2 Reyes 6 - DIOSPA QHELQACHISQ

Eliseo jachata tuytuchin

¹ Uj kuti Diosmanta sut'inchajkuna Eliseota nerqanku: Maynejpichus qanwan tiyakushayku, chaynejqa ancha k'iski.

² Chayrayku Jordán mayuman kachawayku, sapa uj sach'ata k'utuspa kurkuta apamunaykupaj, wasita ruwaspa chaypi tiyakunanchejpaj, nispa. Eliseotaj nerqa: Rillaychej, nispa.

³ Chantá paykunamanta ujnin kaj Eliseota nerqa: Qanpis noqaykuwan riy ari, nispa. Paytaj kuticherqa: Ya, risunchej, nispa.

⁴ Jinaqa Eliseopis paykunawan rerqa. Chantá Jordanman chayaspa, sach'ata k'utuyta qallarerqanku.

⁵ Jinapi, ujnin kaj sach'ata k'utushajtin, jachan mayuman urmaykorqa. Paytaj qhaparerqa: Wiraqochíy, chay jachaqa mañarisqalla karqa, nispa.

⁶ Chantá Eliseo taporqa: Maymantaj urmaykunri? nispa. Paytaj maymanchus urmaykusqanta rikucherqa. Chantá Eliseo uj k'aspita k'utuytawan, chaynejman choqaykorqa, jachataj tuytumorqa.

⁷ Eliseotaj nerqa: Oqharikapuy, nispa, paytaj oqharikaporqa.

Eliseo Siriamanta soldadokunata jap'ichin

⁸ Siriamanta kuraj kamachejqa israelitakunawan maqanakusharqa. Chantá soldadonkunata kamachejkunata tantaykuspa, nerqa: Jaqaynejpi, kaynejpitaj soldadokunata churasunchej, nispa.

⁹ Diosmanta sut'inchaj Eliseotajrí Israel suyuta kuraj kamachejman willachimorqa: Ama chaynejta rinkichu, imaraykuchus Siriamanta soldadokuna chaynejman rishanku, nispa.

¹⁰ Chantá Israel suyuta kuraj kamachejqa Eliseoj nisqanman jina, soldadokunata chaynejta qhawamunankuta kacharqa. Ajinata Diosmanta sut'inchaj Eliseo ashkha kutita kuraj kamachejman willarqa, paytaj paykunamanta llusp'erqa.

¹¹ Chayrayku Siriamanta kuraj kamachejqa manchayta phiñakorqa, soldadokunata kamachejkunata wajyaspataj, nerqa: Niwaychej, pitaj noqanchej ukhumanta Israelta kuraj kamachejman sayasqa kashan? nispa.

¹² Chantá ujnin kaj kamachej nerqa: Mana pipis, wiraqochíy. Manachayqa Eliseo Israel suyupi kashan, paymari Israel suyuta kuraj kamachejman sonqoykipi imatachus yuyasqaykita sut'inchashan, nispa.

¹³ Chantá Siria suyuta kuraj kamachej nerqa: Rispa, maypichus Eliseo kashasqanta yachamuychej jap'ichimunaypaj, nispa. Chantá nerqanku: Eliseoqa Dotán llajtapi kashan, nispa.

¹⁴ Jinataj kuraj kamachejqa chay llajtaman ashkha soldadokunata kacharqa, carretakunata, chantá caballopi maqakoj soldadonkunantinta ima. Paykunataj tutan jamuspa, Dotán llajtata muyuykorqanku.

¹⁵ Chantá q'ayantin paqarin Eliseoj kamachin tutamanta sayarispa, ashkha soldadota, caballopi maqanakoj soldadokunata, carretakunata ima llajtaj muyuyninpi kashajta rikorqa. Chantá Diosmanta sut'inchaj Eliseota nerqa: Ay, wiraqochíy, kunan imatataj ruwasunri? nispa.

¹⁶ Eliseotajrí nerqa: Ama mancharikuychu, imaraykuchus noqanchejwan kajkunaqa aswan ashkha kanku paykunawan kajkunamanta nisqaqa, nispa.

¹⁷ Chantá Eliseoqa Tata Diosmanta mañakorqa: Tata Dios, mañakuyki kay kamachiypa ñawinta kicharinaykita, nispa. Chantá Tata Diosqa Eliseoj kamachinpa ñawinta kicharerqa, paytaj qhawarispa, tukuy orqonejpi may chhika soldadokunata, caballontinta chantá nina carretantinta ima Eliseoj muyuyninpi rikorqa.

