Colosenses 2 - DIOSPA QHELQACHISQ

¹ Noqa yachanaykichejta munani qankunarayku may jinatachus kallpakuspa llank'ashasqayta, jinallatataj Laodiceapi kajkunarayku, chantá noqata manaraj rejsiwajkunaraykupis.

² Munallanitaj sonqonku kawsarichisqa kananta, munakuypi sumaj ujchasqa kanankupaj. Ajinamanta yachanqanku Diospa pakasqa wakichisqan imachus kasqanta sumajta rejsisqankuta: Chayqa Cristomin.

³ Manchay valorniyoj tapadopis kanman jina, paypimin pakasqa kashan tukuy yachayniyoj kay, chantá yuyayniyoj kay ima.

⁴ Chayta niykichej, ama pipis sonqo suwanapaj jina misk'i parlasqankuwan q'otiyasunaykichejpaj.

⁵ Qankunamanta karupi kashani chaypis, sonqoyqa qankunawan kashan. Chantá kusikuni qankuna allinta purishasqaykichejrayku, jinallataj Cristopi atinikuspa sinch'ita sayashasqaykichejrayku ima.

⁶ Qankunaqa Jesucristota Kamachejniykichejta jina jap'ikorqankichej. Chayrayku paypa munasqanman jina kawsanaykichej tiyan.

⁷ Paypi sach'a jina sumaj ukhu saphiyoj kaychej, jinallataj qankuna sumaj cimientoyoj wasi jina paypi sayachisqa kaychej. Ajinamanta Cristopi atinikusqaykichejpi kallpachasqa kankichej cheqa kajta yachasqaykichejwan. Jinallataj Diosman ashkhata pachis nillankichejpuni.

Cristo mosoj kawsayta qon

⁸ Allinta qhawakuychej: Ama qhasi manakaj yuyaykunawan, nitaj mana cheqan yachachiykunawan q'otiyachikuychejchu. Chayta yachachejkunaqa mana Cristoj yachachisqantachu yachachinku. Manachayqa paykuna Diosman mana kutirikojkunaj yachachisqallanta yachachinku, jinataj kay pachapi atiyniyoj supaykunaj yachachisqankuta ima.

⁹ Cristoj yachachisqanrí aswan allinmin, imajtinchus Cristo runaman tukuspa jamojtin, imaynachus Dios kasqanqa, chay tukuy paypi karqa.

¹⁰ Cristoqa tukuy kamachejkunamanta, atiyniyojkunamantapis aswan atiyniyojmin. Chayrayku qankunaqa Cristoman ujchasqa kasqaykichejrayku, Diospa ñawpaqenpi mana ni imapi pisichu kankichej.

¹¹ Jinallataj payman ujchasqa kaspa, circuncidasqa karqankichej. Chayqa mana runaj circuncidasqanchu, manachayqa Cristomin circuncidasorqachej, qankunamanta juchallinaman aysaj sonqota orqhospa.

¹² Bautizasqa kaspaqa, Cristowan khuska p'ampasqa karqankichej. Jinallatataj Diospa jatun atiyninpi atinikusqaykichejrayku Cristowan kawsarimporqankichej, mayqen atiychus Cristota wañusqakunamanta kawsarichimorqa, chaynejta.

¹³ Ñawpajta qankunaqa juchallisqaykichejrayku wañusqa kasharqankichej, imaraykuchus juchallinaman aysaj sonqoykichej manaraj orqhosqachu karqa. Kunantajrí Diosqa Cristowan khuskata kawsarichisunkichej, tukuy juchanchejtapis pampacharqa.

¹⁴ Diosqa imachus contranchejpi qhelqasqa karqa, chayta llik'erqa, jinaspataj, Cristoj cruzninman chakataykuspa, chinkasqata chinkacherqa.

¹⁵ Ajinata ruwaspa, supaykunaj kamachiyninkuta, atiyninkuta ima qhechorqa. Ajinamantataj paykunata Cristonejta cruzpi atipaspa, tukuypa rikunanta p'enqaypi rikhuricherqa.

Cristo munasqanman jina kawsakuna

¹⁶ Chayrayku qankuna ama kasuta ruwaychejchu pipis imatachus mikhusqaykichejmanta, chayrí ujyasqaykichejmanta juchachasojtiykichej. Amallataj kasuychejchu pipis raymikunata mana ruwasqaykichejmanta, nitaj killa qallariy raymita, samarina p'unchaytapis mana maypaj qhawasqaykichejmanta juchachasojtiykichej.

¹⁷ Tukuy chaykunaqa, pichus jamunan karqa, chaypa llanthullan. Chaywanpis chay tukuy imata junt'ajqa Cristomin.

¹⁸ Amallataj saqeychejchu, pikunachus llamp'u sonqoman tukuspa angelkunata yupaychanku, chaykuna qankunata juchachasunaykichejta. Paykunaqa mosqoypi jina rikusqankuta ninku, runa jinalla manakajta yuyasqankumantataj runaykachanku.

¹⁹ Chay runakunaqa Iglesiaj uman Cristoman mana ujchasqachu kanku. Cristoqa tukuy ukhun wiñananpaj imatachus necesitasqanta qon, Diospa wakichisqanman jinataj ukhunmanta kajkunata ankuwan jina t'inkispa ujchan.

²⁰ Qankunaqa Cristowan khuska wañorqankichej, paytaj kay pachapi kamachej supaykunaj atiyninmanta kacharichisorqachej. Jinaqa, imaraykutaj Diosman mana kutirikojkunaj kamachisqankuman jina purishankichejri?

²¹ Paykunaqa ajinata kamachisunkichej: Ama chayta jap'iychu, ama chayta mikhuychu, nitaj llojchillaypischu, nispa.

²² Chaykunatarí runalla kamachin, yachachin ima. Chaykunataj tiempo pasasqanman jina tukukapullan.

²³ Arí, imatachus kamachisqankoqa allin yachayniyoj kayman rijch'akun, imaraykuchus imaynatachus purinata, llamp'u sonqoyoj kanata, chantá ukhunchejwan kasuchikunata ima yachachinku. Chaywanpis, chay kamachisqakunaqa mana pitapis yanapanchu juchallinaman aysaj sonqonpa munayninta atipananpaj.