Daniel (hebreo) 2 - DIOSPA QHELQACHISQ

Nabucodonosor mosqokun

¹ Nabucodonosor iskay watataña kamachishaspa, imaymana mosqoykunata mosqokorqa. Chayrayku pay mosqokusqanpi yuyaspa, puñuytapis mana aterqachu.

² Chantá pay yachayniyojkunata, watojkunata, layqakunata, ch'askakunata qhawaspa watojkunatawan wajyacherqa, mosqokusqanta sut'inchanankupaj. Paykunataj kuraj kamachejpa ñawpaqenman rerqanku.

³ Chantá kuraj kamachej paykunata nerqa: Ujta mosqokuni, chaymantataj mayta phutikushani, imaraykuchus mayta munani yachayta mosqokusqay imatachus niyta munasqanta, nispa.

⁴ Chantá yachayniyoj runakuna arameo parlaypi kuraj kamachejta nerqanku: Jallalla jallalla, kuraj kamachejniyku, wiñaypaj kawsay. Mosqokusqaykita willawayku, noqaykutaj sut'inchasqayku imatachus niyta munasqanta, nispa.

⁵ Kuraj kamachejtajrí kuticherqa: Imatachus mosqokusqayta qonqarparini. Chaywanpis sichus qankuna mana willawankichejchu imatachus mosqokusqayta, imatatajchus chay mosqokusqay niyta munasqanta chayqa, kayta allinta yachaychej: Qankunata wañuchichisqaykichej, jinataj kamachisaj wasiykichejtapis q'opa wijch'unaman tukuchinankuta.

⁶ Chaywanpis sichus niwankichej imatachus mosqokusqayta, chantá imatatajchus niyta munasqanta sut'inchawankichej chayqa, t'inkachisqaykichej, yanapasqaykichej ima, chantá jatunchasqaykichej. Ajina ari, niwaychej imatachus mosqokusqayta, chaymantataj imatachus niyta munasqantapis sut'inchawaychej, nispa.

⁷ Yachayniyojkunarí ujtawan nerqanku: Kuraj kamachejniyku, willariwayku ari imatachus mosqokusqaykita, noqaykutaj imatachus niyta munasqanta sut'inchasqayku, nispa.

⁸ Kuraj kamachejtajrí kuticherqa: Noqa yachani qankunaqa tiempollata pasachiyta munashasqaykichejta, imaraykuchus yachankichej nisqayta junt'anaytapuni.

⁹ Noqa nerqaykichej: Manachus mosqokusqayta willawankichej chayqa, tukuyniykichej wañuchisqa kankichej. Qankunarí yachachinakushankichej llullakuspalla manakajta kutichinawaykichejpaj, ajinamanta tiempota pasachispa. Kunanqa qankuna niwaychej imatachus mosqokusqayta. Chaytachus willawankichej chayqa, yachasaj imatachus niyta munasqanta sut'inchawayta atisqaykichejta, nispa.

¹⁰ Jinapi chay yachayniyoj runakuna kutichispa, nerqanku: Kay pachapi mana pipis atinmanchu mosqokusqaykita willasuyta. Chantá mana jayk'ajpis mayqen kuraj kamachejpa may atiyniyoj kaspapis kayman rijch'akojta mañarqachu aysirimanta nitaj yatirimantapis nillataj yachayniyojkunamantapis.

¹¹ Kuraj kamachejniyku, mañasqaykeqa manapuni sut'inchayta atinapaj jinachu. Mana pi runapis kanchu wajpa mosqokusqanta willayta atejqa. Dioskunalla chayta niyta atinkuman. Paykunatajrí mana runawanchu tiyakunku, nispa.

¹² Chayta uyarispa, kuraj kamachej Nabucodonosorqa manchayta phiñakorqa, jinataj soldadonkunata kamacherqa Babiloniapi kaj tukuy yachayniyojkunata wañurachinankuta.

¹³ Chantá kuraj kamachej tukuy yachayniyojkuna wañuchisqa kanankuta kamachejtin, soldadokuna Danielta, paywan kajkunatawan mask'allarqankutaj, paykunatapis wañuchinankupaj.

¹⁴ Jinapi kuraj kamachejta qhawaj soldadokunaj kamachejnin Arioc llojserqa Babiloniapi yachajkunata wañuchichinanpaj. Danielpaman chayajtinrí, Daniel sumaj yuyaywan paywan parlarqa, mana wajkuna uyarishajtinku.

¹⁵ Chantá Daniel payta taporqa: Kuraj kamachej kayta kamachinanpaj imataj tiyanri? nispa. Arioctaj Danielman sut'inta willarqa imajtinchus jina kasqanta.

¹⁶ Chantá Danielqa kuraj kamachejwan parlaj rispa, mañarikorqa pay uj chhikanta suyarinanta Danielqa paypa mosqokusqan imatachus niyta munasqanta sut'inchananpaj.

