Colosenses 3 - DIOSPA QHELQACHISQ

¹ Cristowan khuska kawsarichisqa kasqaykichejrayku Diosqa mosoj kawsayta qosunkichej. Chayrayku qankuna Dios imatachus munasqanta mask'anaykichejpaj sonqota churaychej. Chayqa janaj pachapi imakunamin. Chaypitaj Cristoqa Tata Diospa pañanpi tiyasqa kamachishan.

² Ajinaqa janaj pachapi kaj chay imakunata aswanpaj qhawaychejpuni, amataj kay pachapi kaj imakunataqa.

³ Ajinata ruwaychej, imaraykuchus qankunaqa ñawpa kawsaypaj wañorqankichejña, kunantaj Cristoman ujchasqa kasqaykichejrayku Diosqa mosoj kawsayniykichejta pakashan.

⁴ Cristomin chay kawsayta qosunkichej. Pay rikhurimojtintaj, qankunapis paywan khuska jatun kayninpa lliphipiyninpi rikhurimullankichejtaj.

Ñawpa kawsaywan mosoj kawsaywan

⁵ Chayrayku ari, ñawpa kawsaypi ima millaytachus ruwaj kankichej, chay munanata wañuchiychej: Amaña khuchichakuspa puriychejchu, nitaj millay kajta ruwaychejchu, nillataj sonqoykichejpa sajra munayninwan, nitaj mana allin kajta munanawan atipachikuychejchu. Jinallataj ama qolqemanta wañusqa kaychejchu, imajtinchus chayqa lantita yupaychaywan ninakun.

⁶ Chaykunata ruwaspa juchallisqankurayku Diospa k'araj phiñakuynin mana kasukojkunaj patankuman urmamonqa.

⁷ Qankunapis ñawpajta chaykunata ruwaspa purej kankichej.

⁸ Kunanrí qankuna kaykunatapis saqenallaykichejtaj tiyan: K'arajta phiñakuyta, phiñasqalla kayta, wajkunata mana allin kajta ruwayta, p'enqaypi rikhurichispa rimayta, ch'ichi parlaykunata ima.

⁹ Amallataj qankunapura llullanakuychejchu, imajtinchus juchallispa purinaman aysaj sonqota lluch'ukuspa wijch'orqankichejña.

¹⁰ Jinaspataj, mosoj runa jina kanata p'achata jina churakunkichej. Chay mosoj runaqa Ruwajninpa rijch'ayninman jina astawan astawan mosojyachisqapuni kashan, ajinamanta Diosta astawan rejsinaykichejpaj.

¹¹ Chay mosoj kawsaypitaj manaña imananchu mana judío kasqanchej, chayrí judío kasqanchej, nitaj circuncidasqa kasqanchej, chayrí mana circuncidasqa kasqanchej ima. Manallataj imananchu yachayniyoj kana, mana yachayniyoj kanapis, nitaj wata runa kana, chayrí mana wata runa kanapis. Manachayqa Cristolla aswanmin, paytaj tukuyninchejpi tiyakushan.

¹² Qankunaqa Diospa ajllakusqan kankichej, paypaj t'aqasqa, may munasqataj. Chayrayku qankuna khuyakuywan, k'acha kaywan, llamp'u sonqo kaywan, mana phiñakoj kaywan, pacienciawan ima p'achawan jina p'achallikuychej.

¹³ Jinallataj ujkuna ujkunawan paciencianakuychej. Sitajchus pipis wajpa contranpi imamantapis quejakun chayqa, purajmanta qhespichinakuychej. Imaynatachus Cristo juchaykichejta pampacharqa, ajinallatataj qankunapis ujkunaj pantasqankuta qhespichiychej.

¹⁴ Astawanqa, munakuywan p'achawan jina p'achallikuychej, imaraykuchus munakoyqa tukuyta k'acha kawsaypi ujchawanchej.

¹⁵ Chantá Cristomanta jamoj sonqo tiyaykuy sonqoykichejpi kamachispa nichun imatachus ruwanaykichejta, imaraykuchus uj ukhullaman churasqa kankichej. Chayrayku tukuywan allinpi kawsakunaykichejpaj wajyasqa kankichej. Jinallataj Diosta pachis nillaychejpuni.

¹⁶ Qankunaqa Cristoj sumaj yachachisqanmanta amapuni qonqakuychejchu. Manachayqa Diospa qosqan yuyay yachaywantaj purajmanta yachachinakuychej, k'aminarikuychej ima. Jinataj Diosta tukuy sonqo pachis nispa, salmokunata, yupaychana takiykunata, chantá Santo Espíritoj yuyaychasqan takiykunata ima takiychej.

¹⁷ Tukuy imata ruwaspa, chayrí parlaspa, Tukuyta Kamachej Jesuspa sutinpi ruwaychej, jinallataj paynejta Tata Diosta pachis niychej.

Mosoj kawsayniyoj jina wasi ayllupi kawsanamanta

¹⁸ Qosayoj warmikuna, qosaykichejwan k'umuykukoj sonqo kaychej, imaraykuchus Tukuyta Kamachej Jesuspata kasqaykichejrayku chaymin ruwanaykichejqa.

¹⁹ Jinallataj qosakunapis, warmiykichejta munakuychej, amataj paykunawan manapis sonqoyojchu kawajchej jina kaychejchu.

²⁰ Wawakuna, tata mamaykichejta tukuy imapi kasuychej, imaraykuchus chaymin Tukuyta Kamachej Jesusta kusichin.

²¹ Tatakuna, qankunapis ama wawaykichejkunaj sonqonkuta nanachiychejchu, ama q'enaqakunankupaj.

²² Wata runakuna, patronniykichejta tukuy imapi kasuychej. Amataj qhawashajtillankuchu kasuychej, paykunaman allin rijch'ayta munaspa. Aswanpis Diosta manchachikuspa, tukuy sonqo paykunata kasuychej.

²³ Tukuy imata ruwaspaqa, qankuna tukuy sonqo allinta ruwaychej, Tukuyta Kamachej Jesuspaj jina, ama runapaj jinaqa.

²⁴ Qankuna yachankichej Tukuyta Kamachej Cristoqa nisqan chayaqeta t'inkata jina qonasuykichejta, imaraykuchus Tukuyta Kamachej Cristojta kamachinkuna kankichej.

²⁵ Pichus mana allinta ruwajrí mana allin kajta ruwasqanmanta pagota jap'enqa, imaraykuchus Diosqa mana runaj uyanta qhawaspachu juzgan.