2 Samuel 12 - DIOSPA QHELQACHISQ

Natán Davidta k'amin

¹ Tata Diosqa sut'inchajnin Natanta Davidman kacharqa. Wasinman yaykuspataj, Natanqa Davidta nerqa: Uj llajtapi iskay runakuna tiyakusqanku. Ujnenqa qhapaj kasqa, ujnintaj wajcha.

² Chay qhapaj runajtaqa ovejankuna, wakankuna ima ashkha tiyapusqa.

³ Wajcha runajtarí rantikusqan uj k'ata ovejitallan kapusqa. May munasqata uywakusqa, ovejitataj paywan, wawankunawan khuska wiñasqa. Mikhunanmanta mikhuchisqa, ujyananmantataj ujyachisqa, ojllayninpitaj puñuchisqa. Chay runaqa uj warmi wawanta jina ovejitanta munakusqa.

⁴ Uj kuti uj ñan purej chay qhapaj runaj wasinman chayakusqa. Chay qhapaj runataj chayakoj runaman mikhuyta jaywarinanpaj, mana munasqachu ni wakanmanta nitaj ovejanmantapis ñak'achiyta. Manachayqa chay wajcha runaj ovejitanta qhechuspa ñak'achisqa, wasinman chayakamoj runaman jaywarinanpaj, nispa.

⁵ Chayta uyariytawankama, Davidqa qhapaj runapaj manchayta phiñakorqa. Natantataj nerqa: Tata Diospa sutinrayku tiluni: Chay runaqa wañunanpuni tiyan.

⁶ Chantapis tawa ovejaj precionta kutichinan tiyan, mana uj chhikanta khuyakuspa ruwasqanrayku, nispa.

⁷ Chantá Natanqa Davidta nerqa: Qanmin chay runaqa kanki. Chayrayku Tata Dios nisunki: Israelpaj kuraj kamachejnin kanaykipaj noqa ajllakorqayki, Saulpa atiyninmantapis waqaycharqayki.

⁸ Kuraj kamachej wañoj Saulpa wasinta, warminkunatawan qorqayki. Jinataj Israel suyupi Judá suyupi kuraj kamachej kanaykipaj churallarqaykitaj. Chaychus pisi kanman karqa chayqa, astawanraj qoykiman karqa.

⁹ Imajtintaj nisqayta pisipaj qhawarqanki, mana munasqayta ruwaspari? Qan wañucherqanki jitita Uriasta. Amonitakunawan payta wañuchichispa, warminwan warmichakorqanki.

¹⁰ Chayrayku noqata pisipaj qhawawaspa, jitita Uriaspa warminta jap'ikapusqaykirayku, aylluyki ukhupi wañuchinakoqa kallanqapuni.

¹¹ Noqa Tata Dios nini: Aylluyki ukhullamantataj mana allinta jatarichisaj. Aylluykimanta ujninman warmiykikunata jaywaykusaj, paytaj tukuypa rikunanta p'unchaypi puñuykonqa.

¹² Noqatajrí, pakaypi ruwasqaykitaqa Israel runakunaj rikunanta, sut'i p'unchaypi rikuchisaj, nispa.

¹³ Chantá Davidqa Natanman kuticherqa: Tata Diospa contranpi juchallikuni, nispa. Natantaj kuticherqa: Tata Diosqa juchaykita pampachan. Chay jucharayku mana wañunkichu.

¹⁴ Chaywanpis Tata Diosta pisipaj qhawasqaykirayku, wawaykeqa wañonqapuni, nispa.

¹⁵ Natán wasinman kutipojtinkama, Tata Diosqa, Uriaspa warminpi Davidpa wawan karqa, chayta sinch'ita onqoykucherqa.

¹⁶ Chaypacha Davidqa wawanrayku Tata Diosmanta mañapuspa, ayunarqa, sapa ch'isitaj q'ara pampapi puñorqa.

¹⁷ Kamachinan wasipi tiyakoj kurajkuna rerqanku pampamanta sayarichiyta munaspa. Davidtajrí mana sayarikuyta munarqachu, nitaj paykunawan mikhorqachu.

