2 Reyes 2 - DIOSPA QHELQACHISQ

Tata Dios Eliasta janaj pachaman pusakapun

¹ Tata Diosqa Eliasta uj muyoj wayrapi janaj pachaman pusakapunan p'unchay qayllamushajtin, Eliaswan Eliseowan ima Gilgalmanta llojsimorqanku.

² Chantá Eliasqa Eliseota nerqa: Kaypi qhepakuy, imaraykuchus Tata Diosqa Betelman kachashawan, nispa. Eliseotajrí nerqa: Tata Diospa sutinrayku chantá sutiykirayku ima tiluni: Mana sapaykita rejta saqesqaykichu, nispa. Chantá iskayninku Betelman rerqanku.

³ Betelman chayashajtinku, Betelpi tiyakoj sut'inchajkunaqa Eliseota taripaj llojsimuspa, payta nerqanku: Yachankichu Tata Diosqa yachachejniykita kunan pusakapunanta? nispa. Eliseotaj kuticherqa: Arí, yachaniña. Ch'inlla kaychej, nispa.

⁴ Chantá Eliasqa Eliseota ujtawan nillarqataj: Eliseo, kaypi qhepakuy, imaraykuchus Tata Dios Jericoman kachashawan, nispa. Eliseotajrí kuticherqa: Tata Diospa sutinrayku, chantá sutiykirayku ima tiluni: Mana sapaykita rejta saqesqaykichu, nispa. Chantá iskayninku Jericoman rerqanku.

⁵ Chantá Jericoman chayashajtinku, Jericopi tiyakoj sut'inchajkunaqa Eliseota nillarqankutaj: Yachankichu Tata Dios kunan yachachejniykita pusakapunanta? nispa. Eliseotaj kuticherqa: Arí, yachaniña. Ch'inlla kaychej, nispa.

⁶ Chantá Elías ujtawan Eliseota nillarqataj: Ama jina kaspa, kaypi qhepakuy ari, imajtinchus Tata Diosqa Jordán mayumanñataj kachashawan, nispa. Eliseotajrí kuticherqa: Tata Diospa sutinrayku, chantá sutiykirayku ima tiluni: Mana sapaykita rejta saqesqaykichu, nispa. Jinapi iskayninku rerqanku.

⁷ Chantá sut'inchajkunamanta phishqa chunka chayamuspa, paykunamanta karunejpi sayarqanku. Eliaswan, Eliseowantajrí Jordán mayu patapi sayallarqankutaj.

⁸ Chantá Elías ponchonta jina qhatananta jap'ispa suk'aytawan, mayuta wajtarqa, wajtasqantawankamataj mayupi yaku iskayman t'aqarparikorqa. Jinataj paykunaqa ch'aki pampata jina mayuta chimparqanku.

⁹ Chantá mayuta chimpajtinkukama, Elías Eliseota nerqa: Qanpaj imatataj ruwapusunayta munankiri? Imatachus munasqaykita mañakuway, manaraj qayllaykimanta oqharisqa kashajtiy, nispa. Eliseotaj kuticherqa: Mañakuyki, espirituykimanta uj jinatawan qonawaykita, noqa qanpa cuentaykimanta Diosmanta sut'inchaj jina qhepakunaypaj, nispa.

¹⁰ Chantá Elías nerqa: Mana ruway atinata mañakunki. Chaywanpis sichus qayllaykimanta oqharisqa kashajta rikuwanki chayqa, mañakusqaykiman jina kanqa, manachayrí mana, nispa.

¹¹ Paykuna ajinata parlaspa rishajtillanku, nina carreta, nina caballokunayoj ujllata rikhurimuspa, paykunata t'aqarparerqa. Chantá Eliasta kawsashajta janaj pachaman uj muyoj wayra oqharerqa.

