Amós 9 - DIOSPA QHELQACHISQ

Diospa jasut'inmanta mana pipis llusp'enqachu

¹ Chantá noqaqa Tukuyta Kamachej Diosta altar qayllapi sayashajta rikorqani. Paytaj niwarqa: Temploj sayantankunata wajtay, punkukuna thalakunankupaj. P'akirakuspa, runakunaj umankuman urmaykuchun. Noqataj puchojkunata espadawan wañurachisaj, manataj pipis pakakuyta nitaj ayqeytapis atenqachu.

² Jallp'aj sonqonpipis pakakuchunku, chaymanta paykunata orqhomusaj. Janaj pachamanpis wicharichunku, chaymanta paykunata urayk'uchimusaj.

³ Carmelo orqomanpis pakakamuchunku, chaymanpis mask'aj risaj. Mama qochaj sonqonman pakakamonqanku chaypis, mama qocha ukhupi kawsaj katarita kachaykusaj paykunata khaninanpaj.

⁴ Awqankukuna paykunata mana munashajta waj suyuman apanqanku chaypis, chaypipis espadawan wañuchinankuta kamachillasajtaj. Paykunataqa ñawillaypi purichisaj, mana allinninkupajchu, manachayqa llakiyninkupaj, nispa.

⁵ Tukuy Atiyniyoj Tata Dios jallp'ata llankhan, jallp'ataj unuyan, chaypi tiyakojkunataj waqanku. Jallp'a oqharikonqa, tiyaykonqataj, imaynatachus Egiptopi Nilo mayu ashkhayantaj, pisiyantaj, jinata.

⁶ Tata Dios janaj pachapi wasinta ruwan, kay pachamantaj kirpanawan jina janajwan qhataykun. Paymin mama qochamanta yakuta wajyaspa, jallp'a pataman parachimun. Sutenqa Tata Diosmin.

⁷ Tata Dios kay jinata nin: Israelitakuna, qankuna noqapaj Etiopiamanta kajkuna jinalla kankichej. Imaynatachus Egiptomanta pusamorqaykichej, ajinallatataj filisteokunatapis Cretamanta pusamorqani, arameokunatapis Quirmanta pusamorqani, nispa.

⁸ Tukuyta Kamachej Tata Dios qhawamushan kay juchasapa suyuta. Chantá nin: Kay millay suyuta kay pachamanta chinkachisaj. Chaywanpis Jacobpa ayllunmanta mana tukuyninkutachu chinkachisaj, nispa nin Tata Diosqa.

⁹ Manachayqa kamachisaj Israelpa ayllunmanta kajkuna tukuynejman suysusqa kanankuta, imaynatachus runa trigota suysunapi suysun mana uj granollatapis pampaman urmachispa, ajinata.

¹⁰ Aylluymanta tukuy juchasapa kajkunarí espadawan wañuchisqa kanqanku, pikunachus ninku: Mana ima llakiypis qhatiriwasunchu, nitaj taripawasunchu, nispa, chaykuna.

Israel Tata Diosman kutirikun

¹¹ Uj p'unchay jamushan, chay p'unchaypitaj Davidpa ayllunta urmasqa kasqanmanta oqharisaj, watejmantataj sayarichisaj, imaynachus ñawpajta karqa, kikinta.

¹² Edommanta puchojkuna, tukuy suyukunamanta puchojkunawan ima watej Israelpata kanqanku, pikunachus sutiyta yupaychanku, chaykunajta. Tata Dios ajinata nin, chaytaj junt'akonqapuni.

¹³ Chay jamoj p'unchaypi aylluy trigota oqharishajtillankuraj, llank'ana tiempo chayamonqa. Manaraj uvata ch'irwayta tukushajtinku, ñapis trigo tarpuna tiempo chayamonqaña. Vinoqa tukuy orqonejta, kinraykunata ima yaku jina purirenqa. Ajinata Tata Dios nin.

¹⁴ Chantá karu suyukunaman mana munashajta apasqa kasqanmanta Israel aylluyta pusakampusaj. Paykuna thuñisqa llajtankukunata watej sayarichenqanku, chaypitaj tiyakonqanku. Watej uva sach'akunata mallkenqanku, vinotataj ujyanqanku. Huertakunatapis ruwanqanku, poqojtataj mikhonqanku.

¹⁵ Noqa paykunata kikin suyunkupi tiyachisaj, manañataj ni jayk'aj qosqay jallp'ankumanta waj suyuman apasqachu kanqanku, nispa. Ajinata Tata Dios nin.