Cadés Barneaman chayananchejkama. Chayta qankuna rikorqankichej.

²⁰ Chaypitaj nerqaykichej: Amorreokunaj orqoraranman chayamunchejña, mayqentachus Tata Diosninchej qoshawanchej, chayman.

²¹ Tata Dios, qankunaj Diosniykichej kay jallp'ata qosunkichej. Rispa, ñawpa tataykichejkunaj Tata Diosninpa nisqanman jina, chay jallp'ata jap'imuychej. Ama manchachikuychejchu, nitaj q'ewayaychejchu, nispa.

²² Chantá tukuyniykichej jamuspa, niwarqankichej: Walej kanman noqaykumanta wakinta ñawpajta kachananchej, chay jallp'ata qhawaj rinankupaj. Kutimuspataj, may ñantachus rinanchejta, chantá may llajtamanchus yaykunanchejta willanawasunchej, nispa.

²³ Qankunaj niwasqaykichejqa noqapaj allin karqa. Chayrayku qankuna ukhumanta chunka iskayniyoj runakunata, sapa jatun ayllumanta ujkama ajllarqani.

²⁴ Paykunataj rispa, orqorara cheqanejman wicharerqanku, chaymantataj Escol valleman chayarqanku. Chaymanta rispataj, chay tukuynin jallp'ata qhawaspa purerqanku.

²⁵ Chantá chay jallp'ata qhawaj risqankumanta poqoykunata apamuspa, kay jinata willawarqanchej: Tata Diosninchej jallp'a qowasqanchejqa sumaj jallp'a kasqa, nispa.

²⁶ Chay tukuywanpis qankunaqa mana riyta munarqankichejchu. Aswanpis Tata Diosniykichejpa kamachisqanta mana kasorqankichejchu.

²⁷ Qankunaqa toldoykichejpi thutuspa, nerqankichej: Tata Diosqa mana munakuwanchejchu. Egiptomanta orqhomuwanchej amorreokunaj makinkuman jaywaykunawanchejpaj, jinamanta noqanchejta wañuchispa tukuchinawanchejpaj.

²⁸ Kunanqa maymantaj risunri? Chay jallp'ata qhawaj rejkuna niwanchej, jaqaypi runaqa noqanchejmanta aswan atiyniyoj, astawan jatuchajtaj kasqankuta. Nillawanchejtaj llajtankukunapis jatuchaj sumaj perqawan muyuykuchisqa kasqankuta. Rikullasqankutaj Anacpata miraynenqa jatunkaray runakuna kasqankuta, nispa.

²⁹ Noqarí nerqaykichej: Ama manchariychejchu, nitaj paykunata manchachikuychejchu.

³⁰ Tata Diosniykichej ñawpaqeykichejta rishan, paymin qankunarayku maqanakonqa, imaynatachus qankunarayku Egiptopi maqanakorqa, ajinata.

³¹ Chay jawa ch'innejpi, chantá ñanta jamushajtiykichej kayman chayamunaykichejkama rikorqankichej Tata Diosqa uj tata jina makinwan jap'ispa, qankunata pusamususqaykichejta, nispa.

³² Chay tukuywanpis qankunaqa Tata Diosniykichejpi mana atinikorqankichejchu.

³³ Payqa ñawpaqeykichejta rispa, maynejpichus jarakunaykichejta qhawarqa. Tutaqa ninawan k'anchaspa, maynintachus rinaykichejta rikuchisorqachej, p'unchaytaj phuyuwan.

Tata Dios israelitakunapaj phiñakun

³⁴ Tata Dios qankunaj thutusqaykichejta uyarispa, manchayta phiñakorqa, tiluspataj nerqa:

³⁵ Kay millay runakunamanta, mana pipis ñawpa tataykichejman qonayta nerqani, chay sumaj jallp'ata rikonqachu.

³⁶ Yefunej churin Caleblla chay jallp'ata rikonqa. Payman, churinkunaman ima, maymanchus chakinku saruykonqa, chayta qosaj, imajtinchus payqa noqata mana wasanchawarqachu, nispa.

³⁷ Qankunaj juchaykichejrayku, Tata Diosqa noqapajpis phiñarikullarqataj. Chayrayku niwarqa: Qanpis manallataj chay jallp'aman yaykunkichu.

³⁸ Qanpa cuentaykimanta yanapasoj Nunpa churin Josuella yaykonqa. Jinaqa payta astawan kallpachay, imaraykuchus paymin israelitakunaman chay jallp'ata qonqa.

³⁹ Qankunaqa yuyarqankichej awqaykichej wawaykichejta qhechusunanta. Chay wawaykichejkuna, pikunachus manaraj yachankuchu imachus allin, imatajchus mana allinchu kasqanta, paykuna chay jallp'aman yaykuspa, jap'enqanku. Noqa paykunaman chay jallp'ata qosaj.

⁴⁰ Qankunarí ch'innejman kutiriychej, Puka Mama Qochaman rej ñanninta rispa, nispa.

Jormá chaynejpi israelitakuna atipachikunku

⁴¹ Chantá qankuna kutichiwarqankichej: Tata Diospa contranta juchallikuyku. Kunantaj wicharispa, Tata Diosninchej kamachiwasqanchejman jina maqanakamusqayku, nispa. Jinataj qankunaqa sapa uj armaykichejta oqharikorqankichej, orqonejman wicharina atikoj jinalla kasqanta yuyaspa.

⁴² Tata Diostajrí niwarqa qankunaman ninayta: Ama maqanakoj riychejchu, awqaykichejkunawan atipachikunaykichejpajqa, imaraykuchus noqa mana qankunawanchu kashani, nispa.

⁴³ Noqaqa chayta willarqaykichej, qankunatajrí mana uyariwarqankichejchu. Aswanpis Tata Diospa kamachisqanta mana uyarikuspa, wapuykachaspataj, orqoman wicharerqankichej.

⁴⁴ Chay orqokunapi tiyakoj amorreokunarí qankunawan maqanakoj llojsimuspa, wayronqo jina Jormakama qhatiykusorqachej, Seirpitaj atiypakusorqachej.

⁴⁵ Chaymanta kutimuspataj, qankuna Tata Diospa ñawpaqenpi mayta waqarqankichej. Tata Diostajrí waqasqaykichejta mana uyarisorqachejchu.

⁴⁶ Chayrayku qankunaqa Cadés cheqanejpi unayta karqankichej.