Daniel (hebreo) 4 - DIOSPA QHELQACHISQ

Kuraj kamachej Nabucodonosor locoyapun

¹ 1 (3.31) Kuraj kamachej Nabucodonosor uj cartata qhelqachispa, tukuynin kamachisqan suyukunaman apacherqa. Kay jinata chay cartapi willarqa: Noqa kuraj kamachej Nabucodonosor tukuy suyukunapi tiyakojkunata napaykuykichej: Qankunapaj allin kawsay kachun, nispa.

² 2 (3.32) Munani qankuna yachanaykichejta kay chhika t'ukuna imakunata Patapi Kaj Dios noqawan ruwasqanta.

³ 3 (3.33) Paypa ruwasqanqa manchay t'ukuna, may jatuntaj. Kamachisqanpis wiñay wiñaypaj kanqa, manapunitaj tukukonqachu.

⁴ 4 (1) Noqa Nabucodonosor kamachinay wasipi mana imamanta llakiyniyoj tiyakusharqani, tukuy imapipis allin rishawarqa.

⁵ 5 (2) Chaywanpis uj ch'isi puñushajtiy, mosqokusqay mancharichiwarqa, jinallataj imaymana yuyaykuna, rikuykunataj musphachiwarqa.

⁶ 6 (3) Chantá kamacherqani Babiloniapi kaj tukuynin yachayniyoj runakuna jamuspa, sut'inchanawankuta mosqokusqay imatachus niyta munasqanta.

⁷ 7 (4) Jinapi tukuy Babilonia suyumanta tukuy yatirikuna, yachayniyoj kajkuna, jinallataj ch'askakunata qhawaspa watojkunapis jamorqanku, noqataj mosqokusqayta paykunaman willarqani. Chaywanpis paykuna mosqokusqay imatachus niyta munasqanta mana sut'inchayta aterqankuchu.

⁸ 8 (5) Chantá chay qhepata, pichus diosniy Beltsasarpa sutinwan sutichasqa karqa, chay Daniel jamuwarqa. Paypeqa Tata Diospa Espíritun tiyakun, noqataj mosqokusqayta payman kay jinata willarqani:

⁹ 9 (6) Yachayniyojkunaj kurajnin Beltsasar, noqa yachani Tata Diospa Espíritun qanpi tiyakusqanta, tukuy pakasqa kajmantataj yachasqaykita. Kunantaj noqa willasqayki imatachus mosqokusqaypi rikorqani chayta, chantataj qan imatachus niyta munasqanta sut'inchaway.

¹⁰ 10 (7) Puñunaypi kashaspa, kay jinata mosqokorqani: Jallp'api uj jatun sach'a kasqa.

¹¹ 11 (8) Chay sach'aqa wiñaspa, manchayta rakhuyasqa, uma puntantaj janajkama chayasqa, tukuy kay pachapi runakunataj chayta rikusqanku.

¹² 12 (9) Laqhenqa may k'achitu kasqa, poqoynintaj may ashkha kasqa. Poqoyninmanta tukuy mikhusqanku. K'ita animalkunapis llanthunpi llanthurikoj kasqanku. Thansanpi p'isqokunapis thapachakoj kasqanku. Kay pachapi tukuy kawsajpis chay sach'aj poqoyninwan kawsaj kasqanku.

¹³ 13 (10) Ajinata mosqokushaspa, kaymanta jinalla uj angelta rikorqani janaj pachamanta urayk'amojta.

¹⁴ 14 (11) Chantá jatunmanta qhaparispa, nisqa: Chay sach'ataqa urmachiychej, thansantapis k'utuychej. Laqhentapis p'itiychej, poqoynintataj qhallirpariychej. Llanthunpi kashaj uywakunapis ayqechunku, thansanpi chukoj p'isqokunapis.

¹⁵ 15 (12) Chaywanpis k'ullunta, saphintawan jallp'api saqeychej. Fierro cadenawan, bronce cadenawan ima wataykuspa, qhora chawpipi saqeychej. Chhullaykamuchun patanman, k'ita animalkunawan khuskataj campopi qhorata mikhuspa kawsachun.