¹⁸ Qanchis p'unchayninman wawaqa wañuporqa, Davidpa kamachinkunataj willamuyta manchachikuspa, ninakorqanku: Wawa kawsashajtillanraj, parlapayasqanchejta mana uyariwarqanchejchu. Kunantaj wawan wañupojtinñaqa, imaynatataj willasunmanri? Ichapis payqa imatapis ruwakunman, nispa.

¹⁹ Davidtajrí parlanakojta rikuspa, yacharqa wawan wañupusqantaña. Chayrayku paykunata taporqa: Wawayqa wañupunchu? nispa. Paykunataj kuticherqanku: Arí wañupun, nispa.

²⁰ Chaypacha Davidqa pampamanta jatarikuspa, mayllakorqa, sumaj q'apashaj jawinawan jawikorqa. P'achantapis wajta churakorqa. Chantá Dioswan Tinkukuna Toldoman Tata Diosta yupaychaj yaykorqa. Chaymantataj wasinman kutipuytawan, mikhunata mañakuspa, mikhorqa.

²¹ Jinapi kamachinkuna taporqanku: Kuraj kamachejniyku, imatataj ruwashankiri? Wawa kawsashajtillanrajqa, mana mikhuyta munarqankichu, payraykutaj waqarqanki. Kunantaj wawayki wañupojtinñarí, jatarikuspa, mikhushanki, nispa.

²² Davidtaj kuticherqa: Waway kawsashajtillanraj, ayunarqani, waqarqanipis, yuyaspa: Ichapis Tata Diosqa noqamanta khuyakuspa, wawayta kutirichinman, nispa.

²³ Kunantaj wañupojtinñarí, imapajñataj ayunasajri? Ni chaywan ni imawan kawsarichimusajñachu. Mana payqa noqaman kutimonqañachu. Aswanpis noqa payman risaj, nispa.

Salomón paqarisqan

²⁴ Chay qhepata Davidqa warmin Betsabeta sonqocharqa. Chantá paywan puñuykorqa, Betsabetaj wijsallikorqa. Jinataj uj qhari wawata paqarichikorqa, paytataj Salomón sutiwan suticharqa. Tata Diosrí chay wawata mayta munakorqa.

²⁵ Chayrayku Tata Diosqa sut'inchaj Natannejta willacherqa chay wawata Jedidías sutiwan sutichanankuta.

David Rabá llajtata jap'in

²⁶ Chaykama Joabqa amonitakunaj llajtanku Rabaman maqanakoj kachaykukuspa, kuraj kamachejpa tiyakunan llajtataj jap'iykusharqanña.

²⁷ Chayrayku Joabqa Davidman willacherqa: Rabá llajtata muyuykuspa, yaku pujyuta jap'iniña.

²⁸ Kunanqa qan, kuraj kamachejníy, wakin soldadokunata tantaykuytawan, chay llajtata jap'iy, ama noqa jap'ejtiy sutiyta churanankupaj, nispa.

²⁹ Chaypacha Davidqa tukuy soldadonkunata tantaykuspa, Rabáj contranpi maqanakoj rerqa, yaykuykuspataj, jap'erqa.

³⁰ Chantá chay llajtaj kuraj kamachejpa umanmanta pilluta qhechuspa, Davidman churaykorqanku. Chay pilloqa qorimanta karqa, k'acha rumikunawantaj k'achanchasqa, chantapis kinsa chunka kinsayoj kilo jina pesarqa. Davidqa apakapullarqataj chay llajtamanta waj valorniyoj imakunatawan.

³¹ Chay llajtamanta runakunatataj orqhomuspa, sinch'ita llank'acherqa sierrawan, chujchukawan, jachawan ima. Wakintataj ladrillota ruwachispa llank'acherqa. Chaymantaqa jinallatataj tukuy amonitakunata llank'achillarqataj. Chantá Davidqa Jerusalenman tukuy soldadonkunawan kutiporqa.