Amós 1 - DIOSPA QHELQACHISQ

Israel suyoj muyuyninpi kajkunapaj jasut'i

¹ Kaymin Amospa willasqan. Payqa Tecoa llajtamanta karqa, uywata mirachej runataj. Diosqa mosqoypi jina Amosman nerqa israelitakunaman sut'inchananpaj, jallp'a ikhakuymanta iskay wata ñawpajta, Judapi Uzías kuraj kamachej kashajtin, Israelpitaj Joaspa churin Jeroboán kamachishajtin.

² Amós nerqa: Jerusalenpi Tata Dios sinch'ita Sión orqomanta parlajtin, pampapi q'omer pasto ch'akiponqa, jinallataj Carmelo orqopis ch'akiponqa.

³ Tata Dios kay jinata nin: Damasco llajtayojkunaqa millayta ruwaspa pasakapunku. Chayrayku paykunata jasut'isajpuni, imaraykuchus Galaadmanta kajkunata fierro trillowan trillarqanku.

⁴ Chayrayku kuraj kamachej Jazaelpa wasinman ninata jap'iykuchisaj, chay ninataj churin Ben Adadpa kamachinan wasita ruphaykonqa.

⁵ Jinallataj Damasco llajtaj punkunkunata kallpawan urmachisaj, Bicat Avenpi kamachejtataj phirita ruwasaj, jinallataj Bet Edenpi kamachejtapis. Siriokunapis Quirman apasqa kanqanku, nispa. Tata Dios ajinata nin.

⁶ Tata Dios kay jinata nillantaj: Gaza llajtayojkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus llajtantinta wata runata jina jap'ispa, Edompi paykunata venderqanku.

⁷ Chayrayku Gaza llajtaj perqanman ninata jap'iykuchisaj, chay ninataj kamachinanku wasita ruphaykonqa.

⁸ Asdodpi tiyakojkunata phirita ruwasaj, Ascalonpi kuraj kamachejtapis chinkarparichisaj. Tukuy atiyniywan Ecronpa contranpi kachaykukusaj, tukuynin filisteokunataj wañurachisqa kanqanku, nispa. Ajinata Tukuyta Kamachej Tata Dios nin.

⁹ Tata Dios kay jinata nillantaj: Tiro llajtayojkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus tukuy llajtantinta wata runata jina jap'ispa, Edomman venderqanku. Manataj yuyarikorqankuchu Israelwan allinta kawsanankupaj tratota ruwasqankumanta.

¹⁰ Chayrayku Tiro llajtaj perqanman ninata jap'iykuchisaj, chay ninataj kamachinanku wasita ruphaykonqa, nispa.

¹¹ Tata Dios kay jinata nin: Edommanta kajkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus mana khuyakuspa, wawqenku israelitakunata wañucherqanku. Phiñakuyninkupi munayninkuta ruwarqanku, paykunatataj ni uj chhikanllatapis khuyarikorqankuchu.

¹² Chayrayku Temán llajtata ninawan jap'iykuchisaj, chay ninataj Bosrapi kaj pukarankukunata ruphaykonqa, nispa.

¹³ Tata Dios kay jinata nillantaj: Amonmanta kajkuna millayta ruwaspa, anchatañataj juchallikunku. Chayrayku paykunata jasut'isajpuni, imaraykuchus jallp'ankuta jatunyachinankurayku, Galaadpi onqoj warmikunaj wijsankuta khallararqanku.

¹⁴ Chayrayku noqaqa Rabá llajtaj perqanman ninata jap'iykuchisaj, chay ninataj kamachinanku wasita ruphaykonqa, sinch'i maqanaku kashajtin, muyoj wayra kashajtintaj.

¹⁵ Chantá kuraj kamachejninku waj suyuman apasqa kanqa, tukuy kurajkunawan khuska, nispa. Tata Dios ajinata nin.