2 Reyes 20 - DIOSPA QHELQACHISQ

Ezequías onqosqanmanta qhaliyapun

¹ Uj kuti kuraj kamachej Ezequías sinch'itapuni onqoykusqanrayku wañuy patapiña kasharqa. Chantá Amozpa churin sut'inchaj Isaías payta watukoj rispa, nerqa: Tata Diosqa ajinata nisunki: Imachus allinchanaykita, allinchay, imaraykuchus wañupunki. Mana qhaliyapunkichu, nispa.

² Chantá Ezequías perqanejman tijrarikuspa, Tata Diosmanta mañakorqa:

³ Tata Dios, noqamanta yuyarikuy, imaynatachus cheqanta, allin sonqowantaj ñawpaqeykipi purisqaymanta, munayniykiman jina ruwaspa, nispa. Chantá Ezequías manchay llakisqa waqarikorqa.

⁴ Isaías kuraj kamachejpa wasinmanta ripushaspa, manaraj chawpi patioman chayashajtintaj, Tata Dios ujtawan payman parlapayarqa:

⁵ Kutispa, aylluypa kurajnin Ezequiasta nimuy: Ñawpa tatayki Davidpa Tata Diosnin ajinata nisunki: Mañakuwasqaykita uyarini, imaynatachus waqasqaykitapis rikullanitaj. Onqoyniykimanta thañichisqayki, kaymanta kinsa p'unchaymantaj Tata Diospa Templonman rinki.

⁶ Chunka phishqayoj watatawanraj kawsachisqayki. Asiria suyuta kuraj kamachejpa makinmantapis qanta, kay llajtatawan ima kacharichisqaykichej. Kay llajtata ajinata waqaychasaj, noqaj sutiyrayku, kamachiy Davidta munakusqayraykutaj, nispa.

⁷ Chantá Isaiasqa kuraj kamachejpa kamachinkunata nerqa: Higota q'aperqoychej, nispa. Higota q'aperqospataj, chaywan Ezequiaspa ch'upunman laq'aykorqanku, chaywantaj thañikaporqa.

⁸ Chantá Ezequías Isaiasta nerqa: Tata Dios qhaliyachinawanta, chantá kinsa p'unchaymantaj Tata Diospa Templonman rinayta, imaynamantataj yachasajri? Ima señaltaj kanqari? nispa.

⁹ Chantá Isaías kuticherqa: Tata Dios nisqasunta junt'ananmanta kay señalta qosonqa: Munawajchu inti watanaj llanthun chunka patillata ñawpajman rinanta, chayrí qhepaman kutirinantachu? nispa.

¹⁰ Ezequiastaj kuticherqa: Llanthu chunka patillata ñawpajman rinanqa atikullan. Qhepaman kutirinanrí mana atikoj jinallachu, nispa.

¹¹ Chantá Diospa sut'inchajnin Isaías Tata Diosmanta mañakorqa, Tata Diostaj Ajazpa inti watananpi llanthuta chunka patillata jina qhepaman kutiricherqa.

Ezequías Babilonia suyumanta chayamojkunata wajyarikun

¹² Chaypachallataj Babilonia suyuta kuraj kamachej Baladanpa churin Merodac Baladán Ezequías onqosqa kashasqanta uyarispa, kamachinkunata kachamorqa. Paykunawantaj waqeta chantá cartatawan apachimorqa.

¹³ Ezequiastaj paykunata manchay kusisqa wasinman wajyarikorqa, chantá wasinpi tukuy imanchus kaj chhikata rikucherqa: Qorita, qolqe metalta, sumaj q'apashaj jawinata, k'achata q'apaj aceiteta, armakunata jallch'ana wasita, chantá imakunachá wasinpi waqaychasqa karqa, chaykunatawan. Wasinpi, jinataj tukuy suyupi mana imapis karqachu Ezequiaspa mana rikuchisqanqa.

¹⁴ Chantá paykuna ripojtinku, Diospa sut'inchajnin Isaías kuraj kamachej Ezequiasman jamuspa, taporqa: Maymantataj chay runakuna kankuri? Ima nisunkutajri? nispa. Ezequiastaj kuticherqa: Paykunaqa karumanta, Babiloniamantapacha jamusqanku, nispa.

¹⁵ Chantá Isaías ujtawan tapullarqataj: Imatataj wasiykipi rikorqankuri? nispa. Ezequiastaj kuticherqa: Paykunaqa wasiypi tukuy kaj chhikata rikorqanku. Tukuy imachus tiyapuwasqanmanta mana imatapis pakarqanichu, nispa.

¹⁶ Chantá Isaías Ezequiasta nerqa: Uyariy Tata Diospa nisqanta:

¹⁷ Qhepanejman, wasiykipi tukuy kaj chhikata, jinataj kunankama ñawpa tataykikuna mashkhatachus jallch'arqanku, chay tukuyninta Babiloniaman apakaponqanku. Mana ni ima qhepakonqachu. Tata Dios ajinata nin.

¹⁸ Wawaykikunamanta wakinta Babiloniaman apanqanku, jaqaypitaj paykunata capanqanku kuraj kamachejpa kamachinkuna kanankupaj, nispa.

¹⁹ Chantá Ezequiasqa Isaiasman kuticherqa: Tata Diospa nisqanta willawasqaykeqa allillan, nispa, imaraykuchus sonqonpi yuyarqa: Kawsanaykamallapis allin kawsayta rikusaj, nispa.

Ezequías wañupun

²⁰ Ezequías kamachishaspa imatachus ruwasqan, wapu kasqan, imaynatachus estanqueta ruwachisqan, larq'ata allachisqan chayninta llajtaman yakuta apananpaj imaqa Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²¹ Ezequías wañupojtintaj, paypa cuentanmanta churin Manasés kuraj kamachej jina tiyaykorqa.