Amós 2 - DIOSPA QHELQACHISQ

¹ Tata Dios kay jinata nin: Moabmanta kajkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus Edom suyuta kuraj kamachejpa tullunta ushphaman tukuchinankukama ruphacherqanku.

² Chayrayku noqaqa Moab suyuman ninata jap'iykuchisaj, chay ninataj Queriot llajtapi kamachinanku wasita ruphaykonqa. Sinch'i maqanaku kanqa, cornetakunatataj waqachenqanku, jinataj moabitakuna wañuchisqa kanqanku.

³ Jinallataj Moabta kuraj kamachejta, jinallataj wapu soldadonkunatapis wañuchisajpuni. Noqa Tata Dios ajinata nini.

⁴ Tata Dios kay jinata nillantaj: Judamanta kajkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus paykunaqa noqa Tata Dios imatachus yachachisqayta pisipaj qhawarqanku, manataj kamachisqayta kasorqankuchu. Manachayqa tatankoj yupaychasqanku lantikunallatataj paykunapis yupaycharqanku.

⁵ Chayrayku Judá suyuman ninata jap'iykuchisaj, chay ninataj Jerusalenpi kaj kamachina wasita ruphaykonqa, nispa.

Israel juchachasqa kanqa

⁶ Tata Dios kay jinata nin: Israelitakuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus mana juchayojta vendenku, wajcha runatataj juk'utaraykulla chhalarparinku.

⁷ Pisi tiyapuyniyojta ñak'arichinku, k'umuykachachinkutaj, llamp'u sonqoyojkunapajpis mana justiciata ruwayta munankuchu. Chantá tatawan, churinwan ima uj warmillawan puñuykunku, ajinata ruwaspataj, may llimphu sutiyta sarunku.

⁸ Prendasqa p'acha patapi altar qayllapi winkuspa, millayta ruwanku. Multa sik'isqankuwan vinota rantikuspa, diosninkoj wasinpi macharikunku.

⁹ Chaywanpis noqa qankuna israelitakunapaj ñanta kicharispa, amorreokunata chinkacherqani. Paykunaqa pino sach'a jina jatunkaray karqanku, roble sach'a jinataj sinch'i karqanku.

¹⁰ Qankunatarí Egipto suyumanta orqhomorqaykichej, tawa chunka watatataj ch'innejpi pusaykacharqaykichej, amorreokunaj jallp'ankuta jap'inaykichejpaj.

¹¹ Israelitakuna, ama niwaychejchu mana jina kasqanta. Qankuna ukhumanta wakinta ajllarqaykichej, noqamanta sut'inchaj kanaykichejpaj, wakintataj nazareo kanaykichejpaj, nispa. Noqa Tata Diosmin ajinata nini.

¹² Qankunatajrí, nazareokunata mana munashajta vinota ujyacherqankichej, sut'inchajkunatapis sutiypi ama parlanankupaj jark'arqankichej.

¹³ Chayrayku pampapi sarusqaykichej, imaynatachus trigo cargayoj carreta pampata sarun, ajinata sarusqaykichej.

¹⁴ Sinch'ita t'ijurejqa mana ayqeyta atenqachu. Kallpasapatapis kallpanqa mana yanapanqachu. Aswan wapu kajpis wañunanmanta mana llusp'enqachu.

¹⁵ Arcowan flechajpis mana awantanqachu. Imata jina t'ijoj runakunapis manallataj ayqenqankuchu, nillataj caballopi ayqejpis.

¹⁶ Chay p'unchaypi aswan wapu soldado kajpis p'achanta ch'uskikuspa, q'alalla ayqenqa. Noqa Tata Diosmin ajinata nini.