2 Reyes 21 - DIOSPA QHELQACHISQ

Manasés Judá suyuta kamachin

¹ Manasés kamachiyta qallarishaspa, chunka iskayniyoj watayoj karqa. Jerusalén llajtamantapachataj phishqa chunka phishqayoj watata kamacherqa. Mamantaj Hepsibá sutiyoj karqa.

² Payqa manapuni Tata Diospa munasqanman jinachu ruwarqa, imajtinchus Tata Dios pikunatachus israelitakunaj ñawpaqenkumanta wijch'usqa, chay runakuna jinallataj millayta ruwarqa.

³ Tatan Ezequías orqo patapi waj diosta yupaychana altarkunata thuñisqanta Manasés watej ruwachillarqataj. Baal sutiyoj diospaj altarkunata ruwarqa, jinallataj kuraj kamachej Ajab jina Aseraj lantinta ruwallarqataj. Ajinallataj janajpi kaj chhika ch'askakunaman qonqorikuspa, yupaycharqa.

⁴ Manasesqa Tata Diospa Templonpipis altarkunata ruwachillarqataj. Chay Templomanta Tata Dios nisqa: Noqaqa Jerusalén llajtapi yupaychasqa kasaj, nispa.

⁵ Jinallataj Tata Diospa Templonpa iskaynin pationpipis janajpi tukuy ch'askakunapaj altarkunata ruwachillarqataj.

⁶ Chay jawa churintapis q'olachispa diosninkunaman jaywarqa. Sajra espiritukunata wajyanaman qokorqa, jinallataj suerteta qhawanaman, aysiriman, layqeriyoman ima qokullarqataj. Ajinata Tata Diospa rikunanta millaytapuni ruwasqanwan Diosta sinch'ita phiñacherqa.

⁷ Asera sutiyoj diospa lantinta ruwaspa, Tata Diospa Templonpi sayacherqa. Chay wasimanta Tata Diosqa Davidman, chantá churin Salomonta nisqa: Kay Templopi sutiy wiñaypaj yupaychasqa kanqa, imaraykuchus tukuynin Israel jatun ayllukunamanta Jerusalén llajtata ajllakuni.

⁸ Sichus Israel aylluy tukuy kamachisqayta, kamachiy Moisespa kamachisqantawan kasonqanku chayqa, noqaqa mana paykunata wijch'usajchu ñawpa tatankuman qosqay jallp'amanta, nispa.

⁹ Paykunarí mana uyarikorqankuchu. Manasesqa astawan millayta ruwaspa purinaman israelitakunata apaykorqa. Tata Dios israelitakunaj ñawpaqenkumanta waj llajtayojkunata wijch'usqa, chaykunamantapis astawan millaytaraj ruwarqa.

¹⁰ Chayrayku Tata Diosqa paypa sut'inchajninkunanejta israelitakunata nerqa:

¹¹ Judá suyuta kuraj kamachej Manasés may jina millaytapuni ruwaspa, paymanta ñawpajta amorreokuna karqanku, chaykunamantapis astawan millaytapuni ruwan. Judá suyumanta kajkunatapis lanti ruwasqanta yupaychachispa juchallicherqa.

¹² Chayrayku noqa Israel suyoj Tata Diosnin nini: Kunanmin Jerusalenta chantá Judá suyutapis sinch'i ñak'arinaman churasaj. Chay jinata ñak'arisqankumanta pillapis uyarispaqa, t'ukushaj, titipacha qhepakonqa.

¹³ Jerusalentaqa Samariata jina chinkarparichisaj, Ajabpa ayllunta jinataj ñak'arichisaj. Jerusalentaqa chuwata jina mayllasaj. Imaynatachus chuwata mayllaspa k'umpunchej, ajinata ruwasaj.

¹⁴ Aylluymanta kawsashaj qhepakojkunatapis saqerparillasajtaj. Awqankukunaj makinkumantaj aylluyta jaywaykusaj, paykunamanta suwaspa q'arallata mana imayojta rikhurichinankupaj.

¹⁵ Ajinata ruwasaj, noqaj ñawpaqeypi mana allinkunata ruwasqankurayku. Paykunaqa ñawpa tatankukuna Egiptomanta llojsimusqankumantapacha kunankama phiñachiwanku, nispa.

¹⁶ Chay jawa Manasesqa mana juchayojkunamanta ashkhata wañuchicherqa, Jerusalenpi yawar mayu purinankama. Chayqa wajlla karqa, Tata Diospa ñawpaqenpi Judá suyumanta kajkunata imata ruwaspachus juchallicherqa, chaymanta nisqaqa.

¹⁷ Manasés kamachishaspa imatachus ruwasqan, waj imakunata ruwasqan, jinataj juchallisqan imaqa Judá suyuta kuraj kamachejkunaj ruwasqankumanta willaj qhelqapi qhelqasqa kashan.

¹⁸ Manasés wañupojtintaj, Uzá sutiyoj huertanpi, ayanta p'amparqanku. Paypa qhepantataj churin Amón kamacherqa.

Amón Judá suyuta kamachin

¹⁹ Amón kamachiyta qallarishaspa, iskay chunka iskayniyoj watayoj karqa. Jerusalenmantapachataj iskay watata kamacherqa. Mamanqa Jotbamanta Jaruspa ususin Mesulemet karqa.

²⁰ Amonqa imaynatachus tatan Manasés ruwarqa, ajinallatataj mana Tata Diospa munasqanman jinachu ruwarqa.

²¹ Tatanpa ruwasqanta jina paypis ruwallarqataj. Chayrayku tatanpa yupaychasqan lantikunata paypis yupaychallarqataj, chaykunamantaj qonqorikorqa.

²² Ñawpa tatankunaj Tata Diosninkuta saqespa, mana Tata Diospa munasqanman jinachu ruwarqa.

²³ Uj kuti payta yanapajkunallataj contranpi oqharikuspa, Amonta kamachinan wasipi wañucherqanku.

²⁴ Chantá Judá suyumanta kajkunaqa kuraj kamachej Amonta wañuchejkunata tukuyninkuta wañucherqanku, cuentanmantataj churin Josiasta kuraj kamachejta jina tiyaykucherqanku.

²⁵ Amón kamachishaspa imatachus ruwasqan, jinataj waj imakunata ruwasqanpiwan Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²⁶ Chantá Amonpa ayanta Uzá sutiyoj huertapi p'amparqanku, paypa qhepantataj churin Josías kamacherqa.