Daniel (hebreo) 9 - DIOSPA QHELQACHISQ

Daniel llajta masinkunapaj Diosmanta mañapun

¹ Asueroj churin Darío Media suyumanta karqa, paytaj Caldea suyupi kamachisharqa.

² Darío uj watata kamachishajtin, noqaqa Diosmanta sut'inchaj Jeremiaspa qhelqanta allinta yachayta munaspa ñawirisharqani. Chay qhelqapi nisqa Jerusalenqa qanchis chunka wata junt'ata thuñisqa kananta, sut'inchaj Jeremiasman Tata Dios nisqanman jina.

³ Chayta yachaspa, noqa Tukuyta Kamachej Diosmanta mañakorqani, ayunarqani ima. Qhashqa p'achata churakuspataj, ushpha patapi tiyakorqani.

⁴ Chantá Tata Dioswan parlarikuspa, juchallisqaykuta rimarerqani: May jatun Tata Diosníy, qan may atiyniyojtaj kanki. Trato ruwasqaykitaqa junt'ankipuni, munakuyniykitataj qanta munakusojkunaman rikuchinki, jinallataj kamachisqaykita junt'ajkunaman ima.

⁵ Noqaykurí juchallerqayku, millayta ruwarqayku, qanta mana kasuspataj kawsarqayku. Jinallataj kamachisqaykimanta, imatachus ruwanaykuta nisqaykimantawan karunchakorqayku.

⁶ Kamachiyki sut'inchajkunapis kuraj kamachejniykuta, kurajkunata, ñawpa tataykukunata, tukuynin israelitakunata ima sutiykipi k'amillawarqaykutaj. Chaywanpis manallataj paykunata kasorqaykuchu.

⁷ Tukuyta Kamachej Diosníy, qan cheqanta ruwaj kanki. Noqayku israelitakunarí tukuyniyku p'enqasqa kashayku: Jerusalenpi tiyakojkuna, jinallataj tukuynin israelitakuna, qayllapi, chayrí, karupi tiyakojkunapis, maymanchus wijch'uwarqayku qanpa contraykipi oqharikusqaykurayku, chaypi.

⁸ Tata Dios, noqaykupis, kuraj kamachejniykupis, kurajniykukuna jina, ñawpa tataykukuna jinataj p'enqaypi rikhuriyku contraykipi juchallikusqaykurayku.

⁹ Chaywanpis qan, Tukuyta Kamachej Diosniyku, may khuyakuyniyoj kanki, contraykipi oqharikushajtiykupis juchaykuta pampachanki.

¹⁰ Tata Diosniyku, mana qanta uyarisorqaykuchu, nitaj kasorqaykuchu sut'inchaj kamachiykikunanejta yachachiwasqaykuta.

¹¹ Tukuy israelitakuna yachachisqaykita mana kasorqaykuchu. Kamachisqaykita kasunaykutaqa, qanmanta karunchakorqayku. Jinapi contraykipi juchallikusqaykurayku kamachiyki Moisés kamachisqankunapi tiluspa kananta nerqa, chay maldicisqa kaywan, jasut'iykunawan ima pataykuman urmaykuwayku.

¹² Chay jatun llakiyta apachimuspaqa, qan junt'ashanki imatachus niwasqaykuta noqaykuman, jinallataj kuraj kamachejniykukunamanpis. Jerusalenpa patanman urmamun, chay jina llakiytaj mana jayk'ajpis tukuy kay pachapi karqachu.

¹³ Tukuy kay llakeyqa Moisespa kamachisqanpi qhelqasqa kasqanman jina qhatiriwayku. Noqaykurí, mana qanta mask'arqaykuchu, manataj sajra kawsayniykuta saqerqaykuchu, nillataj cheqan kajtapis qhaterqaykuchu.

¹⁴ Chayraykumá, qan Tata Dios, kay jasut'ita wakichispa, pataykuman apachimuwarqayku. Tata Diosniyku, qanmin tukuy ima ruwasqaykipi cheqan kanki, noqaykutajrí niwasqaykuta mana uyarisuyta munarqaykuchu.

¹⁵ Tukuyta Kamachej Diosniyku, aylluykita Egiptomanta orqhomuspa, qan jatun atiyniykita rikucherqanki. Ajinata ruwasqaykirayku, chaymantapacha kunankama sutiyki jatunpaj qhawasqa kashan. Noqaykutajrí juchallispa, millay kajta ruwarqayku.

