2 Tesalonicenses 3 - DIOSPA QHELQACHISQ

Pablo payrayku Diosmanta mañapunankuta nin

¹ Kunanqa wawqe panakuna, Dioswan parlarikuspa, noqaykupaj mañaripuwayku Tukuyta Kamachej Jesuspa willachisqan tukuynejpi uyarisqa kananpaj, jatunchasqataj, imaynachus qankuna ukhupi karqa, ajinata.

² Diosmanta mañapullawaykutaj, chay may sajra runakunamanta waqaychasqa kanaykupaj, imaraykuchus mana tukuychu Jesuspa willachisqanta jap'ikunku.

³ Tukuyta Kamachej Jesucristorí nisqanta junt'ajmin, paytaj kallpachasonqachej, mana allin kajmantataj waqaychasonqachej.

⁴ Noqaykoqa Tukuyta Kamachej Jesuspi atinikuspa suyayku kamachisqaykuman jina ruwashasqaykichejta, jinataj qhepamanpis ruwanallaykichejtapuni.

⁵ Chantá Tukuyta Kamachej Jesús qankunata yanapachun imaynatachus Dios munakun, ajinallatataj qankunapis wajkunata munakunaykichejpaj, chantapis ñak'ariykunapi Cristo jina pacienciakunaykichejpaj ima.

Kawsanapaj llank'ana

⁶ Wawqe panakuna, Tukuyta Kamachej Jesucristoj sutinpi kamachiyku t'aqakunaykichejta, pikunachus kawsanankupaj mana llank'ayta munaj wawqe panakunamanta. Paykuna mana yachachisqaykuman jina kawsayta munankuchu.

⁷ Qankunaqa yachankichej, noqayku jina imaynatachus kawsayta, imaraykuchus qankunawan kashaspa, mana qhellachu karqayku.

⁸ Noqayku mana jayk'ajpis pejpa mikhunanta qhasilla mikhorqaykuchu. Aswanpis jump'i suruyta tuta p'unchay llank'arqayku, ama ni mayqenniykichejpaj llasa q'epi jina kanaykupaj.

⁹ Noqayku atiykuman karqa kawsanaykupaj qankunamanta imatapis mañakuyta. Chaywanpis mana imatapis mañakorqaykuchu, imaraykuchus munarqayku ruwasqaykuwan yachachiyta qankunapis kikinta ruwanaykichejpaj.

¹⁰ Chayrayku qankunawan kashaspa, kayta kamacherqayku: Pichus kawsananpaj mana llank'ayta munajmanqa ama mikhunata qoychejchu, nispa.

¹¹ Chaywanpis, noqayku uyariyku wakinkuna qankuna ukhupi mana allinta purishasqankuta, kawsanankupaj mana ni imata ruwayta munaspa, astawanpis wajkunaj kawsayninkuman sat'ikuspa.

¹² Chay jina kajkunataqa kamachiyku, k'amiykutaj Tukuyta Kamachej Jesucristoj sutinpi, llank'aspa mikhunankupaj ganakunankuta.

¹³ Qankunatajrí wawqe panakuna, allin kajta ruwaspa ama sayk'uychejchu.

¹⁴ Jinallataj reparaychej Diosta qhatejkunamanta pichus kay cartapi nisqaykuta mana kasojta. Chantá paymanta karunchakuspa, ama paywan kawsakuychejchu, ajinamanta p'enqakunanpaj.

¹⁵ Chaywanpis, ama awqaykichejta jinachu qhawaychej, aswanpis Diosta qhatej masiykichejta jina k'amiychej.

Cartaj tukukuynin

¹⁶ Sonqo tiyaykuyta qoj Tukuyta Kamachej Jesús qankunaman sonqo tiyaykuyta tukuy p'unchay qosuchun. Tukuyta Kamachej Jesustaj qankunawan kachun.

¹⁷ Noqa Pabloqa kikin makiywanpuni qhelqaspa, napaykuykichej, yachanaykichejpaj noqamantapuni kay carta kasqanta. Kay cartaqa noqaj ruwasqaypuni.

¹⁸ Tukuyta Kamachej Jesucristonchejpa qhasilla k'acha yanapaynin tukuy qankunawan kachun. Ajina kachun.