2 Samuel 3 - DIOSPA QHELQACHISQ

¹ Saulpa ayllunmanta kajkunawan Davidpa ayllunwan maqanakoqa unayta karqa. Davidqa aswan atiyniyojman tukusharqa, Saulpamanta kajkunatajrí pisiyapusharqanku.

Davidpa churinkuna

² Hebrón llajtapi David tiyakushajtin, wawankunaqa kaykuna karqanku: Jezrel llajtayoj Ajinoanpi kuraj churin Amnón,

³ Carmel llajtayoj wañoj Nabalpa warmin Abigailpa churin Quilab, Gesur llajtaj kuraj kamachejnin Talmaypa ususin Macáj churin Absalón ima.

⁴ Kallarqankutaj: Jaguitpa churin Adonías, Abitalpa churin Sefatías,

⁵ Eglaj churintaj Itreán ima. Chay tukuy wawankuna karqanku Hebrón llajtapi David tiyakushajtin.

Abnerqa Davidwan tratota ruwan

⁶ Saulpa ayllunwan, Davidpa ayllunwan ima maqanakupi kashajtinku, Abnerqa aswan atiyniyojman Saulpa ayllunpi tukusharqa.

⁷ Chantá Saulpata ujnin warmin karqa Rispá sutiyoj, Ayáj ususin. Abnertaj chay warmiwan puñuykakapusqa. Chayraykutaj Isbosetqa Abnerta k'amispa, nerqa: Imaraykutaj tataypa ujnin warminwan puñuykakaporqankiri? nispa.

⁸ Abnertaj Isboset k'amisqanmanta phiñakuspa, kuticherqa: Judá llajta alqochu kasqani ruwasqaymanta mana pagoyoj kanaypaj? Noqaqa sumajta yanaparqani tatayki Saulta, paypa ayllunta, kawsaqenkunatawan ima. Davidpa makinmanpis mana jaywaykorqaykichu. Qantaj juchachawankimanchu kasqa kay warmimanta?

⁹ Kunanqa Dios sinch'ita jasut'iwachun manachus Davidwan ruwayman Tata Diospa nisqanman jina chayqa.

¹⁰ Saulpa ayllunmanta kamachinanta qhechuspa, Davidta churasaj Israel ayllupi, jinataj Judá ayllupipis kuraj kamachej kananpaj, Dan llajtamanta Berseba llajtakama, nispa.

¹¹ Isbosettajrí mana uj simillatapis Abnerman kutichiyta aterqachu, manchachikusqanrayku.

¹² Chantá Abnerqa Davidman willacherqa: Pejpatataj kay suyu, manachu qanpata? Noqawan uj tratota ruwana, noqataj atisqayta ruwasaj tukuy Israel ayllu qanman kutimpunanpaj, nispa.

¹³ Davidtaj kuticherqa: Walej kanman qanwan tratota ruwananchej, kay nisusqayta ruwanayki kajtenqa: Jamuwaspaqa, pusamunawaykipuni tiyan Saulpa ususin Micalta, nispa.

¹⁴ Chay jawa Davidqa kachallarqataj Isbosetman kayta willanankupaj: Kutichipuway warmiy Micalta, imaraykuchus paymanta pachaj filisteokunajpa phichilunkoj ch'ulunta orqhospa pagarqani, nispa.

¹⁵ Chantá Isbosetqa kamacherqa Laispa churin Paltielmanta warmin Micalta qhechunankuta.

¹⁶ Paltieltaj warminpa qhepanta waqaspa rerqa Bajurín llajtakama. Chaypitaj Abnerqa Paltielta kamacherqa kutipunanta, jinataj payqa kutiporqa.

¹⁷ Aswan qhepanejta, Abnerqa parlarqa Israelpa kurajninkunawan: Ñawpajmantaña qankunaqa David jatun kamachiykichej kananta mask'asharqankichej.

¹⁸ Kunanqa Davidta kuraj kamachejniykichej kananpaj churaychej, imaraykuchus Tata Dios nerqapuni paynejta Israel suyuta kacharichinanta filisteokunaj makinkumanta, jinataj tukuy awqankumantapis, nispa.

¹⁹ Abnerqa parlallarqataj Benjamín ayllumanta kajkunawan. Chaymantataj rerqa Hebronkama Davidman willamunanpaj, Israel ayllu jinataj Benjamín ayllumanta kajkunapis imatachus ruwanayashasqankuta.

²⁰ Abnerqa iskay chunka runakunawan Hebronman chayarqa, David kasharqa, chayman. Davidtaj paypaj, chay runankunapaj ima sumaj mikhuyta wayk'ucherqa.

