2 Reyes 5 - DIOSPA QHELQACHISQ

Namán llejti onqoymanta thañipun

¹ Uj runa Namán sutiyoj, Siria suyumanta soldadokunata kamachej karqa. Payqa Siriapi kuraj kamachejpaj manchay respetowan qhawasqa karqa, imaraykuchus paynejta Tata Diosqa Siria suyu atipananpaj yanapasqa. Chay runa maqanakunapaj may jina wapu kashaspapis, llejtiwan onqosqa karqa.

² Uj kuti, Siriamanta soldadokuna Israel suyuman suwaraj yaykuspa, uj malta sipasta jap'ispa apasqanku. Chay sipastataj Namanpa warminpa kamachin kananpaj qorqanku.

³ Jinapi chay sipasqa patronanta nerqa: Sichus wiraqochiy Namanqa Samariaman rispa, Diosmanta sut'inchajpa ñawpaqenman chayanman chayqa, sut'inchajqa llejti onqoyninmanta qhaliyachinman, nispa.

⁴ Chayta uyarispa, Namanqa kuraj kamachejpaman rispa, warminman sipas imatachus nisqanta willarqa.

⁵ Siriamanta kuraj kamachejtaj Namanta nerqa: Rillay, noqataj Israel suyuta kuraj kamachejman cartata apachisqayki, nispa. Jinataj Namán rerqa, 30.000 qolqeta, 6.000 qori phisuta, chunka mosoj p'achatawan ima apariykukuspa.

⁶ Jinallataj Israel suyuta kuraj kamachejpaj uj cartata aparqa. Chay cartapitaj ajinata nisqa: Maypachachus apachimususqay cartata jap'inki chaypacha, yachanki kamachiy Namanta noqa kachamususqayta, llejti onqoyninmanta qhaliyachipunaykipaj, nispa.

⁷ Chantá Israel suyuta kuraj kamachej cartata ñawiriytawankama, p'achanta llik'irakuspa, nerqa: Noqa Dioschu kasqani, runata wañuchinaypaj, kawsachinaypajpis, noqa chay runata qhaliyachinaypaj kachamunawanpajri? Qankuna allinta reparaychej: Kay runaqa maqanakuta mask'ashan, nispa.

⁸ Eliseorí Israel suyuta kuraj kamachej p'achanta llik'irakusqanta uyarispa, willajta kacharqa: Imaraykutaj qan p'achaykita llik'ikunkiri? Chay runata noqaman kachamuway. Jinamanta pay yachanqa Israel suyupi Diosmanta sut'inchaj kasqanta, nispa.

⁹ Jinapi Namanqa caballokunawan, carretanwan ima rispa, Eliseoj wasin punkupi sayarqa.

¹⁰ Eliseotajrí uj runata kacharqa ajinata ninanpaj: Jordán mayuman rispa, qanchis kutita p'ultikamuy, ukhuykitaj llejti onqoymanta llimphu rikhurenqa, nispa.

¹¹ Chayta uyariytawanrí, Namanqa manchay phiñasqa riporqa: Noqa yuyarqani pay kikin llojsimuspa, Tata Diosmanta mañapunawanta, makinta ukhuyman churaspataj llejti onqoyniymanta qhaliyachinawanta.

¹² Damascopi Abana mayu, Farfar mayuwan ima Israelpi mayukunamanta nisqaqa aswan sumaj mayu kanku. Sichus chaykunapi mayllakuyman chayqa, manachu qhaliyapuyman? nispa. Chantá chaymanta manchay phiñasqa riporqa.

¹³ Kamachinkunataj payman chimpaspa, nerqanku: Wiraqochíy, sichus Diosmanta sut'inchaj ruway mana atinata nisunkiman karqa chayqa, manachu ruwawaj karqa? Mayllakamuy, qhaliyapunkitaj, nispa nishasojtin, manachu kasullawaj? nispa.

¹⁴ Chantá Namanqa Jordán mayuman rispa, Diospa sut'inchajninpa nisqanman jina qanchis kutita p'ultiykakamorqa. Chaypipachataj ukhonqa wawaj ukhunman jina tukorqa, llimphuyachisqataj karqa.