¹⁶ 16 (13) Yuyaynin waj jinaman tijrakuspa, uywaj yuyayninman jina tukuchun, ajinatataj qanchis wata junt'a kachun.

¹⁷ 17 (14) Diospa angelninkuna ajina kananta kamachinku, tukuy runakuna yachanankupaj janaj pachapi kaj Tata Dios tukuy suyukunata kamachinanpaj atiyniyoj kasqanta. Yachallachunkutaj paymin kamachina atiyta qosqanta, pimanchus qoyta munasqanman, jinallataj uj suyupi kuraj kaj kananpaj churasqanta aswan pisipaj qhawasqa runata, nispa.

¹⁸ 18 (15) Ajinata noqa kuraj kamachej Nabucodonosor mosqokusqaypi rikorqani. Kunantaj, Beltsasar, niway mosqokusqay imatachus niyta munasqanta, imaraykuchus tukuy suyuypi kaj yachayniyojkunamanta ni ujpis sut'inchawayta aterqachu. Qanrí atiwaj sut'inchawayta, imaraykuchus Tata Diospa Espíritun qanpi kashan, nispa.

Danielqa Nabucodonosorpa mosqokusqanta sut'inchan

¹⁹ 19 (16) Chantá Beltsasar sutiwan sutichasqa Daniel t'ukushaj qhepakorqa, tukuy imaymana yuyaykuna umanman jamojtintaj, mayta mancharikorqa. Noqa Nabucodonosortajrí, payta nerqani: Beltsasar, mosqokusqay imatachus niyta munasqanmanta ama manchariychu, nispa. Chantá Beltsasar kutichispa, niwarqa: Ay wiraqochíy, mosqokusqayki imatachus niyta munasqanqa qanta chejnisojkunapaj kachun.

²⁰ 20 (17) Qan kamachejníy, rikorqanki jatun sach'ata, janaj pachakama uma puntan chayashajta, karumantapachataj rikukushajta.

²¹ 21 (18) May k'acha laqheyoj kasqa, poqoyninmantataj tukuy mikhusqanku. Llanthunmanpis k'ita animalkuna llanthukoj jamoj kasqanku, thansanpitaj p'isqokuna thapachakoj kasqanku, icharí?

²² 22 (19) Wiraqochi kamachejníy, qanmin chay sach'a kanki. Kuraj kamachej kasqaykipi wiñaspa jatunyasqaykeqa janajkama chayan, kamachisqaykitaj kay pachapi uj kantumanta ujnin kantukama junt'aykun.

²³ 23 (20) Kamachejníy, rikullarqankitaj janaj pachamanta uj angelta urayk'amojta, uyarerqankitaj nejta: Kay sach'ata urmachiychej, llant'arpaychejtaj. Chaywanpis k'ullunta, saphinllatawan jallp'api saqespa, wataykuychej fierro cadenawan, bronce cadenawan ima. Qhora chawpipi saqeychej. Chantá patanman chhulla urmachun, uywakunawan khuskataj qanchis wata junt'ata qhorata mikhuchispa kawsachun, nispa.

²⁴ 24 (21) Kamachejníy, kaymin mosqokusqaykej sut'inchaynenqa, imatachus Patapi Kaj Dios contraykipi nisqan.

²⁵ 25 (22) Aswan qhepaman qanqa runakuna chawpimanta qharqosqa kanki, uywakunawantaj kawsanki. Waka jina qhorata mikhunki, chhullapis ukhuykita joq'osonqa. Ajinata kawsanki qanchis wata junt'ata, qan ninaykikama: Janaj pachapi kaj Diosmin kay pachapi kaj tukuy suyuta kamachin, paytaj pitachus munasqanta kamachinanpaj churan, nispa.

²⁶ 26 (23) Chaywanpis sach'aj k'ullunta, saphintawan saqenapaj kamachisqaqa niyta munan kuraj kamachej kayniykeqa kutimpusunanta, maypachachus ninki: Diosllamin atiyniyoj, nispa, chaypacha.

