2 Reyes 7 - DIOSPA QHELQACHISQ

¹ Chantá Eliseo nerqa: Tata Diospa nisqanta uyariychej: Q'aya, kunanta jina, Samaria llajta punkupi uj arroba jak'u uj qolqellapi vendekonqa, iskay arroba cebadapis, uj qolqellapitaj, nispa.

² Kuraj kamachejpa yanapajnintajrí Diosmanta sut'inchajninta nerqa: Tata Dios janaj pachata kicharispa jich'aykamunman chaypis, mana nisqayki jinaqa kanmanchu, nispa. Eliseotaj kuticherqa: Qan chayta kikin ñawiykiwan rikunki. Jinapis, mana chaymanta mikhunkichu, nispa.

³ Chaypachallataj Samaria llajtaj punkunpi tawa llejtiwan onqosqa runakuna kasharqanku. Chaykunataj paykunapura ninakorqanku: Imatataj kaypi ruwashanchej wañupunanchejta suyaspari?

⁴ Sichus llajtaman yaykusunman chayqa, yarqhaymanta wañusunchej. Kay kikinpi qhepakusunman chayrí, wañullasuntaj. Siriokunaj jarankuman jaku rinachej. Sichus mana wañuchiwasun chayqa, kawsasunchej. Wañuchiwasun chaypis, wañusunchej, nispa.

⁵ Jinataj ch'isiyajtinkama Siriamanta soldadokunaj jarankuman rerqanku. Chantá siriokunaj jaranku qayllaman chayaspa, mana pipis chaypichu kasqanta repararqanku.

⁶ Ajina karqa, imaraykuchus siriokunaj jarankupi Tata Diosqa ashkha soldadoj purisqankuta, ashkha caballo, ashkha carreta ima purishasqankuta jina uyarichisqa. Chayta uyarispataj, siriokunaqa ujkuna ujkuna ninakorqanku: Israelitakunaqa jititakunata, Egiptomanta kamachejkunatawan mink'akuspa kachaykamushawanchej contranchejpi maqanakunankupaj, nispa.

⁷ Chayrayku ama wañuchisqa kanankupaj, paykunaqa tutayaykamojtinkama ayqekusqanku, toldonkukunata, caballonkukunata, chantá burronkukunata ima pachanpi saqerpayaspa.

⁸ Llejti onqoyniyoj runakunarí siriokunaj jarankuman chayaspa, uj toldoman yaykorqanku, chaypitaj mikhorqanku, ujyarqanku ima. Chaymantataj qolqeta, qorita, p'achakunatawan apakuspa, pakaykamorqanku. Chantá kutimuspa, uj toldomanñataj yaykorqanku, jinallataj tukuy kaj chhikata orqhospa pakaykamullarqankutaj.

⁹ Chantá paykunapura ninakorqanku: Mana allintachu ruwashanchej. Kunan sumaj kashan kayta willanapaj, noqanchejtaj ch'inlla kashanchej. Sichus sut'iyamunankama suyasun chayqa, juchachasqa kasunchej. Jaku ari, kuraj kamachejman willamunachej, nispa.

¹⁰ Paykunataj llajtaman kutiytawan, llajta punkuta qhawaj soldadokunata wajyaspa, willarqanku: Noqaykoqa siriokunaj jarankuman rerqayku, chaypitaj mana pitapis rikorqaykuchu. Ni runaj parlasqallanpis uyarikorqachu. Pachanpi caballokunalla, burronkukunapiwan watasqa kashanku. Jarankupis imaynachus karqa, jinapacha saqerpayasqa kashan, nispa.

¹¹ Chantá punkuta qhawajkunaqa chayta uyariytawan, qhaparispa kuraj kamachejpata kamachinan wasipi kajkunaman willarqanku.

¹² Kuraj kamachejtaj tutapacha jatarispa, capitankunata nerqa: Noqa nisqaykichej siriokuna imatachus ruwayta munashasqankuta. Paykuna yachanku noqanchej yarqhasqa kashasqanchejta. Chayrayku, toldonkumanta llojsispa, mayllamanchá pakaykakamunku. Ichapis nishanku: Israelitakuna llajtamanta llojsimojtinku, kawsashajllata jap'isunchej, chantataj llajtaman yaykuspa, jap'ikapusunchej, nispa.

¹³ Chantá ujnin kaj kamachej nerqa: Kashankuraj, chaykunamanta phishqa caballopi qhawamojkunata kachana, imachus kasqanta yachanankupaj. Wañonqanku, kawsanqanku chaypis, kikillanpuni kanqa. Sichus kayllapi qhepakonqanku chayqa, wañullanqankutaj, imaynatachus israelitakunamanta ashkhaña wañunku, ajinallatataj, nispa.

¹⁴ Chantá kuraj kamachejqa iskay carretaman caballokunata wataspa, siriokunaj jarankuta qhawamunankupaj soldadokunata kacharqa: Rispa, imachus kasqanta allinta yachamuychej, nispa.

¹⁵ Paykunataj qhatiykuspa, Jordán mayukama rerqanku, ñanpitaj p'achata wijch'urasqata, waj imakunatapis t'akarasqata rikorqanku. Siriamanta soldadokuna usqhayta ayqesqankupi tukuy imankuta t'akarasqanku. Chantá kachakuna kutimuytawan, imatachus rikusqankuta kuraj kamachejman willarqanku.

¹⁶ Chayta uyarispa, llajtapi kajkunaqa siriokunaj jarankuman rispa, tukuy imachus karqa, chaykunata apakamporqanku. Chantá Tata Diospa nisqanman jina, uj arroba jak'u uj qolqepi vendekorqa, iskay arroba cebadapis, uj qolqellapitaj vendekorqa.

¹⁷ Kuraj kamachejrí yanapajninta llajtaman yaykuna punkuta qhawananta nisqa. Chay runakunatajrí tanqanakuspa punkuta llojsishaspa, punku qhawajta wañunankama sarusqanku. Ajinata Diosmanta sut'inchaj Eliseojpa nisqan junt'akorqa, maypachachus kuraj kamachej payta watukoj risqa, chaypacha.

¹⁸ Diospata sut'inchajnin kuraj kamachejman nisqa: Samaria llajtaman yaykuna punkupi, q'aya kunanta jina uj arroba jak'u, uj qolqellapi vendekonqa, iskay arroba cebadapis uj qolqellapitaj, nispa.

¹⁹ Eliseoj nisqanmantaj kuraj kamachejpata yanapajnin kay jinata kutichisqa: Sichus Tata Dios janaj pachata kicharispa jich'aykamunman chaypis, chayqa mana jinachu kanman, nispa. Eliseotaj kutichisqa: Chaytaqa kikin ñawiykiwan rikunki. Chaywanpis, mana chaymanta mikhunkichu, nispa.

²⁰ Ajinapunitaj karqa: Runa k'iskinakuspa, llajtaman yaykuna punkupi kuraj kamachejpa yanapajninta sarurparerqanku, jinapitaj wañorqa.