Daniel (hebreo) 5 - DIOSPA QHELQACHISQ

Perqapi qhelqasqa rikhurin

¹ Aswan qhepaman Babiloniapi Belsasarñataj kuraj kamachej kaspa, suyunmanta waranqa kurajkunata uj jatun raymiman wajyacherqa. Chantá kuraj kamachejqa wajyarisqa kurajkunawan khuska ashkha vinota ujyarqanku.

² Jinapi vinowan machasqa kaspa, kuraj kamachej Belsasar kamachinkunata kamacherqa qori vasokunata, qolqe metalmanta vasokunatawan apamunankuta, mayqenkunatachus tatan Nabucodonosor Jerusalenpi Tata Diospa Templonmanta apachimusqa, chaykunata. Pay munarqa raymipi kaj kurajkuna, warminkuna, chantá waj warminkuna ima chay vasokunapi vinota ujyanankuta.

³ Jinapi kuraj kamachej Belsasarpa kamachinkuna, mayqen vasokunatachus soldadokuna Jerusalén Templomanta unay suwasqanku, chay vasokunata apamorqanku. Chay vasokunapitaj vinota ujyarqanku kuraj kamachej, warminkuna, waj warminkuna, chantá pikunachus chay raymiman wajyasqa karqanku, chaykuna ima.

⁴ Ajinata vinota ujyashaspataj, paykuna machasqamanta lantinkukunata jatunchasharqanku, mayqenkunachus qorimanta, qolqe metalmanta, broncemanta, fierromanta, k'ullumanta, rumimanta ima ruwasqa karqanku, chaykunata.

⁵ Chaywanpis ujllata runaj makinman rijch'asqa rikhurimorqa, candeleroj ñawpaqenpitaj ruk'ananwan qhelqayta qallarerqa kamachina wasej yuraj perqanpi.

⁶ Kuraj kamachej Belsasartaj qhelqaj makita rikuytawan, sinch'ita manchachikorqa, jinataj chakinmanta umankama kharkatiterqa. Uyanpis q'elluman tukorqa.

⁷ Chantá qhaparispa, kamachinkunata kamacherqa yatirikunata, yachayniyojkunata, ch'askakunata qhawaspa watojkunata ima pusamunankuta. Paykuna jamojtinkutaj, Belsasar nerqa: Sichus pillapis jaqay qhelqasqata ñawiriyta atin, sitajchus imatachus niyta munasqanta sut'inchawayta atinman chayqa, p'achallichisqa kanqa sumaj puka p'achawan, kunkanmantaj qori cadena k'achanchanata churanqanku. Chantá suyuypi kinsa kaj kamachejmin kanqa, nispa.

⁸ Jinapi tukuy yachayniyojkunaqa kuraj kamachejpa wasinman yaykuspa, chay qhelqasqata qhawarqanku. Chaywanpis mana mayqenninkupis chay qhelqasqata ñawiriyta aterqankuchu, nitaj imatachus niyta munasqanta sut'inchaytapis.

⁹ Chantá kuraj kamachej Belsasar astawanpuni manchachikorqa, uyanpis astawan q'elluyarqa. Paywan kasharqanku, chay kurajkunataj mana yacharqankuchu imatachus ruwanankuta.

¹⁰ Jinapi kuraj kamachejpa mamanqa churin Belsasarpa qhaparisqanta, chantá kurajkunaj qhaparisqankutawan uyarispa, maypichus mikhusharqanku, chayman yaykorqa, nerqataj: Jallalla jallalla, kuraj kamachejníy, wiñaypaj kawsakuy. Ama llakikuychu, amataj uyaykipis jinatapuni q'elluyachunchu.

¹¹ Suyuykipi uj runa tiyan, paypitaj may llimphu dioskunaj espiritunku paypi tiyakun. Tatayki kamachishajtin, chay runa manchay uyarisqa karqa dioskuna jina sumaj yuyayniyoj, yachayniyoj ima kasqanrayku. Chayrayku tatayki Nabucodonosor chay runata churarqa tukuy suyupi tukuy yachaysapakunata, yatirikunata, sumaj yachajkunata, ch'askakunata qhawaspa watojkunata ima kamachinanpaj.

¹² Chay runaj sutin Daniel karqa, tataykirí payta Beltsasar sutiwan suticharqa. Payqa sumaj yachayniyoj, yuyayniyojtaj kaspa, mosqoykunata, watuykunata ima sut'inchayta atin, mana entiendey atinatapis sut'iman orqhoyta atillantaj. Chayrayku kamachejníy, Danielta wajyachiy, paytaj perqapi qhelqasqa imatachus niyta munasqanta sut'inchanqa, nispa.

Daniel perqapi qhelqasqata sut'inchan

¹³ Chantá Danielta kuraj kamachejpaman pusajtinku, Belsasar payta taporqa: Qanchu Daniel kanki, pitachus tatay Nabucodonosor kuraj kamachej kashaspa, Judá suyumanta apachimorqa, chaykunamanta ujnin kaj?

¹⁴ Dioskunaj espíritun qanwan kasqanta niwanku, sut'i yuyayniyoj, sumaj yachayniyojtaj kasqaykita.

