Daniel (hebreo) 6 - DIOSPA QHELQACHISQ

Danielta leonkunaj t'oqonman wijch'uykunku

¹ 1 (2) Kuraj kamachej Darío Babiloniapi kamachiyta qallarishaspa, tukuynin suyuta 120 jap'iykunaman t'aqarqa, sapa jap'iymantaj uj kamachejta churarqa.

² 2 (3) Chay jap'iykunata kamachejkunata qhawanankupajtaj Darío kinsa waj kamachejkunata churarqa. Chay kinsa kamachejkuna qhawananku karqa tukuy ima kuraj kamachejpa munayninman jina kananpaj. Chay kinsa qhawajkunamantataj ujnenqa Daniel karqa.

³ 3 (4) Paytaj kinsantinmanta kuraj kaj karqa, aswan yachayniyoj kasqanrayku. Chayrayku kuraj kamachej yuyasharqa tukuy suyunpi Danielta kamachinanpaj churayta.

⁴ 4 (5) Chayrayku chay waj kurajkuna, jinallataj kamachejkunapis imallamantapis Danielta ch'ataykunankupaj mask'arqanku. Danielpitajrí mana ima mana allin kajtapis tarerqankuchu, allin puriyniyoj kasqanrayku, nillataj imamantapis payta ch'ataykuyta aterqankuchu.

⁵ 5 (6) Chaywanpis yachachinakuspa, nerqanku: Danielta mana imamantapis juchachayta atisunmanchu. Chaywanpis ichapis payta ch'ataykunapaj jina imatapis tarisunman Diosninpa kamachisqanta junt'asqanmanta, nispa.

⁶ 6 (7) Ajinata nispa, chay kurajkuna, kamachejkunawan ima parlanakorqanku, kuraj kamachej Darioman parlapayaj rinankupaj. Chantá ñawpaqenpi sayaspa, nerqanku: Jallalla jallalla, kuraj kamachejniyku, wiñaypaj kawsakuy.

⁷ 7 (8) Kay suyumanta tukuy kurajkuna, tukuy kamachejkuna, soldadokunata kamachejkuna ima tantakorqayku, chaypitaj yuyaychakorqayku qan kuraj kamachej jina ujta kamachinaykita. Kay jinata kamachiwaj: Kinsa chunka p'unchayta ama pipis imatapis mañakuchunchu ni mayqen diosmanta, nitaj runamantapis, manachayqa qanllamanta. Sichus pipis chay kamachisqata mana kasukonqa chayqa, maypichus leonkuna wisq'asqa kashanku, chayman wijch'uykusqa kachun, nispa kamachinki.

⁸ 8 (9) Chayrayku qan kamachejniyku, sutiykita chay kamachisqaman qhelqaykuy. Ajinamanta medokunaj, chantá persakunaj usunchejman jina, mana pipis kay kamachisqata yanqhayachiyta atenqachu, nispa.

⁹ 9 (10) Chantá kuraj kamachej Darío chay kamachisqaman sutinta qhelqaykorqa.

¹⁰ 10 (11) Danieltajrí chay kamachisqaman kuraj kamachej Darío sutinta qhelqaykusqanta yachaspa, wasinman riporqa. Chantá puñunan cuartonpa ventananta kicharerqa, mayqenchus Jerusalén ladoman qhawarisqa karqa, chayta. Chantá chaypi qonqorikorqa Dioswan parlarikunanpaj, paymantaj pachis ninanpaj ima. Ajinata sapa p'unchay kinsa kutita ruwarqa, yachasqa kasqanman jina.

¹¹ 11 (12) Jinapi Danielta chejnejkuna tantaykukuytawan, wasinman rerqanku, chaypitaj Danielta tariparqanku Diosninwan parlarikushajta, yanapananta mañakushajtataj.

¹² 12 (13) Chayrayku paykuna kuraj kamachejman rispa, chay kamachisqanmanta nerqanku: Kuraj kamachejniyku, qan kay jinata kamacherqanki: Sichus pipis kay kinsa chunka p'unchaypi waj diosmanta imatapis mañakunman, chayrí, qanmanta mañakunanta wajmanta mañakunman chayqa, leonkunaj t'oqonman wijch'uykusqa kananta, icharí? nispa. Kuraj kamachejtaj kuticherqa: Arí, ajina karqa. Chay kamachisqataj junt'akunanpuni tiyan, imaraykuchus medokunaj, persakunaj usunchejman jina manapuni pipis chayta yanqhayachiyta atinchu, nispa.

¹³ 13 (14) Jinapi paykunaqa kuraj kamachejta nerqanku: Judá suyumanta apamusqamanta ujnin, Daniel sutiyojqa mana jatunpaj qhawasunkichu nitaj kamachisqaykitapis kasunchu. Noqayku payta rikorqayku sapa p'unchay kinsa kutita Diosninmanta mañakushajta, nispa.

