2 Samuel 4 - DIOSPA QHELQACHISQ

Isbosetta wañuchinku

¹ Saulpa churin Isbosetqa Hebronpi Abner wañusqanta yachaspa kharkarqa, Israel suyupi tukuy runataj manchachikuyta qallarerqanku.

² Isbosetpataqa tiyarqa iskay yanapajninkuna, chaykunataj suwajkunaj kamachejninku karqanku. Ujninpata Baná sutin karqa, ujninpatataj Recab. Paykunaqa Berot llajtamanta Rimonpa churinkuna karqanku. Berot llajtaqa Benjaminpa jap'iyninpi karqa.

³ Berotmanta kajkunaqa ayqesqanku Guitayin llajtaman, chaypitaj kunankama karu llajtayoj runakuna jina tiyakushanku.

⁴ Saulpa churin Jonatanpata uj churin karqa Mefiboset sutiyoj. Payqa wist'u chakiyoj karqa. Mefiboset phishqa watayoj kashajtin, Saulwan, Jonatanwan wañusqanku Jezrelpi yachakorqa. Chaypacha uywaqenqa Mefibosetta jap'ispa, paywan ayqerqa. Usqhayta ayqeshajtinkutaj, wawata pampaman atipachikorqa. Chaymantapachataj wist'u chaki karqa.

⁵ Berotmanta Rimonpa churinkuna Recabwan, Banawan Isbosetpa wasinman chayarqanku chawpi p'unchayta sinch'i ruphay kashajtin. Isboset wasinpi samarikoj jina puñukusharqa.

⁶ Wasi qhawaj warmi trigota wayrachishaspa, puñurparisqa. Chantá Recabwan, Banawan wasiman yaykorqanku mana rikuchikuspalla.

⁷ Jinaqa wasiman yaykuytawan, Isboset puñushajtin wañurparichiytawan, umanta qholurparerqanku. Chantá Isbosetpa umanta apariykukuspa, Arabá ñanninta tukuy tutantinta rerqanku.

⁸ Hebronman chayaspataj, kuraj kamachej Davidman Isbosetpa umanta rikucherqanku: Kuraj kamachejníy, kayqa Saulpa churin Isbosetpa uman. Saulqa mana allinpajchu qhawasorqa, wañuchiyta munasoj. Kunantaj Tata Dios qan Saulmanta vengakunaykita munan, jinataj mirayninmantapis, nispa.

⁹ Davidtajrí Recabta wawqen Banata, chay Berotmanta Rimonpa churinkunata nerqa: Tata Dios, pichus tukuy ñak'ariymanta librawarqa, paypa sutinrayku tiluspa, niykichej:

¹⁰ Saulpa wañusqanta willawajta jap'ichispa, Siclagpi wañuchicherqani.

¹¹ Kunanqa chaymanta astawanraj qankuna sajra runakunawanqa ruwasaj, chay mana juchayoj runata wasinpi puñukushajta wañuchisqaykichejrayku. Chayrayku qankunatapis wañuchillasqaykichejtaj, kay pachamantataj chinkachisqaykichej, nispa.

¹² Chaymanta Davidqa yanapajninkunata kamacherqa chay runakunata wañuchiytawan, makinkuta, chakinkutawan khuchunankuta, ayankutataj warkhunankuta Hebrón yaku qocha chaynejpi. Chaymantataj Isbosetpa umanta, Hebrón llajtapi Abner p'ampasqa karqa, chayman p'ampaykamorqanku.