2 Reyes 3 - DIOSPA QHELQACHISQ

Jorán Israel suyuta kamachin

¹ Kuraj kamachej Josafat Judá suyuta chunka pusajniyoj watataña kamachishajtin, Ajabpata churin Jorán, Israel suyuta kamachiyta qallarerqa. Chantá Samaria llajtamantapacha Israel suyuta chunka iskayniyoj watata kamacherqa.

² Payqa mana Tata Diospa munasqanman jinachu purerqa. Chaywanpis mana tatan maman jinapunichu ruwarqa, imaraykuchus payqa tatanpa rumimanta ruwachisqan Baal lantita wijch'orqa.

³ Chaywanpis Nabatpata churin Jeroboán imata ruwaspachus israelitakunata juchallicherqa, chay jinallatataj paypis ruwarqa.

Eliseoqa Moab suyuta atipanankuta sut'inchan

⁴ Moab suyuta kuraj kamachej Mesaqa ovejata uywaspa kawsarqa. Paytaj Israel suyuta kuraj kamachejman sapa wata 100.000 ovejakunata, 100.000 millmayoj corderokunatawan ima impuestota jina pagaj.

⁵ Maypachachus kuraj kamachej Ajab wañuporqa chaypacharí, Moab suyuta kuraj kamachejqa Israel suyuta kuraj kamachejpa contranpi oqharikorqa.

⁶ Chayrayku kuraj kamachej Joranqa Samariamanta llojsispa, Israel suyumanta tukuynin soldadota tantaykorqa.

⁷ Chantá Judá suyuta kuraj kamachej Josafatman willachejta kacharqa: Moab suyuta kuraj kamachejqa noqaj contraypi oqharikun. Noqawan khuska Moabta kuraj kamachejwan maqanakoj riwajchu? nispa. Josafattaj kuticherqa: Imarayku mana. Noqa, jinataj soldadoykuna, caballoykunapis qanta yanapanaykupaj kashayku, nispa.

⁸ Chantá Josafat tapullarqataj: Maqanakoj mayqen ñantataj risunchejri? nispa. Kutichispataj, Jorán nerqa: Edompa ch'in pampannejta risunchej, nispa.

⁹ Chantá Israelmanta, Judamanta, Edommanta, kinsantin kuraj kamachejkuna purirerqanku. Qanchis p'unchaytaña ch'innejman rej ñanta muyuspa purisqankumantaña, soldadokunapaj chantá uywakunapaj ima yaku pisiyaykorqa.

¹⁰ Chayrayku Israel suyuta kuraj kamachej nerqa: Ay, Tata Diosqa kinsantinchej kuraj kamachejkunata moabitakunaman jaywaykunawanchejpajchu kayman pusamuwanchej, nispa.

¹¹ Josafattajrí nerqa: Manachu kaypi Tata Diosmanta sut'inchaj tiyan, paynejta Tata Diosta tapurikunapaj? nispa. Chantá israelita soldadokunata kamachejmanta ujnin nerqa: Safatpa churin Eliseo kaypi kashan. Payqa Eliaspa kamachin karqa, nispa.

¹² Chantá Josafat nerqa: Pay Tata Diospa nisqanta willawasunchej, nispa. Chantá usqhayllata kinsantin kuraj kamachejkunaqa Eliseoman rerqanku.

¹³ Eliseotajrí Israel suyuta kuraj kamachej Joranta nerqa: Noqaqa mana qanwan ni ima ruwanay kanchu. Riy ari, tataykej mamaykej sut'inchajninkunata tapukamuy, nispa. Chantá kuraj kamachej Jorán kuticherqa: Mana paykunata tapukamusajchu, imaraykuchus Tata Diosmin moabitakunaman jaywaykunawaykupaj kinsantiykuta tantaykuwayku, nispa.