¹⁴ 14 (15) Chayta uyarispa, kuraj kamachej mayta llakikorqa. Chantá Danielta imaynamantapis kacharichiyta munaspa, inti yaykunankama atisqanta ruwarqa.

¹⁵ 15 (16) Chay runakunatajrí kuraj kamachejta muyuykuspa, nerqanku: Qan allinta yachanki, medokunaj, chantá persakunaj usunchejman jinaqa, kuraj kamachej ima kamachisqamanpis sutinta qhelqajtenqa, mana pipis yanqhayachiyta atisqanta, nispa.

¹⁶ 16 (17) Chantá kuraj kamachejqa Danielta pusachimuspa, kamacherqa leonkunaj t'oqonkuman wijch'uykunankuta. Chaywanpis manaraj payta wijch'uykushajtinku, kuraj kamachejqa Danielta nerqa: Pitachus tukuy sonqo kasuspa yupaychanki, chay Diosniyki leonkunamanta waqaychasuchun, nispa.

¹⁷ 17 (18) Chantá Daniel ñapis leonkunaj t'oqonkuman wijch'uykusqa kasqantawan, uj rumita apamorqanku, chaywantaj chay t'oqoj yaykunanta wisq'aykorqanku. Kuraj kamachejtaj sellonwan chay rumita sellarqa, jinallatataj tukuy kurajkunapis chayta sellallarqankutaj ama pipis Danielta chaymanta orqhonanpaj.

¹⁸ 18 (19) Kuraj kamachejtaj kamachinan wasiman ripuspa, mana mikhusqalla puñunanman siriykamorqa. Mana tocanakunawan payta kusirichinankuta munarqachu, nitaj tutantin puñuytapis aterqachu.

¹⁹ 19 (20) Sut'iyamushajtin, kuraj kamachej usqhayta sayarispa, leonkunaj t'oqonman rerqa.

²⁰ 20 (21) Chantá may llakisqa qayllaykuspa, Danielta wajyarqa: Daniel, kawsaj Diospa kamachin, pitachus tukuy sonqo kasuspa yupaychanki, chay Diosniyki leonkunamanta kacharichisuyta aterqachu? nispa.

²¹ 21 (22) Danieltaj kuticherqa: Jallalla jallalla, kuraj kamachejníy, wiñaypaj kawsay.

²² 22 (23) Arí, Diosniymin angelninta kachamorqa, paytaj leonkunaj siminkuta wisq'aykorqa, ama imananawankupaj. Ajinata Dios ruwarqa, imaraykuchus pay yachan mana juchayoj kasqayta, yachallantaj mana imatapis contraykipi ruwasqayta, nispa.

²³ 23 (24) Chantá kuraj kamachejqa mayta kusikuspa, leonkunaj t'oqomanta Danielta orqhomunankuta kamacherqa. Orqhomuspataj, paykuna rikorqanku Daniel mana imanasqa kasqanta, imaraykuchus pay Diosninpi atinikorqa.

²⁴ 24 (25) Chaymantataj kuraj kamachejqa kamacherqa Danielpa contranta ch'ataykoj runakunata apamunankuta, warminkunatawan, wawankunatawan ima. Chantá paykunata leonkunaj t'oqonman wijch'uykurarqanku. Manaraj pampaman chayashajtinkutaj, leonkuna phinkimuytawan, paykunata mitharaspa, tukuy tullunkunata p'akiykorqanku.

²⁵ 25 (26) Chantá kuraj kamachej Darío waj kamachisqata qhelqarqa, tukuy suyukunapi tiyakojkunaman, tukuy llajtakunaman, kay pachapi kaj imaymana parlayniyojkunaman ima kay jinata nichispa: Munani qankuna allin kawsaypi kawsakunaykichejta, tukuy imapitaj allin risunaykichejta.

²⁶ 26 (27) Kayta kamachini: Tukuynin suyuypi Danielpa Diosninta manchachikuychej, kharkatitispataj payllamantaj k'umuykuychej, imaraykuchus paymin kawsaj Diosqa. Payllapuni wiñaypaj wiñaynintinkama kawsan. Kamachiynenqa mana jayk'ajpis chinkarenqachu, nitaj atiyninpis tukukonqachu.

²⁷ 27 (28) Paymin qhespichej, kacharichejtaj. Payllataj janajpi jinallataj kay pachapipis runaj mana jayk'aj rikusqanta, chantá may t'ukuna imakunata ruwan. Paymin Danielta leonkunaj siminkumanta qhespicherqa, nispa.

²⁸ 28 (29) Chantá Daniel kamachejllapuni karqa, jinallataj allin rerqa kuraj kamachej Darío kamachishajtin, jinallataj Persiamanta kuraj kamachej Ciro kamachishajtinpis.