Colosenses 4 - DIOSPA QHELQACHISQ

¹ Patronkuna, wata runaykichejwan cheqan kajta ruwaychej, jinataj allin sonqowan paykunata qhawaychej. Ama qonqaychejchu qankunajtapis janaj pachapi Kamachejniykichej kasqanta.

² Wawqe panakuna, qankunaqa mana sayk'uspa Dioswan parlarikullaychejpuni, jinallataj Diosta pachis nispallapuni kaychej.

³ Dioswan parlarikuspaqa, noqaykuraykupis mañapuwayku Diosqa runakunaj sonqonkuta wakichinanpaj Jesusmanta willanaykupaj. Ajinamanta sut'inchasqayku, ñawpajta Cristomanta imachus pakasqa karqa, chay yachayta. Chaymanta willarasqayrayku noqapis carcelpi wisq'asqa kashani.

⁴ Qankunarí Diosmanta mañapuwaychej Diospa willachisqanta maychus kajta willanaypaj.

⁵ Cristota mana qhatejkunawan allinta yuyaychakuspa puriychej. Jinallataj Diosmanta parlanaykichejpaj jina kajtin, paymanta parlaychejpacha.

⁶ Tukuy parlasqaykichejqa allin kachun, uyarinapaj jina k'acha. Ajinamanta yachankichej sapa tapusqankuman imaynatachus kutichinaykichejta.

Pablo wawqe panakunata napaykun

⁷ Munasqa wawqenchej Tíquico qankunaman jamuspa, noqamanta tukuy imata willasonqachej. Payqa Tukuyta Kamachej Jesuspa ruwananpi ruwaysikoj masiy, jinataj sumajta yanapawan.

⁸ Payta qankunaman kachamuni imaynachus kashasqaykuta willasunaykichejpaj, sonqoykichejtataj oqharinanpaj.

⁹ Jinallataj munasqa wawqe Onesimotapis paytawan kachamushani, pichus qankunamanta karqa, chayta. Chantá paykuna imachus kaypi kashasqanta willasonqachej.

¹⁰ Aristarcopis napaykamullasunkichejtaj. Payqa noqawan khuska wisq'asqa kashan. Jinallataj Bernabejpa primon Marcospis napaykamullasunkichejtaj. Willarqaykichejña: Sichus Marcos qankunaman chayamonqa chayqa, tukuy sonqo payta wajyarikuychej, nispa.

¹¹ Jesús sutiwan sutichasqa Justopis napaykamullasunkichejtaj. Judiokunamantaqa paywan, Marcoswan imalla Dios kamachinanmanta willanapi yanapawanku, sonqochawankutaj.

¹² Qankunamanta ujniykichej, Cristoj kamachin Epafras napaykamullasunkichejtaj. Payqa Dioswan parlarikuspa mañapusunkichejpuni Tata Dios kallpachanasuykichejpaj, yuyayninpiña kanaman chayanaykichejpaj, chantá Diospa munasqanta junt'anaykichejpaj ima.

¹³ Noqa yachani Epafrasqa qankunamanta anchatapuni llakisqanta, jinallataj Laodiceapi kajkunamanta, Hierapolispi kajkunamanta ima.

¹⁴ Jinallataj munasqa jampikamayoj Lucaspis napaykamusunkichej, Demaspis.

¹⁵ Laodicea llajtapi wawqe panakunata napaykapuwayku, jinallataj Ninfasta, wasinpi kaj iglesiatawan.

¹⁶ Chantá qankuna kay cartata ñawirispa, Laodiceaman apachiychej, paykunapis ñawirinankupaj. Laodiceapi kajkunaman apachisqay cartata apachimojtinkutaj, qankunapis ñawirillaychejtaj.

¹⁷ Arquipota niripuwaychej: Tukuyta Kamachej Jesusmanta ima ruwanatachus jap'isqaykita allinta junt'ay, nispa.

¹⁸ Noqa kikiypuni qhelqaspa napaykamuykichej. Wisq'asqa kashasqaymanta ama qonqaychejchu. Diospa qhasilla k'acha yanapaynin qankunawan kachun.