2 Reyes 9 - DIOSPA QHELQACHISQ

Jehú Israel suyuta kamachin

¹ Ujpacha Eliseoqa Diospa sut'inchajnin kanapaj yachakojkunamanta ujninta wajyaspa, nerqa: Puririnaykipaj wakichikuy, aceite yuruta oqharispataj, Galaadpi Ramot llajtaman riy.

² Jaqayman chayaspataj, Nimsij allchhin, Josafatpa churin Jehuta mask'anki. Payta kawsaqenkunaj chawpinmanta wajyaspataj, waj wasiman pusaykunki.

³ Chantá yurupi aceite apasqaykita paypa umanman jich'aykuspa, ninki: Tata Dios, ajinata nisunki: Israel suyuta kamachinaykipaj noqa churayki, nispa. Jinaspataj, punkuta kichariytawan, mana sayarispa ayqemunki, nispa.

⁴ Chantá sut'inchajkunamanta chay waynaqa Galaadpi Ramot llajtaman rerqa.

⁵ Chayaspataj, soldadokunata kamachejkuna tantakuspa parlashajta tariparqa. Chantá nerqa: Wiraqochíy, ujta nisuyta munashani, nispa. Jehutaj taporqa: Mayqenniykuwantaj parlayta munankiri? nispa. Paytaj nerqa: Qanwan, wiraqochíy, nispa.

⁶ Chantá Jehú sayarispa, wasiman yaykorqa. Diospa sut'inchajnintaj Jehúj umanta aceitewan jawiykuspa, nerqa: Israelpa Tata Diosnin ajinata nisunki: Noqaqa Israel suyuta kamachinaykipaj churayki.

⁷ Wiraqochiyki Ajabpa ayllunta tukuyninta wañuchispa tukuchinki. Ajinata pagachikusaj Jezabel noqamanta sut'inchajkunata, jinataj kamachiykunata wañuchisqanmanta.

⁸ Ajabpa ayllunmanta qharikunata, kamachikunata, mana kamachikunatawan ima, tukuyninkuta Israel suyumanta chinkachisaj.

⁹ Imaynatachus Nabatpata churin Jeroboanpa ayllunwan ruwarqani, jinataj Ajiaspa churin Basáj ayllunwanpis, ajinallatataj Ajabpata ayllunwan ruwasaj.

¹⁰ Jezabelpa ayantaqa Jezrelpa jallp'anpi alqokuna mikhonqanku, manataj pipis paytaqa p'ampaj kanqachu, nispa. Chayta niytawan, waynaqa punkuta kicharispa, ayqerikaporqa.

¹¹ Chantá Jehú llojsimojtin, wiraqochinta yanapajkuna taporqanku: Tukuy imapis allillanchu kashan? Imamantaj chay uman t'ojpisqa jamusqari? nispa. Paytaj nerqa: Qankuna chay runata rejsinkichej, imatachus parlasqantapis yachallankichejtaj, nispa.

¹² Paykunataj kuticherqanku: Llullakushanki. Cheqanta willawayku, nispa. Chantá Jehú nerqa: Kay jinata niwan: Tata Dios kay jinata nisunki: Israel suyuta kamachinaykipaj noqa churayki, nispa.

¹³ Chantá paykunaqa usqhayllata poncho jina qhatanankuta orqhokuspa, wicharina pataman mast'aykorqanku. Chantá chay pataman Jehuta tiyaykucherqanku, putututa waqachispataj qhaparerqanku: Jallalla, kuraj kamachejninchejqa Jehú, nispa.

Jehú Joranta wañuchin

¹⁴ Ajinata Nimsij allchhin, Josafatpa churin Jehú, Joranpa contranpi oqharikorqa. Joranrí tukuy israelita soldadonkunawan Galaadpi Ramot llajtata jark'asharqanku, Siriata kuraj kamachej Jazael chay llajtata jap'iyta munaspa, contrankupi maqanakoj jamusqanrayku.

¹⁵ Joranqa Jezrelman kutipusqa, Siriata kuraj kamachej Jazaelpa contranta maqanakoj risqanpi k'iriykusqankumanta jampichikunanpaj. Jehutaj paywan kashajkunata nerqa: Sichus qankuna kuraj kamachej kanayta munankichej chayqa, sumajta qhawaychej, kay llajtamanta ama pipis ayqespa Joranman willamunanpaj, nispa.

¹⁶ Chantá Jehuqa carretanman wichariytawan, Jezrelman kachaykukorqa, maypichus Jorán onqosqa kasharqa, chayman. Judá suyuta kuraj kamachej Ocoziaspis Joranta watukoj rillasqataj.

¹⁷ Chantá Jezrel llajtapi torre patamanta qhawaj soldadoqa Jehujpa soldadonkunata jamushajta rikuspa, qhaparerqa: Ashkha soldado jamushajta rikushani, nispa. Kuraj kamachej Jorantaj kamacherqa: Uj caballopi soldadota kachay, allin sonqochus manachus jamushasqanta yachamunanpaj, nispa.

¹⁸ Chantá chay soldadoqa Jehuta taripaspa, nerqa: Kuraj kamachej tapusojta kachamuwan, allin sonqochus manachus jamushasqaykita, nispa. Jehutaj nerqa: Allinpis, imapis kachun, qanpata ima ruwanayki tiyan? Noqawan khuska kutiriy, nispa. Chantá torre patamanta qhawaj soldadoqa kuraj kamachejman willarqa: Kachasqanchejqa taripanankama chayan, manataj kutimunchu, nispa.