¹⁷ Chaymantataj Daniel wasinman kutipuspa, Jananiasman, Misaelman, Azariasman ima chaymanta willarqa.

¹⁸ Nillarqataj paykuna janaj pachapi kaj Dios yanapananta mañakunankuta Daniel kuraj kamachejpa mosqokusqanta sut'inchananpaj, ajinamanta ama paykunapis Babiloniapi kaj yachayniyojkunawan khuska wañurachisqa kanankupaj.

¹⁹ Chay tutapeqa Tata Dios mosqoypi jina Danielman parlaspa, rikucherqa imatachus kuraj kamachej mosqokusqanta. Jinallatataj pay sut'incharqa imatachus kuraj kamachejpa mosqokusqanta niyta munasqanta. Chayrayku Danielqa janaj pachapi kaj Diosta yupaycharqa:

²⁰ Pay nerqa: Diospa sutenqa wiñay wiñaypaj yupaychasqa kachun, imaraykuchus yachayniyoj kaypis, tukuy atiypis paymantamin jamun.

²¹ Paymin imachus kay pachapi kananta munayninman jina apaykachan. Kuraj kamachejkunata churantaj, orqhontaj. Paymin yachayniyojkunaman yachayta qon, tukuy imata yachajkunamanpis astawan yachayta qon.

²² Diosqa pakasqa kajta sut'inchan, mana yachay atina kajtapis. Paymin imachus laqhayaypi kajtapis rejsin. Payqa k'anchaymin.

²³ Ñawpa tataykunaj Diosnin, qanman pachis niyki, yupaychaykitaj, imaraykuchus qan yachayta, kallpatawan qowanki. Kunantaj imatachus mañakorqayku, chayta qan sut'ita rikuchiwanki, imaraykuchus kuraj kamachejpa mosqokusqanta sut'inchawanki, nispa.

Daniel kuraj kamachejpa mosqokusqanta sut'inchan

²⁴ Kuraj kamachejqa Ariocta kamachisqa Babiloniapi kaj yachayniyojkunata wañurachinanta. Danieltajrí Ariocta watukoj rispa, nerqa: Yachayniyojkunata ama wañurachiychu. Aswanpis kuraj kamachejman pusaway, noqataj imatachus mosqokusqanta sut'inchasaj, nispa.

²⁵ Chaypacha Ariocqa Danielta Nabucodonosorpa ñawpaqenman pusarqa, nerqataj: Judamanta apamusqa ukhupi uj runata tarini, paytaj mosqokusqaykita chantá imatachus niyta munasqantawan sut'inchasonqa, nispa.

²⁶ Jinapi Daniel, pitachus babiloniokuna Beltsasar sutiwan sutichasqanku, chayqa kuraj kamachejpa ñawpaqenpi sayashajtin, kuraj kamachej payta nerqa: Atiwajchu niwayta imatachus mosqokusqayta, chay mosqoyniytaj imatachus niyta munasqanta? nispa.

²⁷ Danieltaj kuticherqa: Mana mayqen yachayniyoj runapis, nitaj yatiripis, nitaj yachajpis, nillataj ch'askata qhawaspa watojpis atinmanchu chay pakasqa yachayta willasuyta.

²⁸ Chaywanpis janaj pachapi uj Dios tiyan, pichus pakaypi kaj tukuy imata sut'ita rikuchin, chay. Paymin qan kuraj kamachej Nabucodonosorman sut'ita rikuchisorqa jamoj p'unchaykunapi imachus kananmanta. Kunantaj imatachus puñushaspa mosqokusqaykita noqa willasqayki:

²⁹ Kuraj kamachejníy, puñunaykipi kashaspa, qhepanejman imachus kananmanta unancharisharqanki. Jinapi pakasqa kajta sut'inchaj Dios imachus qhepaman kananta rikuchisorqa.

³⁰ Noqamanpis chay pakasqa yachayta Dios sut'inchawarqa, mana tukuy runamanta astawan yachayniyoj kasqayraykuchu. Manachayqa Dios munan yachanaykita mosqoyniyki imatachus niyta munasqanta, ajinamanta sonqoykipi yuyaychakusqaykita yachanaykipaj.

³¹ Kamachejníy, mosqokushaspa uj may jatun lliphipishaj lantita rikusqanki. Chay lanteqa mancharinapaj jina kasqa, ñawpaqeykipitaj sayashasqa.

³² Lantej umanqa qorimanta kasqa. Qhasqonwan, makinkunawantaj qolqe metalmanta kasqanku. Wijsanwan, rakhu piernanwantaj broncemanta kasqanku.

³³ Chantá t'usunkunaqa fierromanta kasqanku. Chakinkunataj khuskan fierromanta, khuskantaj t'urumanta kasqa.

³⁴ Chantá qhawashajtillayki, orqomanta ni pejpa kachaykamusqallan uj rumi urmamusqa, jinataj chay lantej chakinpi jap'ispa, lantita phirirparisqa.

