2 Reyes 8 - DIOSPA QHELQACHISQ

Sunén llajtayoj warmiman jallp'anta kutichipunku

¹ Sunenpi tiyakoj warmej wawanta Eliseo kawsarichisqa, chay warmiman Eliseo aswan qhepaman nisqa: Tata Dios nin kay suyupi qanchis watata manchay yarqhay kananta. Chayrayku qanwan, tukuy aylluykiwan ima kaymanta ripuychej, maymanchá munankichej, chayman, nispa.

² Chantá warmeqa tukuy ayllunwan ima Diosmanta sut'inchajpa nisqanman jina Filistea suyuman riporqa. Chaypitaj qanchis watata tiyakamorqa.

³ Qanchis watamanta jina chay warmeqa Filistea suyumanta kutimporqa. Chayamuytawantaj, payqa kuraj kamachejpaman rispa, wasinta, jallp'antawan kutichipunanta mañakorqa.

⁴ Chaypacha kuraj kamachejqa Diosmanta sut'inchaj Eliseoj kamachin Guejaziwan parlasharqa: Willaway ari, Eliseoj manchay t'ukuna ruwasqanmanta, nispa.

⁵ Chantá Guejazí kuraj kamachejman willasharqa, Eliseo imaynatachus wañusqamantaña uj warmej wawanta kawsarichisqanmanta. Chayllaman chay warmi rikhurimorqa, kuraj kamachejman chimpaspataj, mañakaporqa wasinta, jallp'antawan ima kutichipunankuta. Chantá Guejazí kuraj kamachejta nerqa: Wiraqochi kamachejníy, kaymin chay warmeqa, kaytaj Eliseoj kawsarichisqan chay wawapis, nispa.

⁶ Chantá kuraj kamachejqa chay warmita taporqa, paytaj tukuy imata willarqa. Chaymantataj kuraj kamachejqa ujnin kaj yanapajninta kamacherqa: Kay warmiman tukuy imanta, chantá jallp'anpa poqoyninta ima kutichipuchunku, maypachachus riporqa chaymantapacha kunankama, nispa.

Jazael Siria suyuta kamachin

⁷ Chay qhepata Eliseoqa Damascoman rerqa. Chaypacha Siria suyuta kuraj kamachej Ben Adad onqosqa kasharqa, chantá payman willarqanku Diosmanta sut'inchaj chayman jamusqanta.

⁸ Chantá Ben Adadqa kamachin Jazaelta nerqa: T'inkata apariykukuspa, Diosmanta sut'inchajpaman riy. Chantá Tata Diosta tapuripunawanta ninki, kay onqoyniymanta qhaliyapusajchus chayrí manachus, chayta, nispa.

⁹ Jazaelqa Damascomanta aswan sumachaj imakunata tawa chunka camellokunaman chajnaykukuspa, Eliseota taripaj rerqa. Eliseo kasharqa, chayman chayaspataj, nerqa: Siria suyuta kuraj kamachej Ben Adadqa qanta tatanta jina qhawakusunki. Payqa qanta tapusunaypaj kachamuwan: Kay onqoyniymanta kutirisajchu, chayrí manachu? nispa.

¹⁰ Eliseotaj nerqa: Qhaliyapullanki, nispa nimullay. Chaywanpis Tata Diosqa ñapis willawanña payqa wañunantapuni, nispa.

¹¹ Chantá Diosmanta sut'inchajqa Jazaelta qhawallarqapuni, Jazaelpa uyan p'enqaymanta pukayarinankama. Chantá Eliseo waqayta qallarerqa.

¹² Jazaeltajrí payta taporqa: Wiraqochíy, imaraykutaj waqashankiri? nispa. Eliseotaj kuticherqa: Israelitakunata mana allinta ruwaspa ñak'arichinaykita yachaniña: Perqawan muyurichisqa llajtakunata kanaykunki, waynakunata wañuchinki, wawakunatapis ch'allparanki, onqoj warmikunaj wijsankutapis khallaranki, nispa.

¹³ Jazaeltajrí nerqa: Noqaqa imataj kasqaniri? Noqaqa uj alqo jinalla kani. Imaynata noqa chay jinata ruwaymanri? nispa. Eliseotaj nerqa: Ñapis Tata Diosqa niwanña, qanqa Siria suyuta kamachinaykita, nispa.

