2 Samuel 8 - DIOSPA QHELQACHISQ

David awqankunata atipan

¹ Chaymanta Davidqa filisteokunata atiparqa, tukuy jallp'ankuta qhechuspataj, atiyninman churarqa. Qhechullarqataj Méteg Amma nisqa cheqatapis filisteokunaj makinkumanta.

² Ajinallataj moabitakunatapis atipallarqataj. Paykunataqa pampaman winkuchispa, q'aytuwan tupucherqa. Chantá pikunachus q'aytuwan iskay tupusqa ukhupi kajkunataqa wañucherqanku, uj tupusqa ukhupi kajkunatataj mana wañucherqankuchu. Ajinamanta chay kawsaj moabitakunaqa Davidpa makinpi karqanku, paymantaj impuestota pagarqanku.

³ Davidqa atipallarqataj Hadad Ezerta. Pay karqa Rejobpa churin, Soba suyoj kuraj kamachejnin. Davidqa Hadad Ezerta atiparqa Éufrates mayu chaynejman, jallp'anta watej jap'ikapoj rishajtin.

⁴ Chaykunamanta Davidqa presocharqa 1.700 caballopi maqanakoj soldadokunata, jinataj chakillapi purej soldadokunamantataj iskay chunka waranqata. Jinataj carretakunata qhatataj, chay caballokunaj chaki ankunta p'itirarqa. Pachaj carretapaj jinalla caballokunata paypaj puchucherqa.

⁵ Chaymantaqa Damascomanta arameokuna chayamorqanku Sobaj kuraj kamachejnin Hadad Ezerta yanapaj. Davidtajrí arameokunatapis atipallarqataj, paykunamantataj 22.000 wañucherqa.

⁶ Chaymantataj Damasco llajtapi Davidqa soldadonkunata churarqa. Jinamanta arameokunapis paypa makinpi karqanku, impuestotataj pagaj kanku. Ajinata ari, Tata Diosqa Davidtaqa mayman maqanakoj rejtinpis yanapallarqapuni.

⁷ Chaymanta Davidqa Hadad Ezerpa soldadonkunata kamachejninkoj qori escudonkukunata qhechuspa, Jerusalenman apakaporqa.

⁸ Ajinallatataj kuraj kamachej Davidqa Hadad Ezerpa Betaj llajtanmanta, Berotay llajtanmantawan ima ashkha bronceta apakaporqa.

⁹ Jamat llajtaj kuraj kamachejnin Toy uyarerqa David kuraj kamachej Hadad Ezerpa soldadonkunata atipasqanta.

¹⁰ Chayrayku qolqe metalmanta, qorimanta, broncemantawan ruwasqa imakunatawan apachispa, churin Joranta kacharqa kuraj kamachej Davidta napaykuchejta: Allinpuni Hadad Ezerta maqanakupi atipasqaykeqa, nispa. Ajinata ruwarqa, imaraykuchus ñawpajpi Toypis Hadad Ezerwan maqanakullasqataj.

¹¹ Chantá Davidqa tukuy apamusqankuta Tata Diosman qoporqa, waj suyumanta apamusqankumanta qolqe metalta, qorita ima chaykunatawan khuska qorqa. Chaykunataqa kay atipasqan suyukunamanta apamorqanku:

¹² Siriamanta, Moabmanta, Amonmanta, filisteokunamanta, jinataj amalecitakunamantapis. Sobaj kuraj kamachejnin Rejobpa churin Hadad Ezermanta qhechusqantapis Diosman qollarqataj.

¹³ Davidqa may uyarisqa karqa. Arameokunata atipasqanmanta kutimushaspataj, Kachi nisqa vallepi wañuchillarqataj 18.000 edomitakunata.

¹⁴ Chaymantaqa qhawaj soldadokunata churallarqataj tukuy Edom jallp'aman, edomitakunataj Davidpa kamachinkunaman tukorqanku. Ajinamanta Davidqa mayman risqanpipis Tata Diospa yanapayninwan atipallarqapuni.

Davidpa yanapajninkuna

¹⁵ Davidqa tukuy Israel suyupi cheqan kajta ruwaspa kamacherqa.

¹⁶ Soldadonkunata kamachejqa Seruyáj churin Joab karqa. Ajiludpa churin Josafattaj Israel suyoj qhelqerin karqa.

¹⁷ Ajitobpa churin Sadoc, chantá Abiatarpa churin Ajimélec imaqa sacerdotekuna karqanku. Seraiastaj Davidpa qhelqerin karqa.

¹⁸ Joyadáj churin Benaiastaj quereteokunaj, peleteokunaj kamachejninku karqa. Davidpa churinkunataj sacerdotekuna karqanku.