³⁵ Chantá ujllata fierropis, t'urupis, broncepis, qolqe metalpis, qoripis ima ñut'u jallp'a jina rikhurisqa. Jinataj imaynatachus trigota wayrajtinchej wayraqa pajata apakapun, ajinata wayraqa chay tukuyta oqharisqa mana imata puchuchispa. Lantita phiriykusqa, chay rumitajrí jatun orqoman tukusqa, tukuy kay pachamantaj junt'aykusqa.

³⁶ Mosqokusqaykeqa ajina kasqa. Kunantaj imatachus niyta munasqanta sut'inchasqayki.

³⁷ Kamachejníy, qan tukuynin kuraj kamachejkunamanta aswan atiyniyoj kanki, imaraykuchus janaj pachapi kaj Diosmin kamachinata, atiyta, kallpata ima qorqasunki jatunchasqa kanaykipaj.

³⁸ Payllataj qanta churasorqa kay pachapi kaj chhika runakunata kamachinaykipaj. Chantapis uywakunata, p'isqokunata ima qanpa makiykiman churan. Chayrayku chay lantej qorimanta umanqa qan kanki.

³⁹ Qanpa qhepaykita qanmanta aswan pisi atiyniyoj suyu jatarimonqa. Chaypa qhepantataj bronce jina kinsa kaj jatun suyu jatarimonqa, chaytaj tukuy kay pachata kamachenqa.

⁴⁰ Chay qhepantataj tawa kaj jatun suyu fierro jina sinch'i kanqa. Jinataj imaynatachus fierro tukuy imata p'akin, ñut'untaj, ajinata tukuy waj suyukunata jap'ispa chinkachenqa.

⁴¹ Kamachejníy, chay lantej chakinpi, jinataj ruk'ananpipis rikorqanki khuskan fierromanta, khuskantaj t'urumanta kasqanta, icharí? Chay niyta munan qhepa kaj suyoqa t'aqanasqa kananta. Wakenqa fierro jina sinch'i kanqa, imaynatachus fierrowan t'uruwan chajrusqata rikorqanki, ajina.

⁴² Chay lantej chaki ruk'anankunaqa wakin karqa fierromanta, wakintaj t'urumanta. Chaytaj niyta munan chay suyoqa wakinnejpi sinch'i kananta, wakinnejpitaj pisi kallpa kananta.

⁴³ Imaynatachus fierrowan t'uruwan chajrusqata rikorqanki, kikinta chaypacha suyukunata kamachejkunaqa casaraspa aylluchakuyta munanqanku, suyunkukuna chaynejta aswan kallpachasqa kanankupaj. Chaywanpis mana sumaj ujchasqachu kanqanku, imaynatachus fierrowan t'uruwan mana chajrukuyta atinkuchu, ajinata.

⁴⁴ Chay kuraj kamachejkuna kamachishajtinku, janaj pachapi kaj Tata Dios mana jayk'aj chinkachisqa kanan kamachiyninta sayarichenqa, manataj mayqen suyupis payta atipanqachu. Astawanpis payqa tukuynin waj suyukunata tukuchenqa, paypa suyuntaj wiñaypaj sayanqa.

⁴⁵ Chantá qan kamachejníy, mana pejpa tanqarimusqallan rumita orqomanta choqakamojta rikorqanki, mayqenchus fierrota, bronceta, t'uruta, qolqe metalta, qoritapis ñut'u jallp'aman tukuchisqa, chay, icharí? Chaymin tukuyta atipaj chay suyu karqa. Ajinamanta Tukuy Atiyniyoj Tata Diosqa qhepanejman imachus kananmanta qanman rikuchisunki. Mosqokusqaykeqa cheqamin, sut'inchayninpis cheqallataj, nispa.

⁴⁶ Chantá kuraj kamachej Nabucodonosor Danielpa ñawpaqenman pampakama k'umuykukorqa. Jinaspataj, kamacherqa uywa ñak'asqa q'olachinata Danielman jaywanankuta, inciensotataj payman q'oshñichinankuta.

⁴⁷ Chantá Danielta nerqa: Cheqapuni Diosniykichejqa tukuy dioskunaj Tukuyta Kamachej Diosnin, tukuy kamachejkunaj kuraj kamachejninkutaj, tukuy pakaypi kajta sut'inchaj ima, imaraykuchus qan pakasqa kajta sut'inchayta aterqanki, nispa.

⁴⁸ Chaymanta kuraj kamachejqa Danielta jatuncharqa, sumaj t'inkatataj payman qorqa. Chantá payta Babilonia nisqa jap'iyta kamachinanpaj churarqa, jinallataj tukuy yachayniyojkunaj kurajninku kananpaj ima.

⁴⁹ Jinallatataj Danielpa mañakusqanman jina kuraj kamachejqa Sadracta, Mesacta, Abednegotawan churallarqataj Babilonia jap'iymanta cargoyoj kanankupaj. Danieltajrí kuraj kamachejpa ñawpaqenpi karqa kamachejpa yuyaychajnin jina.