¹² Eliseotaj Eliasta ripojta rikuspa, qhaparerqa: Tatáy, tatáy, qanqa israelitakunapaj carretakunamantapis, chantá caballopi purej soldadokunamantapis aswan atiyniyoj karqanki, nispa. Eliseotaj manaña jayk'ajpis ujtawan Eliasta rikorqañachu. Chantá Eliseoqa p'achanta jap'iytawan, iskayman llik'erqa, llakisqa kashasqanta yachayta qonanpaj.

Eliseo Eliaspa cuentanmanta qhepakun

¹³ Chantá Elías oqharisqa kashajtin, poncho jina qhatanan urmaykamusqa, Eliseo chayta oqharerqa. Kutispataj, Jordán mayu kantupi sayarqa.

¹⁴ Chantá Eliaspa ponchonwan mayuta wajtarqa: Maypitaj Eliaspa Tata Diosnin kashanri? nispa. Wajtasqantawantaj, yakoqa iskayman t'aqarparikorqa. Chantá Eliseoqa mayuta ch'aki pampata jina chimparqa.

¹⁵ Chaypacha Jericomanta sut'inchajkuna Jordán mayoj chimpanmanta chayta qhawamusharqanku. Jinataj ninakorqanku: Eliseoqa Eliaspa cuentanpi qhepakun, nispa. Chantataj paykunaqa Eliseota taripaj rerqanku, qayllaykuspataj, pampakama k'umuykorqanku.

¹⁶ Chantá Eliseota nerqanku: Noqaykuwan phishqa chunka wapu qharikuna kashanku. Paykuna yachachejniykita mask'amuchunku. Ichapis Tata Diospa Espíritun payta oqharispa, orqo patamanchus, chayrí pampamanchus wijch'uykun, nispa. Eliseotajrí nerqa: Ama kachaychejchu, nispa.

¹⁷ Chaywanpis anchatapuni nejtinku, Eliseo kuticherqa: Kachaychejpis ari, nispa. Chantá chay sut'inchajkunaqa phishqa chunka runata Eliasta mask'ajta kacharqanku. Kinsa p'unchayta mask'arqanku, chaywanpis manapuni tarerqankuchu.

¹⁸ Jericó llajtallapiraj Eliseo kashajtin, Eliasta mask'amojkuna kutimorqanku. Chantá Eliseo paykunata nerqa: Manachu nerqaykichej: Ama riychejchu? nispa.

Eliseo Jericopi yaku juturita misk'iyachin

¹⁹ Chaymantá Jericó llajtayojkunaqa Eliseota nerqanku: Wiraqochi rikunki jina, kay llajtaqa sumaj cheqapi jatarichisqa kashan. Chaywanpis yakonqa mana walejchu, jallp'anpis t'ajra jallp'a, nispa.

²⁰ Chantá Eliseo nerqa: Uj mosoj yuruta kachiyojta apamuwaychej, nispa. Paykunataj nisqanta apamorqanku.

²¹ Eliseotaj yaku juturiman rispa kachita jich'aykamorqa, nerqataj: Tata Diosqa ajinata nin: Kay yakutaqa noqa misk'i yakuman tukuchini. Manaña jallp'ata t'ajrayachenqachu, nitaj runatapis onqochenqañachu, nispa.

²² Chaymantapacha Eliseoj nisqanman jina yakoqa kunankama misk'i yaku kashan.

²³ Chaymanta llojsispa, Eliseoqa Betelman rerqa. Ñannejta rishajtintaj, llajtamanta ashkha majt'illokuna llojsimuspa, paymanta alqorakuspa nerqanku: P'ajla llojsiy kaymanta. P'ajla, llojsiy kaymanta, nispa.

²⁴ Chantá Eliseo kutirispa, majt'illokunata qhawarqa, Tata Diospa sutinpitaj paykunata maldicerqa. Jinallaman sach'akuna ukhumanta iskay osokuna llojsimuspa, chay majt'illokunamanta tawa chunka iskayniyojta wañucherqa.

²⁵ Chantá Eliseoqa Betelmanta Carmelo orqoman rerqa, chaymantataj Samariaman kutimorqa.