2 Reyes 4 - DIOSPA QHELQACHISQ

Mana tukukoj aceite

¹ Uj kuti, Diospa sut'inchajninkunamanta ujninpa warmisapan waqaspa, Eliseoman willakorqa: Qosay wañupun. Yachanki jina payqa Tata Diosta kasuspa purerqa, qantapis yanapasorqa. Kunantaj manuriwarqayku chay runa, iskaynin wawaykunata wata runanpaj apakapuyta munashan, nispa.

² Eliseotaj taporqa: Yanapasunaypaj imatataj ruwapusunayta munankiri? Imataj wasiykipi tiyapusunki? nispa. Warmisapataj kuticherqa: Wasiypeqa mana imapis kanchu. Uj yuritupi pisi aceitellay tiyan, nispa.

³ Chantá Eliseo nerqa: Rispa, llajta masiykikunamanta ashkha ch'usaj yurukunata mañarikamuy, atisqaykitataj tantay.

⁴ Chantá wawaykikunawan khuska wasiykiman yaykuspa, punkuta wisq'aykakamuy. Jinaspataj, chay yurukunaman aceiteta jich'ay, junt'achiytawantaj, wajnejman churanki, nispa.

⁵ Chantá warmisapaqa wawankunawan khuska wasinman ripuspa, punkuta wisq'aykamorqa, chantá wawankuna yurukunata jaywasqankuman aceiteta jich'arqa.

⁶ Tukuy yurukunaman junt'ajtintaj, ujnin kaj wawanta nerqa: Astawan yuruta jaywaway, nispa. Wawantaj nerqa: Manaña yuru kanchu, nispa. Chantá aceite manaña ashkhayarqachu.

⁷ Chantá warmisapaqa Diospa sut'inchajnin Eliseoman rispa, chayta willarqa. Paytaj nerqa: Rispa, chay aceiteta vendemuy, manuykimantaj pagampuy. Puchoj qolqetaj, qanpaj chantá wawaykikunapaj ima kachun, nispa.

Eliseo uj wawata kawsarichin

⁸ Uj kuti Eliseo Sunén llajtanejta pasashajtin, uj qhapaj warmi Eliseota may jinata nerqa wasinman mikhoj rinanta. Eliseotaj sapa kuti Sunén llajtanejta pasaspa, chay warmej wasinman mikhoj riyta yachaj.

⁹ Chantá warmeqa qosanta nerqa: Sapa kuti wasinchejman mikhoj jamun, chay runaqa Diosmanta sut'inchajpunichá.

¹⁰ Manachu wasinchej patapi uj cuartota ruwachipusunman paypaj? Chaymantaj churapusunman uj puñunata, mesata, sillata, uj candelerotawan, mayk'ajpis noqanchejta watukoj jamuspa, chaypi puñukunanpaj, nispa. Ajinatataj ruwarqanku.

¹¹ Ujpacha Eliseo chaynejta jamuspa, cuartota ruwachipusqankupi puñukorqa.

¹² Chantá kamachin Guejazita nerqa: Sunenmanta warmita wajyamuy, nispa. Wajyamojtintaj, chay warmeqa usqhayllata Eliseoman jamorqa.

¹³ Chantá Eliseo kamachin Guejazita nerqa: Wasiyoj warmita kay jinata niy: Qanqa tukuy imata ruwaspa noqaykuta yanapawayku. Qanta yanapanaykupaj, imatataj ruwapuykumanri? Kuraj kamachejta, chayrí soldadokunata kamachejta parlapayapunaykuta munawajchu? nispa. Warmitaj kuticherqa: Mana imapis pisiwanchu, llajtaypi allillan tiyakushani, nispa.

¹⁴ Eliseotaj kamachinta nerqa: Imatataj paypaj ruwapusunmanri? nispa. Guejazitaj kuticherqa: Kay warmejta mana wawan kanchu, qosanpis machu runaña, nispa.