¹⁹ Chantá kuraj kamachejqa wajtañataj kacharqa, paytaj Jehuta taripaytawan, taporqa: Kuraj kamachej yachayta munan, allin sonqochus jamushasqaykita, nispa. Jehutaj nerqa: Allinpis, imapis kachun, qanpata ima ruwanayki tiyan? Noqawan khuska kutiriy, nispa.

²⁰ Chantá torre patamanta qhawaj soldadoqa kuraj kamachejman willallarqataj: Paypis chayallantaj, manataj kutimunchu. Carretata purichejrí Nimsij allchhin Jehuman rijch'akun, imaraykuchus imata jina phawamushan, nispa.

²¹ Chantá Jorán nerqa: Carretayman caballokunata wataychej, nispa. Carretan ñapis watachisqaña kajtin, Joranwan, chantá Judá suyuta kuraj kamachej Ocoziaswan ima sapa ujninku carretankupi Jehuta taripaj llojserqanku. Paytataj Jezrelmanta Nabotpata jallp'anpi tariparqanku.

²² Chantá Joranqa Jehuta taporqa: Allin sonqowanchu jamushanki? nispa. Paytajrí kuticherqa: Imaynatá allin sonqo jamushayman, mamayki Jezabel lantikunata yupaychaspallapuni, chantá layqeriyoman qokuspallapuni kashajtinri? nispa.

²³ Chantá Joranqa carretanta muyurichiytawan ayqerqa, Ocoziasman qhaparispataj, nerqa: Wasanchawanchej Ocozías, ayqena, nispa.

²⁴ Chantá Jehuqa flechana arconta orqhokuytawan, uj flechata kachaykorqa. Chaytaj Joranpa wasanman sat'ikuspa, sonqonnejta llojserqa, kikin carretanpitaj wañusqa wijch'ukorqa.

²⁵ Jehutaj yanapajnin Bidcarta nerqa: Joranpa ayanta oqharispa, Jezrelpi Nabotpa jallp'anman wijch'umuy. Yuyariy, qanwan noqawan tatan Ajabpata carretankunata purichishajtinchej, Tata Dios kay jinata nisqanta:

²⁶ Qayna Nabotta, chantá wawankunata ima kaypi wañuchisqaykita rikorqani. Noqarí sut'ita niyki: Kay kikin cheqallapitaj qanmanta vengakusaj, nispa. Chayrayku Ajabpa churin Joranpa ayanta Nabotpa jallp'anman wijch'uykuy, ajinata Tata Diospa nisqan junt'akunanpaj, nispa.

Jehú Ocoziasta wañuchin

²⁷ Judá suyuta kuraj kamachej Ocoziastajrí imachus kashasqanta rikuspa, Bet Hagán llajtaman rej ñannejta ayqekorqa. Chantá Jehú payta qhatiykuspa, soldadonkunata nerqa: Paytapis wañuchillaychejtaj, nispa. Ocozías Ibleam llajta qayllapi, Gur sutiyoj wichayta carretanpi ayqeshajtin, paykuna arcowan flechaspa, parti wañusqata saqerparerqanku. Ocoziastaj Meguido llajtaman ayqekuspa, chaypi wañorqa.

²⁸ Chantá kamachinkunaqa ayanta uj carretapi Jerusalenman apakaporqanku, jaqaypitaj ñawpa tatankunaj covachanpi, Davidpata llajtan nisqapi ayanta p'amparqanku.

²⁹ Ajabpa churin Jorán chunka ujniyoj watataña kamachishajtin, Ocoziasqa Judá suyuta kamachiyta qallarisqa.

Jezabelta wañuchinku

³⁰ Chaymantataj Jehuqa Jezrelman rerqa. Jezabeltaj chayta yachaytawan, ñawinta pintaykukorqa, chujchantapis sumajta simp'aykukorqa. Jinaytawantaj, qhawananpaj ventanaman qayllaykorqa.

³¹ Jehú llajtaman yaykumushajtintaj, Jezabel payta qhaparerqa: Kuraj kamachejniykita wañuchej Zimri, imaynataj kashanki? nispa.

³² Jehutajrí ventanata qhawaspa, taporqa: Pikunataj noqawan kashankichejri? nispa. Chantá kamachina wasipi ruwanayoj kajkunamanta iskaychus kinsachus, ventanamanta qhawamorqanku.

³³ Jehutaj paykunata kamacherqa: Uraman chay warmita wijch'uykamuychej, nispa. Paykunataj Jezabelta uraman wijch'uykamorqanku. Jezabelpa yawarnintaj perqaman chantá caballokunaman ch'altarqa. Caballokunataj Jezabelta sarurparerqanku.

³⁴ Chantá Jehuqa wasi ukhuman yaykorqa. Mikhuyta, ujyayta tukuytawantaj, nerqa: Millayta ruwaj warmita qhawamuychej. Kuraj kamachejpata ususin kasqanrayku p'ampamuychej, nispa.

³⁵ Kamachikuna p'ampamoj rispatajrí, t'ojlunta, chantá chakinpata, makinpatapis tullullantaña tarerqanku.

³⁶ Kutimuspataj, Jehuman willarqanku. Paytaj nerqa: Kaywan Tata Diospa nisqan junt'akun, Tisbé llajtayoj Elías sut'inchasqanman jina. Pay nerqa: Jezrel jallp'api Jezabelpa ayanta alqokuna mikhukaponqanku.

³⁷ Jezabelpa ayantaj Jezrel jallp'api wanu jina qhallisqa kanqa, mana ni pipis niyta atinanpaj: Kayqa Jezabel, nispa.