¹⁴ Chantá Eliseo nerqa: Tukuy Atiyniyoj Tata Diospa sutinpi tiluni, pejpa kamachinpichus kani, chayrayku: Manachus Judá suyuta kuraj kamachej Josafatta jatunpaj qhawayman karqa chayqa, mana qanta uyariykimanchu karqa, nitaj qhawarillaykimanpischu karqa.

¹⁵ Jinapis arpata tocaj runata pusamuwaychej, nispa. Arpata tocaj tocashajtin, Tata Diosqa Eliseoman jamorqa.

¹⁶ Eliseotaj nerqa: Tata Dios ajinata nin: Kay vallepi qochakunata ruwaychej,

¹⁷ imajtinchus mana wayrata, nitaj paratapis rikunkichejchu. Chaywanpis kay valleqa yakuwan junt'a kanqa. Chaymantataj qankuna, jinataj tukuy uywaykichejkuna ima chay yakumanta ujyankichej.

¹⁸ Chaywanpis chayqa Tata Diospaj ni imapischu, imajtinchus payqa moabitakunatapis atipayta yanapasonqachej.

¹⁹ Qankunaqa phatu perqawan muyuykuchisqa llajtankukunata, sumaj llajtankukunatawan ima raqayman tukuchinkichej. Poqoj sach'ankutapis k'uturankichej, yaku juturikunatapis ch'akichinkichej, sumajta poqoj jallp'ankutapis rumiwan junt'aykuchinkichej, nispa.

²⁰ Jinataj karqa. Q'ayantin tutamanta, uywata ñak'aspa jaywana phanita jina, Edom chaynejmanta yaku chayamuspa, tukuy chay cheqanejta junt'aykorqa.

²¹ Chaykamataj moabitakunaqa chay kinsantin kuraj kamachejkuna paykunawan maqanakoj jamushasqankuta yachaytawan, tukuy maqanakuyta atejkuna, waynakuna, machu runakunapis tantaykukorqanku. Chantá suyunkoj jap'iyninpi mojón karqa, chayman sayaykamorqanku.

²² Chantá moabitakunaqa tutamanta jatarispa, yakuta pukayashajta rikorqanku, imaraykuchus tutamanta intej k'anchasqanwan yaku pukayarerqa. Chayta rikuspataj, yawarta rikushasqankuta yuyarqanku.

²³ Chantá ninakorqanku: Jaqayqa yawar, kuraj kamachejkunachari paykunapura maqanakuspa wañuchinaykukunku. Jaku imatachus moabitakuna saqesqankuta oqharikampoj rinachej, nispa.

²⁴ Israelitakunaj jarankuman chayajtinkutajrí, israelitakuna oqharikuspa, ujllata moabitakunawan maqanakoj sayaykorqanku. Ayqekushajtinkutaj, israelitakuna qhatiykuspa, ashkhata wañuracherqanku.

²⁵ Llajtakunata raqayman tukucherqanku, tukuynin sumaj jallp'amantaj rumita junt'aykucherqanku. Jinallataj tukuy yaku juturikunatapis ch'akicherqanku, poqoj sach'akunatapis k'uturarqanku. Quir Jaréset llajtallata mana thuñerqankuchu. Chaywanpis warak'awan maqanakojkuna muyuykuspa, chay llajtata jap'erqanku.

²⁶ Jinapis, Moab suyuta kuraj kamachejqa israelitakuna atipaykushasqankuta rikuspa, espadawan maqanakuyta yachajkunamanta 700 soldadokunata tantaykorqa, Edom suyuta kuraj kamachejpa contranta maqanakoj rinanpaj, nitaj aterqachu.

²⁷ Chantá Moab suyuta kuraj kamachejqa kuraj kaj churinta, paypa cuentanpi kamachinan karqa, chayta wañuchiytawan, perqa patapi q'olachispa diosninman jaywarqa. Chayrayku israelitakunaj contrankuta sinch'ita phiñakorqanku. Chantá israelitakunaqa chaymanta karunchakuspa, llajtankuman kutimporqanku.