¹⁴ Chantá Jazaelqa kuraj kamachejninman kutiporqa. Kuraj kamachejtaj taporqa: Ima nisunkitaj Eliseori? nispa. Jazaeltaj kuticherqa: Qhaliyapullanqa nisunki, nispa.

¹⁵ Q'ayantenqa uj phulluta joq'ochaykuspa, chaywan Ben Adadpa uyanta qhataykorqa. Ajinamanta pay wañorqa, cuentanpitaj Jazael kuraj kamachej jina kamachina tiyanapi tiyaykorqa.

Jorán Judá suyuta kamachin

¹⁶ Ajabpa churin Jorán Israel suyuta phishqa watataña kamachishajtin, Josafatpa churin Jorán Judá suyupi kamachiyta qallarerqa.

¹⁷ Kamachiyta qallarishaspa, kinsa chunka iskayniyoj watayoj karqa, Jerusalenmantapachataj pusaj watata kamacherqa.

¹⁸ Josafatpa churin Joranqa Israel suyuta kuraj kamachejkuna jina, jinataj Ajabpa ayllun jina Diosta mana kasuspa purerqa, imaraykuchus Ajabpa ujnin ususin paypa warmin karqa. Joranqa manapuni Tata Diospa munasqanman jinachu ruwarqa.

¹⁹ Chay tukuywanpis Tata Diosqa mana Judá suyuta chinkachiyta munarqachu, kamachin Davidta munakusqanrayku. Tata Diosqa Davidman nisqa, mirayninmanta kamachinanpaj tiyaykoj kanallantapuni.

²⁰ Jorán Judapi kamachishajtin, Edom suyumanta kajkuna kuraj kamachejta churakuspa, Judá suyoj contranpi oqharikorqanku.

²¹ Chantá Joranqa tukuynin soldadonkunawan, carretankunawan ima Sairman rerqa. Edomitakunarí paykunata muyuykorqanku. Jorantajrí carretata purichejkunata kamachejkuna ima, tutan sayarispa, edomitakunawan maqanakorqanku, ayqecherqankutaj.

²² Ajinata edomitakunaqa Judá suyoj makinmanta kacharichikorqanku, kunankamataj ajina kashan. Chaypachallataj Libnamanta kajkunapis Judá suyoj makinmanta kacharichikullarqankutaj.

²³ Jorán kamachishaspa, tukuy ima ruwasqan, chantá waj imakunata ruwasqan ima Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²⁴ Jorán wañupojtintaj, ñawpa tatan Davidpata llajtanpi ayanta p'amparqanku. Paypa cuentanmantataj churin Ocozías kamacherqa.

Ocozías Judá suyuta kamachin

²⁵ Ajabpa churin Jorán Israel suyuta chunka iskayniyoj watataña kamachishajtin, Joranpa churin Ocozías Judá suyuta kamachiyta qallarerqa.

²⁶ Ocozías kamachiyta qallarishaspa, iskay chunka iskayniyoj watayoj karqa, Jerusalén llajtamantapachataj uj watata kamacherqa. Paypa mamanqa Israel suyuta kuraj kamachej Omrijpa ususin Atalía sutiyoj karqa.

²⁷ Ocozías Ajabpa ayllunwan aylluchakusqanrayku, paykuna jinallataj Tata Diospa ñawpaqenpi millayta ruwarqa. Chayrayku imatachus ruwasqanqa mana Tata Diospa munasqanman jinachu karqa.

²⁸ Ocoziasqa Ajabpa churin Joranwan ujchakorqa, Siria suyuta kuraj kamachej Jazaelpa contranpi, Galaadpi Ramot llajtaman maqanakoj rinankupaj. Siriamanta soldadokunatajrí maqanakuspa, Joranta wañuy patapi saqerparerqanku.

²⁹ Chayrayku kuraj kamachej Joranqa Jezrel llajtaman kutimporqa, Siriata kuraj kamachej Jazaelpa soldadokuna Ramotpi k'iriykusqankumanta jampichikunanpaj. Judá suyuta kuraj kamachej Ajab churin Ocoziastaj Jezrelman payta watukoj rerqa.