Daniel (hebreo) 1 - DIOSPA QHELQACHISQ

Danielwan, kawsaqenkunawan ima Babiloniapi

¹ Judá suyupi kinsa watataña Joacín kamachishajtin, Babiloniata kuraj kamachej Nabucodonosor Jerusalenman chayamorqa. Jinaspataj, soldadonkunawan llajtata jap'inanpaj muyuykorqa.

² Chantá Tukuyta Kamachej Dios nerqa Nabucodonosor Judá suyuta kuraj kamachej Joacinta jap'inanta, jinataj Diospa Templonpi kaj imakunamanta wakinta apakapunanta. Nabucodonosortaj Diospa Templonmanta imakunata Babiloniaman apaspa, lantinta yupaychana wasipi, lantinpa tiyapuyninta waqaychana wasiman churarqa.

³ Chantá Nabucodonosor kamachinkunamanta kurajnin Aspenazta kamacherqa Judata kuraj kamachejpa ayllunmanta, chantá aswan sumachaj runakunamanta ima

⁴ allin rijch'ayniyoj waynakunata ajllananta. Paykunaqa mana imanku imanasqa, tukuy imapi sumaj yachayniyoj, allin yuyayniyoj ima kananku karqa, Babiloniata kuraj kamachejpa kamachinan wasipi ruwanaman churasqa kanankupaj jina. Chantá Aspenazqa Caldeamanta runakunaj yachayninkuta, parlayninkuta ima paykunaman yachachinan karqa.

⁵ Jinallataj kuraj kamachej Nabucodonosor kamacherqa kamachinkuna chay waynakunaman sapa p'unchay mikhunata, vinotawan jaywanankuta, paypaj wakichisqa karqa, chay mikhunamanta. Kamachillarqataj kinsa wata junt'ata paykunaman yachachinankuta, chaymantataj kuraj kamachejta yanapanankupaj paykunata churanankuta.

⁶ Jinapi Judá jatun ayllumanta tawa waynakunata ajllarqanku: Danielta, Jananiasta, Misaelta, Azariasta ima.

⁷ Kamachina wasipi kamachikunaj kurajninkutaj paykunata waj sutiwan suticharqa: Danielta Beltsasar nispa, Jananiasta Sadrac nispa, Misaelta Mesac nispa, Azariastataj Abednego nispa.

⁸ Chaywanpis Daniel sonqonpi nerqa kuraj kamachejpa mikhunanmanta, ujyananmanta ima mana imatapis jap'ikunanta ama Diospa ñawpaqenpi ch'ichichasqa kananpaj. Chayrayku Danielqa kamachina wasipi kamachikunaj kurajninkuta nerqa: Ama ch'ichipaj qhawasqa kanaypaj kuraj kamachejpa mikhunanmanta ama mana munajta mikhuchiwaychejchu, nispa.

⁹ Diostaj kamachikunaj kurajninkoj sonqonta kuyucherqa, Danielta allinpaj qhawananpaj.

¹⁰ Chaywanpis Aspenazqa Danielta nerqa: Noqaqa wiraqochiy kuraj kamachejta manchachikuni, imaraykuchus pay niwarqa mikhunanmanta qankuna mikhunaykichejta, ujyananmantataj ujyanaykichejta. Sichus kay ujkuna waynakunamanta aswan tulluyasqata pay rikusonqachej chayqa, kuraj kamachej noqata wañuchichiwanqa. Jinataj qankunamin chaymanta juchayoj kawajchej, nispa.

¹¹ Chantá Daniel mayordomowanñataj parlarqa, pitachus kamachina wasipi kamachikunaj kurajninku churasqa Danielta, Jananiasta, Misaelta, Azariastawan qhawananpaj, chaywan. Jinataj payta nerqa:

¹² Kayta mañarikuyki: Imaynachus kasqaykuta rikunaykipaj, chunka p'unchay junt'ata q'omerkunallata qowayku mikhunaykupaj, ujyanaykupajtaj yakullata qowayku.

¹³ Chantá chunka p'unchay pasajtin, noqaykuta allinta qhawawasqayku. Kuraj kamachejpa mikhunanmanta mikhonqanku, chay waynakunatapis qhawallankitaj. Chaymanta noqaykuwan qhawarisqaykiman jina ruwayta atinki, nispa.

¹⁴ Mayordomoqa Danielta uyarerqa. Jinataj chunka p'unchay junt'ata paykunaman q'omerkunallata mikhucherqa.

¹⁵ Chunka p'unchayninmantaj paykuna, aswan allin rijch'ayniyoj, aswan kallpasapataj karqanku, pikunachus kuraj kamachejpa mikhunanmanta mikhorqanku, chay waynakunamanta nisqaqa.

¹⁶ Ajinata ari, mayordomoqa kuraj kamachejpa mikhunanmanta mikhunanku karqa, chay mikhunata, vinota ima apakaporqa. Chantá q'omerkunallata, yakullatawan paykunaman jaywarqa.

¹⁷ Chantá Diosqa chay tawa waynakunaman sumaj yachayta, yuyayniyoj kayta ima qorqa, imaymana qhelqakunata rejsinankupaj chantá entiendenankupaj ima. Chantapis Diosqa Danielman yachayta qollarqataj mosqoypi jina rikuykunata, mosqoykunatapis sut'inchananpaj.

¹⁸ Jinapi kuraj kamachej Nabucodonosorpa nisqan p'unchay chayamorqa chay waynakuna ñawpaqenpi rikhurinankupaj. Chantá kamachikunaj kurajninku Aspenazqa paykunata Nabucodonosorman pusarqa.

¹⁹ Kuraj kamachejtaj tukuynin waynakunawan parlaspa, repararqa tukuynin waynakuna ukhupi mana ujllapis kasqanta Daniel, Jananías, Misael, Azarías jina yachayniyoj. Chayrayku kuraj kamachejqa paykunata ajllarqa yuyaychajninkuna kanankupaj.

²⁰ Kuraj kamachej tukuy imaymana yachaymanta paykunata tapojtin, chay tawantin waynakuna astawan yachayniyoj karqanku kuraj kamachejpa chay waj yachaysapa runankunamanta, chantá yatirinkunamanta nisqaqa.

²¹ Ajinamanta Danielqa Babiloniapi kuraj kamachejpa yuyaychajnin karqa Ciro sutiyoj kamachiyta qallarinankama.