2 Samuel 16 - DIOSPA QHELQACHISQ

Davidqa Sibawan parlan

¹ David orqota wasaykusqantawankama, Mefibosetpa kamachin Sibá llojsimorqa Davidta taripamoj. Payqa cargayoj iskay burrota qhatimorqa, chaypitaj 200 t'antata aparqa, pachaj kilo uva k'isata, pachaj higo k'isamanta t'antata, jinataj uj qara bota vinotawan.

² Kuraj kamachejqa payta taporqa: Imapajtaj kayta apamunki? nispa. Sibataj kuticherqa: Kay burrokunaqa kuraj kamachejpa wawankuna rinankupaj, t'anta, jinataj poqoykunapis soldadokuna mikhunankupaj, vinotaj ch'innejpi sayk'ojkuna ujyanankupaj, nispa.

³ Chantá kuraj kamachej taporqa: Maypitaj kashan uywaqeykej allchhinri? nispa. Sibataj kuticherqa: Jerusalenpi qhepakun. Payqa yuyan israelitakunaqa kuraj kamachej kananpaj churanankuta, nispa.

⁴ Kuraj kamachejtaj nerqa: Mefibosetpata tukuy imanchus karqa, chayqa kunanmanta qanpata, nispa. Sibataj kuraj kamachej ñawpaqenpi k'umuykuspa, nerqa: Walej kanman qanpa khuyakuyniykeqa noqallawanpuni kanan, nispa.

Simeyqa Davidta maldicin

⁵ Kuraj kamachej Davidqa Bajurín llajtaman chayamojtinkama, Saulpa ayllunmanta uj runa llojsimorqa Davidta taripamoj. Pay karqa Geraj churin Simey, paytaj Davidta maldicispa risharqa,

⁶ jinallataj Davidta, soldadonkunata, yanapajninkunata ima rumiwan ch'anqaraspa. Kuraj kamachejqa soldadonkunanejta, runankunanejta ima waqaychasqa kasharqa.

⁷ Simey sutiyoj runaqa kay jinata maldicispa nerqa: Llojsiy kaymanta, runa wañuchi, sajra runa.

⁸ Tata Dios jasut'ishasunki Saulpa ayllunmanta kajkunata wañurachisqaykimanta, paypa cuentanmanta kamachinaykipaj. Kunantaj Tata Diosqa kamachinaykita churiyki Absalonman jaywan. Kunanqa ruwasqaykiman jina llakiyman chayanki, imaraykuchus runa wañuchi kanki, nispa.

⁹ Chaypacha Seruyáj churin Abisayqa kuraj kamachejta nerqa: Imaraykutaj kay alqo wañusqa runa qanpa contraykipi qhayqeyakushanri? Kunanpacha umanta qholurpamusaj, nispa.

¹⁰ Kuraj kamachejtajrí kuticherqa: Kayqa mana qankunapajchu. Paychus jinata nishan chayqa, Tata Dios kamachisqanraykuchá nishan. Jina kajtenqa, pitaj ninman: Imaraykutaj chayta ruwashanki? nispa.

¹¹ Chantá Davidqa Abisayman, jinataj yanapajninkunatapis nerqa: Wawallaytaj wañuchiyta munashawan, Benjamín jatun ayllumanta kajqa astawanraj munanman. Saqeychej jinata contraypi parlajta. Tata Dioschá jinata kamachin.

¹² Ichapis Tata Diosqa kay llakiyniyta rikuspa, maldiciwasqanta saminchayman tukuchinman, nispa.

¹³ Davidwan, runankunawanqa rillarqankupuni, Simeytaj chay orqoj uj lado kinrayninta Davidta maldicispallapuni risharqa, rumiwan ch'anqaraspa, jallp'ata qhalliraspa ima.

¹⁴ Kuraj kamachej, paywan risharqanku runakuna ima may sayk'usqa kaspa, Jordán mayupi samarikorqanku.

Absalón Jerusalenman yaykun

¹⁵ Chaykamataj Absalonqa israelitakunawan, jinataj Ajitofelwan ima Jerusalenman yaykorqa.

¹⁶ Chantá Davidpa kawsaqen Jusay arquitaqa Absalonwan tinkumoj rispa, qhaparerqa: Jallalla kachun, jallalla kachun kuraj kamachejqa, nispa.

¹⁷ Chantá Absalonqa Jusayta nerqa: Ajinatachu kawsaqeykita saqerparinki? Imaraykutaj mana paywan riporqankichu? nispa.

¹⁸ Jusaytaj kuticherqa: Mana riyta atiymanchu. Noqaqa, pitachus Tata Dios ajllakorqa kuraj kamachej kananpaj, jinataj Israel ayllupis ajllakorqa, chaywan kanay tiyan.

¹⁹ Pejpa kamachinninpi kanman? Manachu Davidpa churinpa kamachinpi kanmanri? Imaynatachus tataykej kamachinpi karqani, ajinata qanpaj kamachiykipi kasaj, nispa.

²⁰ Aswan qhepanejman Absalonqa Ajitofelta taporqa: Imatataj ruwanaykuta umachawaykumanri? nispa.

²¹ Ajitofeltaj Absalonman kuticherqa: Tatayki kamachinan wasita qhawanankupaj saqerqa, chay ujnin warminkunawan puñuykamuy. Ajinamanta tukuy israelitakuna tataykiwan phiñanakusqaykita yachanqanku. Jinamanta astawan kallpachakonqanku qanman kutisqa kashanku, chaykunaqa, nispa.

²² Chantá altopata wasi patiopi uj toldota Absalonpaj churaporqanku, chaypitaj tukuy Israel ayllu rikunanta, tatanpa waj warminkunawan puñuykakaporqa.

²³ Chay p'unchaypeqa Ajitofelpa umachasqanta jap'ikoyqa Diospa simi nisqanta jap'ikuywan ninakorqa. Chayrayku Ajitofelpa yuyaychasqanqa Davidpaj, jinataj Absalonpajpis kasunapaj jina karqa.