¹⁸ Siriamanta soldadokuna Eliseota jap'inankupaj jamushajtinku, Eliseoqa Tata Diosmanta mañakorqa: Tata Diosníy, mañakuyki kay runakunaj ñawinkuta laqhayachinaykita, nispa. Chantá Tata Diosqa Eliseo mañakusqanman jina, paykunaj ñawinkuta laqhayarparicherqa.

¹⁹ Chantá Eliseo chay soldadokunata nerqa: Mana kaychu ñanqa, nitaj kaychu chay llajtapis. Qhatiwaychej, noqataj pitachus mask'ashankichej chaykama pusasqaykichej, nispa. Chayta niytawan, soldadokunata Samaria llajtallaman pusaykorqa.

²⁰ Samaria llajtaman chayajtinkutaj, Eliseo Diosmanta mañakorqa: Tata Dios, kay runakunaj ñawinkuta qhawarichiy ari, nispa. Soldadokunaj ñawinkuta Tata Dios kicharejtintaj, Samaria llajta ukhupi kasqankuta repararqanku.

²¹ Chantá Israel suyuta kuraj kamachejqa Siriamanta soldadokunata rikuytawan, Eliseota nerqa: Tatáy, kay runakunata wañuchichisajchu? nispa.

²² Eliseotajrí kuticherqa: Ama paykunata wañuchiychu. Maqanakupi jap'isqayki runakunata wañuchiwajchu? Mikhunata, yakutawan qoy, chantataj kamachejninkuman kachapuy, nispa.

²³ Chantá Israel suyuta kuraj kamachejqa sumaj mikhuyta wayk'ucherqa. Siriamanta soldadokuna mikhuykojtinku, ujyaykojtinkutaj, llajtankuman kachaporqa. Paykunataj kamachejninkuman kutiporqanku. Chaymantapacha Siriamanta soldadokunaqa manaña ujtawanpis Israel suyoj contranpi jamorqankuchu.

Samaria llajtapi yarqhay

²⁴ Chaykuna qhepatataj, Siriata kuraj kamachej Ben Adad tukuynin soldadonkunata tantaykuspa, Samaria llajtata jap'inanpaj muyuykorqa.

²⁵ Chay jinata muyuykusqankurayku Samaria llajtapi manchay yarqhay karqa. Uj burro umata pusaj chunka qolqewan rantej kanku, joq'ori akaman rijch'asqa chuwitataj khuskan librata phishqa qolqewan rantej kanku.

²⁶ Uj kuti Israel suyuta kuraj kamachej perqa patanta pasarqoshajtin, uj warmi qhaparispa, nerqa: Wiraqochi kuraj kamachejníy, yanapariway ari, nispa.

²⁷ Paytaj kuticherqa: Sichus Tata Dios mana yanapasunkichu chayqa, imaynatataj noqa yanapaykimanri? Ni trigo, nitaj vinopis qosunaypaj tiyapuwanchu, nispa.

²⁸ Chantá kuraj kamachej taporqa: Imanantajri? nispa. Warmitaj kuticherqa: Kay warmi masiy niwarqa: Apamuy wawaykita mikhunanchejpaj, q'ayataj noqajtañataj mikhusunchej, nispa.

²⁹ Chantá noqaj wawayta wayk'uspa, mikhorqayku. Q'ayantintaj nerqani: Wawaykita apamuy payta mikhunanchejpaj, nispa. Kunantajrí pay wawanta pakaykamun, nispa.

³⁰ Chantá kuraj kamachej chay warmej nisqanta uyariytawan, p'achanta llik'irakorqa. Perqa patanejta pasashajtintaj, runakuna rikorqanku kuraj kamachejqa ukhunpi qhashqa p'acha churaykusqa kashasqanta.

³¹ Chantá nerqa: Manachus kunanpacha Safatpa churin Eliseoj umanta qholuchisaj chayqa, Tata Dios sinch'ita ñak'arichiwachun, nispa.

³² Chaypacha Eliseoqa wasinpi kurajkunawan khuska tiyasharqa, kuraj kamachejtaj payman uj runata kacharqa. Manaraj chay kacha chayamushajtin, Eliseoqa kurajkunata nerqa: Runa wañuchejpa churenqa uj runata kachamun umayta qholuchinawanpaj. Jinaqa chay kacha chayamojtinkama, punkuta sumajta wisq'aykunkichej. Amataj yaykumojta saqenkichejchu, imajtinchus paypa qhepanta kikin kuraj kamachej jamushan, nispa.

³³ Ajinata Eliseo paykunawan parlashajtillanraj, kachaqa chayamorqapacha. Chantá kuraj kamachejpa kachamusqan nerqa: Cheqapuni kay tukuy llakeyqa Tata Diosmanta jamun. Tata Dios yanapanawanchejta manaña suyaymanchu, nispa.