2 Tesalonicenses 1 - DIOSPA QHELQACHISQ

Pablo napaykun

¹ Pablowan, Silvanowan, Timoteowan ima Tesalónica llajtapi kaj iglesiaman kay cartata apachimuyku, pikunachus Tata Diospata, chantá Tukuyta Kamachej Jesucristojta kanku, chaykunaman.

² Tata Diosninchejmanta, chantá Tukuyta Kamachej Jesucristonchejmantawan sonqo tiyaykuyninku, jinataj qhasilla k'acha yanapayninku ima qankunawan kachun.

Tukuyta Kamachej Jesús kutimunanmanta

³ Munasqa wawqe panakuna, qankunamanta Diosta pachis ninayku tiyan. Ajina kanan kashan, imaraykuchus Diospi astawan astawan atinikushankichej, jinallataj qankunapura astawan astawan munakushankichej.

⁴ Chayrayku noqayku Diospa iglesiankunapi qankunamanta may kusisqa parlayku, imaraykuchus qankuna qhatiykachasqa, chantá ñak'arichisqa kashaspapis, mayta pacienciakorqankichej, jinataj Diospi atinikuspallapuni kashankichej.

⁵ Chay ñak'arisqaykichejqa yachayta qoshan Diospa juicion cheqan kasqanmanta, qankunataj Diospa kamachiyninman yaykunapaj jina kasqaykichejmanta ima. Chayrayku chay jinata ñak'arishankichej.

⁶ Diosqa cheqanta kajta ruwaj kasqanrayku, qhepanejman pikunachus qankunata ñak'arichejkunata jasut'enqa.

⁷ Ñak'arichisqa kashajtiykichej, Dios qankunata, chantá noqaykutapis samarichiwasunchej, maypachachus janaj pachamanta Tukuyta Kamachej Jesús atiyniyoj angelninkunawan rikhurimonqa, chaypacha.

⁸ Payqa Diosman mana kutirikojkunata, jinataj Tukuyta Kamachej Jesusmanta sumaj willayta mana jap'ikojkunata jasut'enqa.

⁹ Paykunataj wiñaypaj ñak'arichisqa kanqanku. Jinataj Tukuyta Kamachej Jesuspa ñawpaqenmanta, chantá jatun atiyninpa lliphipiyninmanta ima wijch'usqa kallanqankutaj.

¹⁰ Maypachachus Jesús kutimonqa chaypacha, ajllakusqankuna payta jatunchanqanku, paypi atinikojkunapis t'ukuspa yupaychanqanku. Qankunapis paykunawan khuska kallankichejtaj, imaraykuchus paymanta willasqaykuta jap'ikorqankichej.

¹¹ Chayrayku Dioswan parlarikuspa, qankunarayku mañapushaykupuni, Diosninchejpa wajyasqan jina kawsanaykichejpaj yanapasunaykichejta. Mañapullaykutaj Diosqa atiyninwan allin kajta ruwayta munasqaykichejta junt'ananta, chantá paypi atikusqaykichejrayku imatachus ruwayta qallarisqaykichejta tukuychananta.

¹² Ajinamanta Tukuyta Kamachej Jesucristoj sutin jatunchasqa kanqa, qankuna imaynatachus kawsasqaykichejnejta. Jinallataj paypis qankunata jatunchallasonqachejtaj. Chayqa ajina kanqa, Diosninchejpata, chantá Tukuyta Kamachej Jesucristonchejpata qhasilla k'acha yanapayninrayku.