¹⁵ Chaymanta Namanqa paywan tukuy rejkuna ima Eliseojpaman kutirerqanku. Chantá Eliseoj wasinman chayaspa, Namán nerqa: Kunan yachani kay pachantinpi mana waj Dios kasqanta, manachayqa Israel suyullapi. Chayrayku ama jina kaspa, apamusqaymanta waqeta jap'ikuway, nispa.

¹⁶ Eliseorí kuticherqa: Tata Diosrayku tiluni, pejpa kamachinpichus kani, chayrayku: Mana imatapis jap'ikuykimanchu, nispa. Namanqa munarqapuni imallatapis jap'ikunanta. Eliseorí manapuni jap'ikorqachu.

¹⁷ Jinallataj Namán nerqa: Ama jinachu kay, kay llajtaykimanta jallp'ata iskay mula apananta jina qoriway ari. Kunanmanta jaqaymanqa manaña waj dioskunaman uywa ñak'asqa q'olachisqata, nitaj jaywanata jaywasajchu, manachayqa Tata Diosllamanña jaywasaj.

¹⁸ Chaywanpis maypachachus wiraqochi kuraj kamachejneyqa diosnin Rimonpa yupaychana wasinman yupaychaj yaykuspa, noqapi atikonqa chaypachaqa, paywan khuska qonqorikusaj. Chay ruwasqayta Tata Dios pampachawachun ari, nispa.

¹⁹ Chantá Eliseo nerqa: Ama imamanta llakikuspa, walejllata ripuy, nispa. Namán manaraj karuta rishajtintajrí,

²⁰ Eliseoj kamachin Guejazí sonqonpi nerqa: Wiraqocheyqa chay sirio runa Namán apamusqanmanta mana imatapis jap'ikuyta munaspa kachapullan. Tata Diospa sutinrayku tiluni: Usqhayta rispa, taripamusaj. Ichapis imallatapis qowanman, nispa.

²¹ Chantá Guejaziqa Namanta taripaj kachaykukorqa. Namantaj Guejazita paypa qhepanta jamojta rikuspa, carretanmanta urayk'uspa, payta taripaj rerqa. Chantá taporqa: Imataj tiyanri? nispa.

²² Guejazitaj kuticherqa: Tukuy imapis allillan kashan. Jinapis wiraqochiy kachamuwan nisunaypaj: Efraín jatun aylloj jap'iyninpi, orqorara cheqanejpi sut'inchajkunamanta iskay waynakuna chayamunku. Ama jina kaspa, 3.000 qolqeta, iskay mosoj p'achatawan apachimuway ari, nispa.

²³ Chantá Namán nerqa: Ama jina kaspa, 6.000 qolqeta apay ari, nispa. Ajinata nispataj, Namanqa iskay costalman qolqeta wakiykucherqa, mosoj p'achatapis chayllamantaj churaykorqa. Chantá Guejaziwan khuska, iskay kamachinkunawan apacherqa.

²⁴ Orqoman chayajtinkutaj, Guejazí kamachikunamanta jap'ispa, wasinman waqaychaykorqa, jinaspataj Namanpa kamachinkunata kachaporqa.

²⁵ Chay qhepatataj wiraqochinman kutiporqa. Chantá Eliseo payta taporqa: Guejazí, maymantataj jamushankiri? nispa. Paytaj kuticherqa: Noqa mana maytapis rerqanichu, nispa.

²⁶ Chantá Eliseo nerqa: Uj runa carretanmanta urayk'amuspa qanman chimpamushasojtin, noqa sonqoypi yacharqaniña. Mana kunanchu qolqeta jap'inapaj tiempo. Manallataj kunanchu p'achata, olivo huertata, uva huertata, ovejakunata, wakakunata, wata runakunata rantina tiempoqa.

²⁷ Chayrayku Namanpa qosqanta jap'ikusqaykirayku, llejti onqoynin qanman wiñaypaj chimpaykusonqa, jinataj mirayniykimanpis, nispa. Jinamanta Guejaziqa Eliseoj ñawpaqenmanta llejti onqoyniyoj, rit'i jina yurajlla llojserqa.