Abdías 1 - DIOSPA QHELQACHISQ

Diosqa Edomta k'umuykuchenqa

¹ Kaytamin Abdías mosqoypi jina rikusqa. Tukuyta Kamachej Tata Dios Edommanta kayta nin: Tata Diospa willasqanta uyarerqayku. Uj chaskitaj waj suyukunaman rispa, nerqa: Puririychej, jaku Edompa contranpi maqanakoj, nispa.

² Tata Diosqa Edomta nin: Noqa tukuy suyukunamanta nisqaqa astawan juch'uy suyuman tukuchisqayki, jinataj pisipaj qhawasqa kanki.

³ Wapuykachasqayki q'otiyasorqa. Chhanka jusk'ukunapi kawsasqaykirayku, orqo patapi tiyakusqaykirayku ima sonqoykipi nerqanki: Noqataqa mana pipis urmachiwanmanchu, nispa.

⁴ Sichus anka jinapis pataman oqharikuwaj, ch'askakuna chaypipis thapachakuwaj chayqa, chaymanta noqamin urmachimusqayki. Noqa Tata Diosmin chayta nini.

⁵ Sichus tutapacha suwaj jamusunkuman chayqa, mana tukuytachu apakapunkuman. Sitajchus uvata pallajkuna jamunkuman chayqa, wakin uvallatapis saqerinkuman. Awqaykikunarí chinkasqata chinkarparichisonqanku.

⁶ Esaú, tukuy k'uchuta mask'aspa, tukuy imaykita apakaponqanku. Tukuy qhapaj kayniykita mana puchuyojta suwanqanku.

⁷ Qanman kutisqa kajkunapis wasanchasonqanku, kikin jallp'aykimantataj wijch'usonqanku. Kikin kawsaqeykikunallataj contraykipi sayarenqanku. Jinallataj pikunapichus atinikorqanki, chay kawsaqeykikunallataj urmanaykipaj tojllata churaykapusonqanku. Chaywanpis qan, Edom, mana imatapis reparankichu.

⁸ Tata Dios nillantaj: Maypachachus Edomta jasut'isaj chaypachaqa, tukuy yachayniyoj runankunata chinkachisaj. Esaúj orqonkunapi tukuy yuyayniyojkunata chinkachillasajtaj.

⁹ Temán llajtamanta maqanakojkuna manchachikuywan kharkatitenqanku. Esaujpa orqonkunapi tiyakojkunamantataj mana pipis kawsashaj qhepakonqachu.

Edompa juchan

¹⁰ Edom suyu, p'enqayllapipuni qhepakunki, wiñaypajtaj chinkachisqa kanki, wawqeyki Jacobta kallpaykiman atinikuspa ñak'arichisqaykirayku, wañuchisqaykiraykutaj.

¹¹ Qan qhawakullarqanki, maypachachus Israelpa awqankuna qhapaj kayninta apakapusharqanku, chaypacha. Jinallataj soldadokuna Jerusalén llajtaj punkunkunata apaykuspa yaykuykushajtinku, qan chaytapis qhawakullarqankitaj. Paykuna rak'inakuspa, tukuy imankuta apakapushajtinku, qanpis paykuna jinallataj ruwarqanki.

¹² Wawqeyki llakiypi kashajta rikuspa, mana kusikunaykichu karqa. Manallataj kusikunaykichu karqa Judá ñak'arishajta rikuspa, nillataj asikunaykichu karqa llakiypi kashajtinku.

¹³ Ñak'ariypi kashajtin, mana llajtankunaman yaykuykunaykichu karqa, nitaj kusikunaykichu karqa chay jina llakiypi kashajtin. Manallataj kapuyninta suwanaykichu karqa, sinch'i ñak'ariy p'unchaypi kashajtinku.

¹⁴ Mana k'ullku ñanpi suyaykunaykichu karqa ayqekojkunata wañurachinaykipaj. Nillataj ñak'ariy p'unchaypi ayqekojkunata jap'ispa, awqankuman jaywaykunaykichu karqa.

Israel ayllu jatunchasqa kanqa

¹⁵ Tata Dios tukuy suyukunata jasut'inan p'unchay chayamushanña. Chayrayku imaynatachus wajkunata ruwarqanki, ajinallatataj qantapis ruwasonqanku. Imatachus ruwasqaykiman jina jap'inki.

¹⁶ Noqapaj t'aqasqa orqoypi imaynatachus qankuna phiñakuyniywan junt'a vasoymanta ujyarqankichej, ajinallatataj waj suyukunapis chaymanta ujyallanqankupuni. Chantá ujyanqanku, thatanqanku, manataj jayk'ajpis kankumanchu karqa jina kanqanku.

¹⁷ Chaywanpis Sión orqoqa Diospaj t'aqasqa nisqa kanqa. Chayman wakinkuna ayqekuyta atenqanku. Jacob ayllumanta kajkuna jallp'ankuta watej chayaqeta jina jap'ikapullanqankutaj.

¹⁸ Jacobpata, jinataj Josejpata ayllunkuna nina lawraj jina kanqanku. Esaujpa ayllunmanta kajkunatajrí ch'aki qhora jina chay ninawan ruphachisqa kanqanku. Ni pi Esaujpa ayllunmanta kawsashaj qhepakonqachu. Noqa Tata Diosmin chayta nini.

¹⁹ Chantá Neguevpi tiyakoj israelitakuna Esaúj orqonkunata jap'ikaponqanku, vallemanta kajkunataj filisteokunaj jallp'ankuta. Chantapis jap'ikapullanqankutaj Efrainpa jallp'anta, Samariaj jallp'anta ima, Benjaminmanta kajkunataj Galaadta jap'ikaponqanku.

²⁰ Pikunachus waj suyuman apasqa karqanku, chaymanta kutimoj israelitakuna cananeokunaj jallp'ankuta, Sarepta chaynejkama jap'ikaponqanku. Pikunachus Jerusalenmanta Sefaradman apasqa karqanku, chaykunaqa Neguevpi llajtakunata jap'ikaponqanku.

²¹ Atipajkunaqa Sión orqoman wicharenqanku chaymantapacha Esaúj orqonkunata juchachanankupaj. Chaypachataj Tata Diosmin kuraj kamachej jina kamachenqa.