²⁷ 27 (24) Chayrayku kamachejníy, yuyaychasqayta kasuway: Kamachej jina cheqanta ruway, amataj astawan juchalliychu. Mana allin kajta ruwayta saqespa, wajcha runakunamanta khuyakuy. Ichapis ajinamanta astawan unayta mana ima llakiyniyoj kawsakunki, tukuy imapipis allillan risonqa, nispa.

²⁸ 28 (25) Chaywanpis imatachus Daniel sut'inchasqa kuraj kamachej Nabucodonosormanta, chay tukuy junt'akorqa.

²⁹ 29 (26) Chaymanta uj wataman, kuraj kamachej Babilonia llajtapi kamachinan wasipi puriykachashaspa,

³⁰ 30 (27) nerqa: Qhawariychej, imayna jatunchus Babilonia llajta kasqanta. Noqamin chayta jatun atiyniywan sayaricherqani suyuypa jatun llajtan kananpaj, ajinamanta atiyniyoj kasqayta tukuy yachanankupaj, nispa.

³¹ 31 (28) Chay jinata kuraj kamachej parlashajtillanraj, janaj pachamanta kay jinata parlamojta uyarerqa: Kuraj kamachej Nabucodonosor, kayta uyariy: Kamachiyniykeqa manaña qanpatachu.

³² 32 (29) Aswanpis qan runakuna chawpimanta qharqosqa kanki, k'ita animalkunawantaj kawsanki. Buey jina qhorata mikhunki, qanchis wata junt'atataj ajina kanki ninaykikama: Janaj pachapi kaj Diosllamin atiyniyoj kay pachapi tukuy suyukunaj patankupi kamachinanpaj, payllataj munasqanman jina kamachejkunata churan, nispa.

³³ 33 (30) Chantá chaypachapacha Nabucodonosorpa contranpi willay junt'akorqa. Jinataj Nabucodonosor locoyapusqanrayku payta runa chawpimanta qharqorqanku. Chaymantapacha pay buey jina qhorata mikhorqa, chhullataj ukhunta joq'orqa. Chujchanpis phuru jina karqa, sillunpis ankajpata jina kanankama wiñaykorqa.

Nabucodonosorqa Tata Diosta yupaychan

³⁴ 34 (31) Qanchis wata junt'akojtin, noqa Nabucodonosor janaj pachata qhawarerqani, loco kayniymantataj yuyayniyman kutiripusqayta reparakorqani. Chaypacha janaj pachapi kaj Diosta yupaycharqani, kay jinatataj Wiñaypaj Kawsajta jatuncharqani: Paypa atiynenqa wiñaypaj, suyukunata kamachiyninpis tukuy mit'apaj.

³⁵ 35 (32) Paypa ñawpaqenpi kay pachapi tiyakoj runakuna manakaj jinalla kanchej. Payqa munayninman jina ruwan janaj pachapi, jinallataj kay pachapipis. Manataj pipis Diospa atiyninman sayaykojqa kanchu, manallataj pipis payta tapurej kanchu: Imarayku kay jinata ruwankiri? nispa.

³⁶ 36 (33) Chantá chaypachapacha yuyayniyman kutirerqani. Jinataj noqa watej jatunpaj qhawasqa karqani, jinallataj watej kamachiyta qallarerqani. Kamachinaypaj yuyaychawajkuna, yanapawajkuna ima mask'allawarqankutaj kamachinayman kutichinawankupaj. Chaymantataj aswan jatunchasqa karqani ñawpajmanta nisqaqa.

³⁷ 37 (34) Chayrayku noqa Nabucodonosorqa janaj pachapi Kuraj Kamachej Diosta yupaychani. Sutinta pataman oqharini, jatunchanitaj, imaraykuchus tukuy ruwasqanqa cheqapuni, cheqantaj. Chantá pay jatunchakojkunatapis k'umuykuchiyta atillantaj.