2 Tesalonicenses 2 - DIOSPA QHELQACHISQ

Jesucristo kutimunan qayllata imachus kananmanta

¹ Kunanqa, wawqe panakuna, Tukuyta Kamachej Jesucristonchej kutimunanmanta, chantá paywan tinkukuspa tantakunanchejmanta ima kayta tukuy sonqo niyku:

² Ama askamalla umaykichejta muyuchichikuychejchu, nitaj manchariychejchu pikunachus Jesuspa kutimunan p'unchay qayllamunña nejkunawan. Ama nisqankuta uyariychejchu, ni mosqoypi jina rikuchiwarqayku nishajtinkupis, nillataj ima parlayrayku, nitaj ni ima cartarayku, noqaykumantapis kanman jina.

³ Ni imarayku piwanpis q'otiyachikuychejchu. Manaraj chay p'unchay chayamushajtin, ñawpajta runakunaqa Diospa contranpi sinch'ita oqharikonqanku. Jinallataj millay kajta ruwaj runa rikhurimonqa, pichus wiñay chinkayman rinanpaj churasqa kashan, chay.

⁴ Chay runaqa Diospa contranpi sayarenqa, jinataj imachus yupaychanaj contranpi ima. Chantá Diospa Templonman yaykuspa, chaypi tiyaykonqa, nenqataj pay Dios kasqanta.

⁵ Manachu yuyarikunkichej noqayku qankunawan kashaspa chaykunamanta willasusqaykichejta?

⁶ Yachallankichejtaj imachus payta jark'ashasqanta, mayk'ajchus rikhurimunan kanqa, chay p'unchayllapi rikhurimunanpaj.

⁷ Chay pakasqa millayta ruwananpaj wakichisqanqa ñapis puririshanña. Chaywanpis jark'asqallaraj kashan, imachus jark'ajta ñawpaqenmanta Dios orqhonankama.

⁸ Chaymanta qhepata millayta ruwaj runa rikhurimonqa. Tukuyta Kamachej Jesustajrí siminpa samayninwan payta wañuchenqa, jatun kayninpa k'anchayninwan kutimuspataj, chay runaj atiyninta chinkarparichenqa.

⁹ Millayta ruwaj chay runaqa Supay Satanaspa atiyninwan jamuspa, llullerionwan t'ukuna imakunata ruwanqa, ruwallanqataj runa mana jayk'aj rikusqanta ima.

¹⁰ Jinataj pay chinkayman rejkunata tukuy imaymanata ruwaspa, q'otiyanqa. Paykuna chinkayman rishanku, imaraykuchus cheqa kajta mana jap'ikorqankuchu nitaj munakorqankuchu, chaynejta qhespichisqa kanankupaj.

¹¹ Chayrayku Dios paykunaman sinch'i pantachej atiyta kachamonqa, paykunatataj llulla kajta jap'ikonqanku.

¹² Ajinamanta tukuyninku juchachasqa kanqanku, imaraykuchus cheqa kajta mana jap'ikorqankuchu, aswanpis millay kajta ruwaspa, misk'irichikorqanku.

Jesusta qhatejkuna sinch'ita sayana

¹³ Diospa munakusqan wawqe panakuna, noqayku qankunamanta Diosta pachis ninaykupuni tiyan. Diosqa qankunata qallariymantapacha ajllakusorqachej qhespichisqa kanaykichejpaj Santo Espíritu llimphuchasqannejta, chantá cheqa kajta jap'ikusqaykichejnejta ima.

¹⁴ Chaypajmin Dios wajyasorqachej Jesusmanta sumaj willayta willasqaykunejta, ajinamanta Tukuyta Kamachej Jesucristoj jatun kayninpa k'anchayninpi paywan khuska kanaykichejpaj.

¹⁵ Chayrayku, wawqe panakuna, sinch'ita sayaychej, jinataj noqayku kikin, chantá cartanejta imatachus yachachisqaykumanta sinch'ita ch'ipakuychej.

¹⁶ Kikin Tukuyta Kamachej Jesucristonchej, chantá Tata Diosninchej ima munakuwanchej, jinataj wiñaypaj sonqochawanchej, paykunamantataj allin kajta jap'ikunanchejta suyakushallanchejtaj.

¹⁷ Paykunamin sonqoykichejta oqharichunku, kallpachachunkutaj allin kajllatapuni ruwanaykichejpaj, chantá parlanaykichejpaj ima.