¹⁶ Chaywanpis Tukuyta Kamachej Diosniyku, cheqan khuyakuyniykiman jina, Jerusalenmanta phiñakuyniykita karunchay, chay sinch'i k'araj phiñakuyniykita, imaraykuchus Jerusalenqa llajtaykimin. Tukuy muyuyninpi suyukunamanta runakunapis Jerusalenmanta, aylluykimantapis alqochakunku, noqaykoj jinallataj ñawpa tataykoj juchankuraykupis.

¹⁷ Tukuyta Kamachej Diosniyku, mañakusqayta uyariway. Sutiykirayku, munakuyniykiraykutaj khuyarispa, imaynachus Temployki phirisqa, ch'inyachisqataj kasqanta qhawariy.

¹⁸ Diosniyku, uyarillawayku ari. Qhawariy imaynatachus sutiyki yupaychasqa kananpaj ajllasqayki llajta ch'in laqayaman tukuchisqa kasqanta. Mana noqayku cheqanta ruwasqaykupi atinikusqaykuraykuchu qanmanta mañakushayku, manachayqa qanpa jatun khuyakuyniykipi atinikuyku.

¹⁹ Tukuyta Kamachej Diosniyku, uyariwayku. Tukuyta Kamachej Diosniyku, juchaykuta pampachay ari. Uyarillawayku, Tukuyta Kamachej Diosniyku, jamuspataj yanapariwayku. Qanpa sutiykirayku, Diosníy, usqhayllata jamuy ari, llajtaykipi, aylluykipi ima sutiyki yupaychasqa kasqanrayku, nispa.

Qanchis chunka semanamanta sut'inchay

²⁰ Noqaqa juchayta jinallataj israelita llajta masiykunaj juchankutapis rimarispa, Diosmanta mañakushallarqanipuni. Ajinamanta Tata Diosniypa ñawpaqenpi mañapusharqani paypa t'aqakusqan Jerusalén llajtanrayku.

²¹ Ajinata mañakushajtiy, ñawpajpiña mosqoypi jina rikusqay Gabriel phawaspa jamorqa, maypichus noqa kasharqani, chayman. Chay karqa ch'isiyaykuyta Diosman uywata ñak'aspa jaywana phanita jina.

²² Chantá Gabriel niwarqa: Daniel, kunanqa qanman kay imakunamanta sut'inchasunaypaj jamuni.

²³ Mañakuyta qallarisqaykimantapacha Dios uyarisorqaña, noqataj chayta willasunaypaj jamuni, imaraykuchus Dios mayta munakusunki. Kunanqa, sumajta uyariway, chay mosqoypi jina rikusqayki imatachus niyta munasqanta yachanaykipaj:

²⁴ Diosqa qanchis chunka semanata t'aqan israelitakunawan, Diospaj t'aqasqa llajtanwan ima Diospa contranta oqharikusqankumanta kutirikunankupaj, juchallisqankumanta, millay ruwasqankumantataj qhespichisqa kanankupaj ima. Chaymantataj Diosqa cheqan kajta wiñaypaj sayachenqa. Ajinata mosqoypi jina rikusqayki, sut'inchajkunaj willasqanku ima junt'akonqa, may llimphu cheqapis Diosllapaj t'aqasqa kanqa.

²⁵ Kayta uyariy, jap'eqaytaj: Jerusalén llajtata watej sayarichinapaj kamachisqa llojsisqamantapacha, Diospaj Ajllasqan Kuraj Kamachej chayamunankamaqa qanchis semana kanqa. Chantá Jerusalenpa callenkuna, muyuyninpi perqanpis watej sayachisqa kanankamataj sojta chunka iskayniyoj semana kanqa. Chaywanpis manchay llakiy p'unchaykuna kanqa.

²⁶ Chay sojta chunka iskayniyoj semana qhepata Diospaj Ajllasqan Kuraj Kamachejta wañuchenqanku. Chantá waj kuraj kamachej jamuspa, Jerusalén llajtata, jinallataj Templotapis soldadonkunawan thuñiykuchenqa. Tukuy imaj tukukuynenqa jatun mayu jina ujllata chayamonqa. Chay tukukuykamarí Dios kamachisqanman jina maqanakuy, llakiykuna ima kallanqapuni.

²⁷ Uj semanatawan chay kuraj kamachej ashkha runawan tratota ruwanqa. Chawpi semanapitajrí uywa ñak'asqa q'olachisqa jaywanata, ofrenda qonatapis sayachenqa. Chantá q'olachina altarpa ñawpaqenpi pay uj may millay imata ruwanqa, chaytaj ajina kallanqapuni chhika millay ruwachej runa chinkachisqa kanankama, imaynatachus nisqaña karqa, ajinata.