2 Timoteo 3 - DIOSPA QHELQACHISQ

Qhepanejman runa imaynachus kanqa

¹ Timoteo, kaytapis yachanallaykitaj tiyan: Tukukuy qaylla p'unchaykunata sinch'i llakiy p'unchaykuna kanqa.

² Chaypacha runakuna kay jina kanqanku: Imallatapis paykunallapaj munajkuna, qolqemanta wañusqa, runaykachajkuna, may kasqankuta yuyajkuna ima. Kallanqankutaj Diosmanta alqorakojkuna, tatankuta mamankuta mana kasojkuna, mana pachis niyta yachajkuna, chantá Diosta mana manchachikojkuna ima.

³ Kallanqankutaj mana sonqoyojkuna, rumi sonqo, qhasimanta tumpajkuna, sonqonkoj munasqanta mana atipayta atejkuna, mana khuyarispa millayta ruwajkuna, allin kajta chejnejkuna ima.

⁴ Kallanqankutaj wasanchajkuna, mana qhawarikuspa imallatapis ruwarparejkuna, may kasqankuta yuyakojkuna, Diosta kasunankutaqa munasqallankuta ruwayta munajkuna ima.

⁵ Chay runakunaqa Diosta munakusqankuta nenqanku, chantá may jatun respetowan payta qhawasqankuta ima. Chaywanpis Diospa atiyninta qhesachanqanku, mayqenchus paykunata Diosta kasukuyta yanapayta atinman, chayta. Chay jina runakunawanqa ama ni ima ruwanayki kachunchu.

⁶ Paykuna wasimanta wasi purispa, pisi sonqo warmikunaj umankuta muyuchinku. Chay warmikunaqa tukuy imaymana millay kajta munapayaywan apaykachasqa kaspa, jucha q'epirisqa kawsanku.

⁷ Jinallataj paykuna mosoj yachachiykunata mask'aspa purinku, chaywanpis cheqa kajqa manapuni umankuman yaykuyta atinchu.

⁸ Chay runakunaqa, imaynatachus Janeswan, chantá Jambreswan Moisespa contranpi sayaykorqanku, ajinallatataj paykunapis cheqa kajpa contranpi sayaykunku. Paykunaqa millay yuyayniyoj kanku, Diospi atinikuni nisqankupis llullalla.

⁹ Chaywanpis munasqankuta ruwaspa, mana unayta kanqankuchu, imaraykuchus may jina wampuchus kasqankuta tukuy reparanqanku. Ajinallataj, pikunachus Moisespa contranpi sayaykorqanku, chaykunawan karqa.

Pabloqa Timoteota yuyaychan

¹⁰ Qanrí, Timoteo imatachus yachachisqayta sumajta yachanki, jinallataj imaynatachus kawsasqayta, imatatajchus ruwayta munasqayta ima. Yachallankitaj imaynatachus Diospi atinikusqayta, pacienciakusqayta, munakuyniyoj kasqayta, chantá ruwanaypi sinch'ita sayasqayta ima.

¹¹ Qan yachallankitaj chejnikuspa qhatiykachawasqankuta, ñak'arisqayta ima, imaynatachus Antioquiapi, Iconiopi, Listrapi ima ñak'arerqani, chayta. Chaywanpis Tukuyta Kamachej Jesucristo chay tukuymanta kacharichiwarqa.

¹² Ajinallatataj, tukuy pichus Cristo Jesusman ujchasqa kasqanrayku Diosta kasuspa kawsayta munajqa qhatiykachasqa kanqa.

¹³ Chaywanpis millayta ruwaj runakuna, q'otiyajkuna ima astawan astawan mana allinman tukonqanku. Wajkunata q'otiyanqanku chaypis, paykunapis q'otiyasqallataj kanqanku.

¹⁴ Qanrí imatachus yachaqakusqaykipi sinch'ita sayay. Qan yachanki chayqa cheqapuni kasqanta. Yachallankitaj, pikunachus chayta yachachisorqanku, chaykunapi atinikuyta atisqaykita.

¹⁵ Qan wawamantapacha imatachus Diospa Qhelqachisqanmanta yachaqakusqaykita yuyarikuy, imaraykuchus yachayniyoj kayta yachachisunkiman. Jinallataj Cristo Jesuspi atinikuynejta qhespichisqa kanaman apasuyta atin.

¹⁶ Diospa tukuy Qhelqachisqanqa paypa yuyaychasqan kaspa, may sumajmin cheqa kajmanta yachachinawanchejpaj, noqanchejpi imachus mana allinchu kashan, chayta reparachinawanchejpaj ima. Jinallataj pantaykunchej chayqa, Diospa Qhelqachisqanqa cheqan ñanman churawanchej, chantá cheqanta puriyta yachachiwanchej ima.

¹⁷ Ajinamanta Diospa kamachenqa ruwanapaj sumaj yachachisqa kanqa, jinallataj tukuy ima allin kajta ruwananpaj sumaj wakichisqa.