Amós 8 - DIOSPA QHELQACHISQ

Poqoyniyoj canastata mosqoypi jina rikun

¹ Tukuyta Kamachej Tata Dios mosqoypi jina rikuchiwarqa poqoyniyoj uj canastata.

² Paytaj tapuwarqa: Amós, imatataj rikunki? nispa. Noqataj kuticherqani: Poqoyniyoj canastata rikushani, nispa. Chantá Tata Dios niwarqa: Israelpa millay ruwasqan anchaña, manañataj ujtawan juchanta pampachasajchu.

³ Chay p'unchaypi kamachinanku wasipi takisqanku may llakiyman tukonqa. Ashkha runakuna wañusqankuraykutaj, ayanku tukuynejpi wijch'urayanqa, nispa. Noqa Tukuyta Kamachej Tata Diosmin chayta nini.

Diosqa Israelmanta cuentata mañanqa

⁴ Uyariychej kayta: Qankunaqa pisi tiyapuyniyojkunaj kallpanta ch'onqankichej, wajchakunatataj chinkachiyta munashankichej.

⁵ Qankuna ninkichej: Mayk'ajllañataj mosoj killa raymi tukukonqa trigota ranqheyananchejpajri? Mayk'ajllañataj samarina p'unchay tukukonqa trigota kurajpi, chantá suwa romanapi ranqheyananchejpajri?

⁶ Chantá wajchakunata rantikusunchej, pisichikojkunatataj iskay juk'utawan chhalarparisunchej. Jinallataj ch'usu trigotapis ranqheyasunchej, nispa.

⁷ Tata Diostajrí, piraykuchus Jacob jatunchasqa kashan, chay sutinrayku tiluspa nin: Mana jayk'ajpis qonqasajchu chay jina ruwasqankutaqa, nispa.

⁸ Chay jina millay ruwasqankumanta kay suyoqa kharkatitenqa. Jinallatataj chay suyupi tukuy tiyakojkuna waqanqanku. Chaypacha jallp'a pachallanmanta kuyurenqa, tiyaykonqataj, imaynatachus Nilo mayupi yaku ashkhayantaj pisiyantaj, jinata, nispa.

⁹ Tukuyta Kamachej Tata Dios nillantaj: Chaypachaqa chawpi p'unchay kashajtin, noqa intita laqhayachisaj, chay p'unchayllataj kay pachata laqhayachisaj.

¹⁰ Raymiykichejta waqanaman tukuchisaj, takisqaykichejtapis llakiy yarawiman. Lutochisqaykichej, umaykichejtataj t'ojluchisqaykichej, sinch'i llakisqa kasqaykichej yachakunanpaj. Waqankichej, imaynatachus uj runa waqan k'ata wawan wañupojtin, jinata. Tukuy imataj may llakiyman tukonqa, nispa.

¹¹ Tukuyta Kamachej Tata Dios nillantaj: Uj p'unchay chayamonqa, chay p'unchaypitaj noqa yarqhayta kay pachaman apachimusaj. Mana t'antamanta yarqhaychu kanqa, nitaj yakumanta ch'akiychu. Manachayqa noqaj nisqayta uyarinamanta yarqhachikuyta apachimusaj.

¹² Runakuna tukuynejta thamaykachanqanku Tata Diospa nisqanta mask'aspa. Renqanku uj mama qochamanta uj mama qochaman, wichaynejmantataj inti llojsimuynejman. Chaywanpis manapuni nisqayta tarenqankuchu.

¹³ Chay p'unchayqa k'acha sipaskuna, wapu waynakunapis yaku ch'akiywan llawch'iyanqanku.

¹⁴ Samariaj lantinkunarayku tilojkunapis, pikunachus ninku: Dan aylloj diosninrayku, chayrí Bersebaj diosninkunarayku tiluyku, nispa, chaykunapis urmanqanku, manañataj ujtawan oqharikonqankuchu.