2 Samuel 10 - DIOSPA QHELQACHISQ

David arameokunata amonitakunata ima atipan

¹ Mana ancha unayninmanchu amonitakunaj kuraj kamachejninku Najás wañuporqa, paypa cuentanmantataj churin Janún kamacherqa.

² Chaypacha Davidqa sonqonpi nerqa: Noqaqa Najaspa churin Janunwan k'acha kasaj, imaynatachus tatan noqawan k'acha karqa, ajinata, nispa. Chayrayku yanapajninkunamanta wakinta kacharqa, tatan wañupusqanmanta Janunta sonqochanankupaj. Davidpa kachasqan amonitakunaj llajtankuman chayajtinkurí,

³ chay amonitakunaj kuraj kamachejninkoqa kuraj kamachejninku Janunta nerqanku: Qan kuraj kamachejníy, yuyankichu David chay runankunata kachamusqanta tataykej wañupusqanmanta qanta sonqochanasunpaj? Payqa kachamun sumajta kay llajtata qhawaranankupaj, wateqanankupajtaj, chantá jamuspa llajtanchejta jap'inankupaj, nispa.

⁴ Chayrayku Janunqa kamacherqa Davidpa kachasqankunata jap'inankuta, chantá sunkhankuta khuskanmanta k'uturparinankuta, p'achankunatapis siki patankunakama k'uturparinallankutataj. Jinaspataj, paykunata kacharpayaporqa.

⁵ Paykunaqa sinch'i p'enqasqa kasharqanku. Davidtaj chayta yachaspa, kamachinkunata kacharqa: Jericó llajtapi sunkhaykichej wiñanankama qhepakuychej, chaymantataj kutimpunkichej, nispa.

⁶ Amonitakunaqa yachakorqanku Davidqa paykunapaj phiñasqa kashasqanta. Chayrayku qolqeta pagaspa mink'akorqanku 20.000 soldadokunata Siriamanta, Bet Rejobpi kajkunamanta, chantá Sobapi kajkunamantawan. Mink'akullarqankutaj kuraj kamachej Macamanta 1.000 soldadonkunata, Istobmantataj 12.000 soldadokunatawan.

⁷ Chayta yachaspa, Davidqa Joabta tukuynin soldadonkunatawan kacharqa.

⁸ Amonitakunaqa llojsispa, kikin llajta yaykunapi maqanakunapaj wakichikorqanku. Chaykamataj arameo soldadokunaqa Sobamanta kajkuna, Rejobmanta kajkunapiwan, Istobmanta soldadokunawan, Macamanta kajkuna soldadokunapiwan imaqa chay pampakunapi wakichikorqanku.

⁹ Joabqa maypachachus ñawpajmanta jinataj qhepamantapis maqanakunankupaj muyuykusqankuta yachaspa, israelitakunamanta aswan sumachaj kaj soldadokunata ajllarqa, arameokunawan maqanakunanpajtaj wakichikorqa.

¹⁰ Wakin soldadokunatataj wawqen Abisaypa kamachiyninman churarqa amonitakunawan maqanakunanpaj.

¹¹ Paytaj nerqa: Sichus arameokuna noqata atipanayawashankuman chayqa, jamuspa yanapawanki. Sitajchus amonitakuna qanta atipanayashasunkuman chayqa, noqa jamuspa yanapasqayki.

¹² Kallpachakuy, suyunchejrayku, jinataj Diosninchejpa llajtankunarayku sinch'ita awqanchejwan maqanakunachej. Tata Diostaj munasqanman jina ruwachun, nispa.

¹³ Joabqa, soldadonkunawan khuska arameokunawan maqanakoj rerqa. Paykunataj Joabpa ñawpaqenta ayqerikaporqanku.

¹⁴ Amonitakunataj arameokunamanta kaj soldadokuna ayqesqankuta rikuytawan, paykunapis Abisaypata ñawpaqenta ayqellarqankutaj. Llajtankuman ayqekuspataj, pakakorqanku. Chantá Joabqa amonitakunawan manaña maqanakorqachu, Jerusalenmantaj kutiporqa.

¹⁵ Arameokunaqa israelitakunawan atipachikusqankuta yachaspa, watejmanta tantakullarqankutaj.

¹⁶ Chantá Hadad Ezerqa Éufrates mayu chimpapi kajkuna arameokunata wajyachimorqa, paykunataj Jelanman jamorqanku. Hadad Ezerpa soldadonkunata kamachejninku Sobactaj ñawpaqenkuta rerqa.

¹⁷ Chay imakunata Davidman willajtinku, payqa tukuy israelitakunata tantaykorqa. Jordán mayuta chimpaspataj, Jelanman chayarqa. Chaypitaj arameokunaqa Davidwan maqanakorqanku.

¹⁸ Chay kutipipis arameokunaqa israelitakunaj ñawpaqenkumanta ayqellarqankutaj. Chaypacha Davidqa tukuypi wañucherqa 40.000 caballopi maqanakoj soldadokunata, jinallataj 700 maqanakuna carretakunatapis phiriykullarqataj. Chay jawaqa arameo soldadokunaj kamachejninku Sobactapis David chaypi wañuchillarqataj.

¹⁹ Hadad Ezerta yanapaj kuraj kamachejkunaqa israelitakunawan atipaykuchikusqankuta rikuspa, israelitakunawan allinyakorqanku. Jinamanta israelitakunaj kamachinkupi karqanku. Chaymantapachataj arameokunaqa amonitakunata yanapayta manchachikorqanku.