¹⁵ Chantá Eliseo nerqa: Payta wajyamuy, nispa. Pay wajyamojtintaj, warmeqa wasi punku chaynejllapi sayarikorqa.

¹⁶ Eliseotaj warmita nerqa: Wata kunanta jina, uj wawata q'epirikunki, nispa. Warmitajrí kuticherqa: Wiraqochíy, Diosmanta sut'inchaj ama ajinata nispa llullakuwaychu ari, nispa.

¹⁷ Chaywanpis warmeqa onqoj rikhurerqa. Watanpajtaj, Eliseoj nisqanman jina, uj wawata paqarichikorqa.

¹⁸ Chay wawataj wiñarqa. Uj kuti wawaqa, tatan chajrata ruthojkunawan kasharqa, chayman rerqa.

¹⁹ Jinapi tatanta nerqa: Ay, umallay, umay nanawan, nispa. Tatantaj ujnin kamachinta nerqa: Mamanman kay wawata pusapuway, nispa.

²⁰ Kamacheqa wawata mamanman pusarqa, mamantaj arphin patapi chawpi p'unchaykama tiyacherqa, chantataj wawa wañuporqa.

²¹ Chantá warmeqa wawanta Diosmanta sut'inchaj Eliseoj cuartonman apaspa, puñunan pataman churaykorqa. Punkuta wisq'aykuytawantaj, llojsiporqa.

²² Chantá qosanta wajyaspa, nerqa: Uj kamachiwan uj china burrota aysachimuway, Diosmanta sut'inchajpaman rerqonaypaj. Chantá usqhayllata kutimpusaj, nispa.

²³ Qosantaj nerqa: Imaraykutaj kunan paywan parlaj riyta munankiri? Mana killa rikhuriy jatun p'unchaychu, nitaj samarina p'unchaychu, nispa. Paytajrí nerqa: Ama imamantapis llakikushaychu, nispa.

²⁴ Chantá burrota caronaykuchiytawan, kamachita nerqa: Jaku, ñawpaqeyta riy. Noqa nisunaykama ama sayachispa usqhayta pusaway, nispa.

²⁵ Chantá warmeqa, Diosmanta sut'inchaj Carmelo orqopi kasharqa, chayman rerqa. Eliseotaj karumanta paykunata rikuspa, kamachin Guejazita nerqa: Sunén llajtayoj warmi jamushan.

²⁶ Usqhayta rispa, tariparqamuy, chantá tapuriy: Walejllachu kashanki? Qosaykirí allillanchu kashan, wawaykipis allillanchu? nispa. Guejazí tapumojtintaj, warmeqa kuticherqa: Allillan kashanku, nispa.

²⁷ Chaywanpis maypichus Diosmanta sut'inchaj kasharqa, chayman chayaytawan, chay warmeqa Eliseoj chakinmanta ch'ipaykukorqa. Chantá Guejazí chimpaykuspa, sayarichiyta munarqa. Eliseotajrí nerqa: Saqellay, imaraykuchus sonqon manchay phutisqa kashan, Tata Diostaj imamantachus llakisqa kashasqanta manaraj sut'inchawanchu, nispa.

²⁸ Chantá chay warmi nerqa: Wiraqochi noqaqa mana wawata mañakorqaykichu. Manachu nerqayki, mana q'otiyanawaykita? nispa.

²⁹ Chaymanta Eliseoqa kamachin Guejazita nerqa: Oqharikuy, varayta apariykukuspataj riy. Piwanpis ñanpi tinkuspaqa, ama napaykunkichu. Pi napaykusojtinkupis, ama uyarinkichu. Chayaspataj, kay varayta wawaj uyanman churaykunki, nispa.

³⁰ Chantá wawaj mamanqa Eliseota nerqa: Tata Diospa sutinrayku, qanpa sutiykirayku ima tiluni: Mana qanwanqa manapuni ripusajchu, nispa. Eliseotaj chay warmej qhepanta rerqa.

