2 Samuel 7 - DIOSPA QHELQACHISQ

Diosqa Davidta saminchananta nin

¹ Kuraj kamachej Davidqa kamachinan wasipiña tiyakushajtin, Tata Diosqa muyuyninpi kaj awqankunawan ch'ajwata chinkacherqa.

² Chaypacha kuraj kamachej Davidqa Diosmanta sut'inchaj Natanta nerqa: Qhawariy, noqaqa sumaj pinomanta ruwasqa wasipi tiyarikushani, Diospa arcantajrí toldollapi kashan, nispa.

³ Natantaj kuticherqa: Ruwallay tukuy imatachus yuyashanki, chayta. Tata Diosqa yanapasonqa, nispa.

⁴ Chay ch'isipachataj Tata Diosqa Natanta nerqa:

⁵ Riy, parlamuy kamachiy Davidwan, willaytaj noqa Tata Dios imatachus payman nisqayta: Mana qanchu noqapajqa uj templota ruwanki chaypi tiyakunaypaj.

⁶ Egiptomanta orqhomorqani israelitakunata, chaymantapacha kunankama mana mayqen wasipichu tiyakorqani, manachayqa toldollapi tiyakuspa, kayman jaqayman purerqani.

⁷ Israelitakunawan purisqaymantapachaqa, pikunatachus churarqani Israel ayllupi kamachinankupaj, chaykunamanta mana mañarqanichu pinomanta templota ruwapunawankutaqa, nispa.

⁸ Chayrayku kamachiy Davidta niy: Ajinata Tukuy Atiyniyoj Tata Dios nisunki: Noqa ovejakunaj qhepanmanta orqhomorqayki, Israel aylluypaj kamachejnin kanaykipaj.

⁹ Tukuy puriyniykipi qanllawanpuni karqani, awqaykikunata tukuchispa. Sumaj uyarisqa runaman tukuchiyki kay pachapi may uyarisqa runakunata jina.

¹⁰ Chay jawaqa wakichillarqanitaj uj cheqata Israel aylluypaj, chaypitaj paykunata churarqani kikin jallp'ankupi tiyakunankupaj. Ajinamanta mana pipis paykunawan chejninakonqankuchu, nitaj chay sajra ruwaj runakunapis ñawpajpi jina paykunata llakichenqankuchu,

¹¹ imaynatachus paykunata ruwarqanku juez nisqa kamachejkunata churashajtiy, ajinata. Manallataj saqesajchu awqaykikuna imatapis ruwasojta. Chantapis noqa ruwasaj wawaykikunamanta Israel suyuta kamachej kanallantapuni.

¹² Wañupojtiyki, wawaykikunallamantataj kuraj kamachej kananpaj churaspa, kamachinaykita sinch'ita sayachisaj.

¹³ Paymin templota ruwapuwanqa, noqataj wiñaypaj kamachinanta sayachisaj.

¹⁴ Noqaqa paypaj tata jina kasaj, paytaj waway jina kanqa. Imapi juchallikojtinpis, noqa payta wanananpaj jasut'isaj, imaynatachus uj tata wawanta jasut'in, jinata.

¹⁵ Chaywanpis paymanta khuyakullasajpuni, manataj Saulta jinachu saqerpasaj. Saulta wijch'uspa, qanta churarqayki.

¹⁶ Mirayniykita, kamachinaykitapis noqa wiñaypaj waqaychasaj, ajinallatataj wiñaypaj churasqa kanqa, nispa.

¹⁷ Natanqa chay tukuyta Davidman willarqa, imaynatachus mosqoypi jina rikusqanta, uyarisqantapis.

Davidqa Tata Diosta pachis nin

¹⁸ Chaypacha kuraj kamachej Davidqa Tata Diospa ñawpaqenman yaykuspa, nerqa: Tukuyta Kamachej Tata Dios, pitaj noqa kasqani, pitaj aylluypis kasqa, kayta noqawan ruwanaykipaj?

¹⁹ Chaypis mana chayllachu. Tata Dios, noqa kamachiykej miraynin imayna kananmantapis parlallawankitaj. Mana pipis qan jina ruwajqa kanchu.

²⁰ Imatawantaj niykiman, Tukuyta Kamachej Tata Dios? Qanqa noqa kamachiykitaqa sumajta rejsiwanki.

²¹ Tukuy kay t'ukuna imakunata qanpuni ruwarqanki nisqaykiman, munasqaykiman jinataj, noqaman yachachinawaykipaj.

²² Chayraykumin jatunchasqa kanki, Tukuyta Kamachej Tata Diosníy. Mana pipis qan jinaqa kanchu, manataj qanmanta jawaqa waj dios kanchu, noqayku uyarisqaykuman jinaqa.

²³ Kay pachapi Israel aylluyki jinaqa mana waj ayllu kanchu. Qan, Diosníy, aylluyki kananpaj preciota pagaspa Israelta kacharicherqanki, may uyarisqa kanantataj ruwarqanki, payrayku jatuchaj may t'ukuna k'acha imakunata ruwaspa. Egiptomanta orqhomorqanki, chay aylluykej ñawpaqenmantataj qan chay waj runakunata, diosninkutawan wijch'orqanki.

²⁴ Qan churarqanki Israelta wiñaypaj aylluyki kananpaj, Tata Diosnin kanaykipajtaj.

²⁵ Ajinaqa, Tata Diosníy, noqa kamachiykiman, mirayniymanpis nisqaykitaqa wiñaypaj junt'ay, nisqaykiman jinataj ruway.

²⁶ Sutiykeqa jatunchasqapuni kachun, nichunkutaj Tukuy Atiyniyoj Tata Dios Israelpa Diosnin kasqaykita. Noqaj mirayneyqa ñawpaqeykipi sumaj sayachisqa kachun.

²⁷ Qan, Israelpa Tukuy Atiyniyoj Tata Diosnin, niwarqanki mirayniymanta churiykunaqa kamachinallankutapuni, chayrayku kayta mañarikuyki.

²⁸ Qanqa Tukuyta Kamachej Tata Dios kanki, nisqaykeqa cheqanpuni. Noqa kamachiykiman chay jina k'acha imakunata niwanki.

²⁹ Kunanqa aylluyta saminchay qanpa ñawpaqeykipi wiñaypaj kanallanpajpuni. Qan, Tukuyta Kamachej Tata Diosníy, niwarqanki: Qanpa mirayniykeqa wiñaypaj saminchasqa kanqa, nispa.