¹⁵ Kamachiykuna tukuy suyumanta aswan yachayniyojkunata, yatirikunata ima kayman pusamorqanku, perqapi qhelqasqata ñawirinankupaj, imatachus niyta munasqantataj sut'inchanawankupaj. Chaywanpis paykuna chay qhelqasqa imatachus niyta munasqanta mana sut'inchayta atiwankuchu

¹⁶ Chaywanpis niwanku, qan mana yachay atina kajta sut'inchayta atisqaykita, mana allinchay atinatapis allinchaj kasqaykita. Kunanqa, sichus qan chay qhelqasqata ñawirinki, jinataj imatachus niyta munasqanta willawanki chayqa, sumaj puka p'achawan p'achallichisqayki, kunkaykimantaj qori cadenata churachisaj. Chantá suyuypi kinsa kaj kamachej kanki, nispa.

¹⁷ Chaywanpis Danielqa kuraj kamachejman kuticherqa: Imatachus qowayta munashanki, chayqa qanllapaj kachun, kamachinayki wasipi churanawaykimantataj wajta churay. Noqarí chay qhelqasqata ñawiripusqayki, imatachus niyta munasqantapis sut'inchallasajtaj.

¹⁸ Kuraj kamachej Belsasar, Patapi Kaj Diosqa tatayki Nabucodonosorman kay suyuta, jatun atiyta, jatunpaj qhawasqa kayta ima qorqa.

¹⁹ Dios payman atiyta qosqanrayku, tukuy ayllumanta kajkuna, waj suyukunamanta kajkuna, tukuy imaymana parlayniyoj runakunapis payman k'umuykorqanku, ñawpaqenpitaj kharkatiterqanku. Paytaj munasqanman jina pitapis kawsajta saqej, manachayrí wañuchichej. Wakinkunata jatuncharqa, wakinkunatatajrí k'umuykucherqa.

²⁰ Chaywanpis tatayki sonqonpi jatunchakusqanrayku, runaykachaspa k'ullu kasqanraykutaj, Tata Diosqa paymanta kamachej kayninta, jinataj jatunpaj qhawasqa kaynintawan qhechorqa.

²¹ Runakuna chawpimanta qharqosqa karqa. Yuyayninpis uywaj yuyayninman jina tukorqa, k'ita burrokunawan khuskataj kawsarqa. Buey jina qhorata mikhorqa, chhullataj payta joq'orqa. Ajina karqa rimarinankama: Patapi Kaj Diosllamin tukuy atiyniyoj tukuy suyukunata kamachinanpaj. Jinallataj payllamin pitachus munasqanta churan runakunata kamachinanpaj, nispa.

²² Qantajrí, kuraj kamachej Belsasar, Nabucodonosorpa churin kashaspa, tataykiwan imachus kasqanta yacharqanki. Chaywanpis mana k'umuykorqankichu.

²³ Aswanqa janaj pachapi kaj Tukuyta Kamachej Diospa contranpi oqharikorqanki, kamacherqankitaj Templonmanta apamusqa vasokunata orqhomunankuta. Chantá chay vasokunapi warmiykikunawan, chantá waj warmiykikunawan, jinataj pikunatachus raymiman wajyarakorqanki, chaykunawan khuska vinota ujyarqankichej. Chay jawataj waj dioskunata, qorimanta, qolqe metalmanta, broncemanta, fierromanta, k'ullumanta, rumimanta ruwasqa dioskunata yupaycharqanki. Chay dioskunaqa mana rikunkuchu, manataj uyarinkuchu, nitaj imatapis yachankuchu. Diostatajrí mana jayk'ajpis yupaycharqankichu, pejpa makinpichus kawsayniyki, tukuy ruwasqayki ima kashan, chay Diosta.

²⁴ Chayrayku payqa qhelqananpaj chay makita rikhurichimorqa.

²⁵ Chay qhelqasqa nin: MENE, MENE, TEKEL, PARSIN, nispa.

²⁶ Chay qhelqasqa imatachus niyta munasqantaj kay jina: MENE niyta munan: Diosqa kuraj kamachej kanayki p'unchaykunata yupaspa, mayk'ajchus tukukunanta nin.

²⁷ TEKEL niyta munan: Balanzapi tupusqa kasqanki, manataj pesoman wakerqankichu, nispa.

²⁸ PARSIN niyta munan: Suyuyki t'aqanasqa kanqa, jinataj medokunaman, chantá persakunaman jaywasqa kanqa, nispa.

²⁹ Chaymanta kuraj kamachej Belsasar kamacherqa Danielman puka p'achata churaykunankuta, kunkanmantaj qori k'achanchanata churanankuta. Chantá tukuyman willaracherqa suyupi Daniel kinsa kaj kamachej kananta.

³⁰ Chaywanpis chay ch'isinpacha caldeokunaj kuraj kamachejninku Belsasar wañuchisqa karqa.

³¹ 31 (6.1)Ajinamantataj Media suyumanta kuraj kamachej Darío sutiyoj chay suyuta jap'erqa. Darío chaypacha sojta chunka iskayniyoj watayoj karqa.