²¹ Chantá Abnerqa Davidta nerqa: Kunanqa rinay tiyan tukuy Israel ayllumanta kajkunata tantamoj qanwan uj tratota ruwanankupaj. Jinamanta qan paykunata kamachinki munasqaykiman jina, nispa. Chantá Davidqa Abnerta kacharpayarqa, paytaj kusisqa riporqa.

Joabqa Abnerta wañuchin

²² Joabtajrí Davidpa soldadonkunawan ima purisqankumanta chaypachapuni chayamushasqanku, tukuy imata maqanakupi qhechumusqankuta aparisqa. Abnerqa manaña Davidwanchu Hebronpi kasharqa. Payqa David kacharpayajtinkama ripusqa.

²³ Joab tukuy soldadonkunawan khuska chayamojtinkama, payman willarqanku Nerpa churin Abnerqa kuraj kamachej Davidwan kasqanta, chantá David kacharpayajtin, ripullasqanta.

²⁴ Chaypacha Joabqa kuraj kamachejta nerqa: Imatataj kayta ruwankiri, kuraj kamachejníy? Abnerqa qanman parlaj jamusqa, qanrí ripojta saqellasqanki.

²⁵ Manachu yachakunki, Nerpa churin Abnerqa qanta ch'awkiyasoj jamususqanta, wateqasojtaj, maymanchus risqaykita, tukuy ruwasqaykitapis yachananpaj? nispa.

²⁶ Jinapi Joabqa Davidwan parlasqanmanta llojsiytawan, Abnerta mask'achejta kacharqa, Davidpa mana yachasqallanta. Mask'ajkunataj Sira nisqa pujyumanta Abnerta kutichimorqanku.

²⁷ Hebronman Abner chayamojtinkama, Joabqa llajta punkumanta wajnejman pusarqorqa sapallankupi parlanankupaj. Chaypitajrí Joabqa Abnerta wijsanpi t'ojsispa, wañurparicherqa, wawqen Asaelta wañuchisqanmanta vengakuspa.

²⁸ David chayta yachaytawan, nerqa: Noqawan, israelitakunawanpis Nerpa churin Abner wañusqanmantaqa Tata Diospa ñawpaqenpi mana juchayojchu kayku.

²⁹ Tata Diosqa Joabta, aylluntawan kay juchamanta ñak'arichichun. Ayllunpi kallachunpuni yawar apay onqoywan, llejti onqoywan, chayrí wist'u chaki kaywan onqojkuna. Wañuchisqa kachunku, chayrí yarqhaymanta ñak'arichunku, nispa.

³⁰ Joabwan, Abisaywan Abnerta wañuchisqanku, Gabaón maqanakupi wawqenku Asaelta wañuchisqanrayku.

³¹ Chaymantaqa David kamacherqa Joabta, paywan kaj runankunata ima: P'achaykichejta llik'irakuspa, qhashqa p'achata churakuychej, Abner wañusqanmantataj waqaychej, nispa. Kuraj kamachej Davidtaj Abnerpaj ayan qhepanta rerqa.

³² Abnertaqa Hebrón llajtapi p'amparqanku. Abnerpa ayanta p'ampashajtinku, Davidqa mayta waqarqa, tukuy runapis waqallarqankutaj.

³³ Chaypacha Davidqa kay aya takiyta takerqa: Abner, imaraykutaj mana yuyayniyoj runa jina wañunayki karqari?

³⁴ Makiykeqa mana watasqachu karqa, nitaj chakiykipis t'inkisqachu. Imaynatachus runakuna wañuchejkunaj makinkupi wañunku, ajinallatataj qanpis wañorqanki, nispa. Tukuy runapis Abnermanta waqashallarqankupuni.

³⁵ Chantá tukuy runakuna Davidman jamuspa, imallatapis mikhurikunanta nerqanku. Davidtajrí tiluspa, paykunata nerqa: Tata Dios sinch'ita jasut'iwachun, manaraj ch'isiyamushajtin t'antata, chayrí imallatapis mikhuyman chayqa, nispa.

³⁶ Runakuna chayta yachaspa, allinmin nerqanku, kuraj kamachejpa tukuy ruwasqantaj allinpuni paykunaman rijch'arqa.

³⁷ Chay p'unchaypi tukuy israelitakunaqa cheqamanta yacharqanku kuraj kamachej Davidqa Nerpa churin Abnerpa wañusqanmanta mana juchayoj kasqanta.

³⁸ Chantá kuraj kamachejqa yanapajninkunata nerqa: Qankuna yachankichej jina, Israel ayllu ukhupi uj kuraj kamachej, jatun qhawasqa runa wañupusqanta.

³⁹ Diospa churasqan kuraj kamachej kani chaypis, mana kallpayoj jina kashani, Seruyáj churinkuna chay millayta ruwasqankurayku. Tata Diosqa chay juchankuman jina kutichipuchun ruwajkunamanqa, nispa.