³¹ Guejaziqa paykunamanta ñawpajta rispa, wawaj uyanman Eliseoj varanta churaykorqa. Wawajtarí mana samaynillanpis karqachu. Chayrayku saqerparispa, Eliseota taripaj kuterqa. Chantá nerqa: Wawaqa mana kutirinchu, nispa.

³² Wasiman Eliseo chayananpajqa, wawaqa paypa puñunan patapi wañusqa wijch'urayasharqa.

³³ Eliseo wasiman yaykuspataj, punkuta wisq'aykakamuytawan, Tata Diosmanta mañakorqa. Chaypeqa paywan, chay wawawan imalla kasharqanku.

³⁴ Chantá puñunaman wicharispa, wañusqa wawaj patanman winkuykorqa. Siminta wawaj siminman churarqa, ñawintapis ñawin pataman, makintapis wawaj makin pataman. Eliseoj ukhun wawaj ukhunman chayajtinkama, wawaj ukhun q'oñitatayta qallarerqa.

³⁵ Chantá Eliseo jatarispa, wasi ukhupi kayman jaqayman puriykacharqa. Chantá ujtawan wawaj patanman winkuykullarqataj. Chaypachataj wawaqa qanchis kutita achhiytawan, ñawinta kicharerqa.

³⁶ Chantá Eliseoqa Guejazita wajyaspa, nerqa: Wasiyoj sunamita warmita wajyay, nispa. Paytaj wajyamorqa. Warmi yaykumojtintaj, Eliseo nerqa: Kayqa wawayki, apakapuy, nispa.

³⁷ Warmitaj qayllaykuspa, Eliseoj chakinman wijch'uykukorqa, chantá pampakama k'umuykorqa. Chaymantataj wawanta marq'ariykukuspa, riporqa.

Eliseo mikhunata qon

³⁸ Chaymanta Eliseoqa Gilgalman kutimorqa. Chaypacha chay cheqanejpi manchay yarqhay kasharqa. Uj kuti Eliseoqa Diosmanta sut'inchajkunawan khuska tiyashaspa, kamachinta nerqa: Mikhunata wayk'unaykipaj jatun mankata churamuy, nispa.

³⁹ Jinapi Diosmanta sut'inchajkunamanta ujnin campoman q'omerkunata pallakoj rispa, lakayoteman rijch'akojta tarerqa. Chayta pallaspa, ashkhata t'impimorqa. Chayamuspataj, q'alluytawan mankaman churaykorqa, mana yachaspalla imachus kasqanta.

⁴⁰ Chantá sut'inchajkunaman mikhunankupaj jaywarqa. Mikhuyta llamiriytawantaj, jatunmanta qhaparerqanku: Diosmanta sut'inchaj, kay mikhunaqa venenoyoj, nispa. Chantá manaña chay mikhunata mikhorqankuchu.

⁴¹ Eliseotajrí nerqa: Jak'uta apamuwaychej, nispa. Chantá jak'uta mankaman t'akaykuspataj, nerqa: Kunanqa mikhunankupaj qaraychej, nispa. Chantá mikhorqanku, manataj onqocherqachu.

⁴² Waj kuti uj runa Baal Salisamanta jamuspa, wayaqanpi mosoj cebadamanta iskay chunka t'antata Diosmanta sut'inchaj Eliseopaj apamorqa. Chaypachallaraj ruthusqa trigotapis espigantillanta apamullarqataj. Chantá Eliseo nerqa: Kay runakunaman jaywaychej mikhunankupaj, nispa.

⁴³ Kamachintajrí kuticherqa: Kay uj chhikitalla imaynatataj pachaj runakunapaj wakinmanri? nispa. Eliseotajrí nerqa: Paykunaman jaywaychej mikhunankupaj, imaraykuchus Tata Diosqa nin: Mikhonqanku, puchonqarajtaj, nispa.

⁴⁴ Chantá Guejazí jaywajtin, mikhorqanku, Tata Diospa nisqanman jinataj puchorqaraj.