2 Reyes 19 - DIOSPA QHELQACHISQ

Tata Dios Judá suyuta kacharichin

¹ Kuraj kamachej Ezequías chayta uyarispa, p'achanta llik'irakorqa, qhashqa p'achata churaykukuspataj, Tata Diospa Templonman rerqa.

² Jinallataj kamachejqa qhashqa p'achawan p'achallisqata mayordomon Eliaquinta, qhelqerin Sebnata, sacerdotekunaj kurajninkutawan Diospa sut'inchajnin, Amozpa churin Isaiasman kacharqa.

³ Chantá Isaiasta nerqanku: Kuraj kamachej Ezequías kay jinata nisunki: Kunan p'unchay jatun llakiypi kashanchej, p'enqachisqa, k'umuykachachisqataj, imaynatachus onqoj warmi paqarichikunanpajña kashajtin mana kallpan kanchu, ajina.

⁴ Ichapis Tata Diosniykeqa soldadokunata kamachej Rabsacespa parlasqanta uyarinña. Asiria suyuta kuraj kamachejqa payta kachamorqa kawsaj Diosmanta millayta parlananpaj. Tata Diosniyki imatachus nisqanmanta payta jasut'ichun. Kunanqa kaypi qhepakojkunarayku Diosmanta mañapuy ari, nispa.

⁵ Kuraj kamachej Ezequiasta yanapajkuna Isaiaswan parlaj rejtinku,

⁶ Isaías nerqa: Wiraqochi kamachejniykichejman kay jinata ninkichej: Tata Dios ajinata nin: Asiria suyuta kuraj kamachejta yanapajkuna imatachus nisqankumanta ama manchachikuychu. Paykunaqa noqaj contrayta parlanku.

⁷ Noqarí llakiy willayta uyarinanta ruwasaj, chayta uyarispataj, payqa suyunman kutiponqa. Chaypitaj espadawan payta wañuchichisaj, nispa.

⁸ Jinapi Asiriamanta soldadokunata kamachejqa uyarerqa Asiriapi kuraj kamachej Senaquerib Laquismanta ripusqanta. Chayrayku pay Jerusalenmanta usqhayta kutiporqa, chantá kuraj kamachej Senaqueribta Libna llajtaj contranpi maqanakushajta tariparqa.

⁹ Chaywanpis qhepanejman Asiria suyuta kuraj kamachej Senaquerib Etiopía suyuta kuraj kamachej Tiracá paywan maqanakoj llojsimusqanta uyarerqa. Chayrayku yanapajninkunawan uj cartata Ezequiasman apachispa, kay jinata nerqa:

¹⁰ Judá suyuta kuraj kamachej Ezequiasta ninkichej: Diosniyki nishasunki: Asiria suyuta kuraj kamachejqa Jerusalenta mana jap'enqachu, nispa. Ajinata nisqanwan ama q'otiyachikuychu.

¹¹ Qan yachankiña Asiria suyuta kuraj kamachej tukuy jap'isqan suyukunata imatachus ruwasqanta, imaynatatajchus chinkachisqanta ima. Chantá qanpunichu ayqewaj?

¹² Ñawpa tataykuna Gozán suyuta, Jaranta, Resefta chantá Edenpi tiyakojkunata chinkachishajtinku, diosninku paykunata makinkumanta kacharichiyta aterqankuchu?

¹³ Jamatpata, Arfadpata, Sefarvayinpata, Henajta, Guivajpata ima, kuraj kamachejninku maypitaj kashankuri? nispa.

¹⁴ Chantá Ezequías kachakunamanta cartata jap'ispa, ñawirerqa. Jinaspataj, Tata Diospa Templonman rerqa, chaypitaj Tata Diospa ñawpaqenpi chay cartata churarqa.

¹⁵ Chantá payqa Tata Diosmanta ajinata mañakorqa: Israelpa Tata Diosnin, querubinkunaj chawpinkupi tiyakoj, qanllamin kay pachapi tukuy suyoj Diosnin kanki. Qanlla janaj pachata, kay pachatawan ruwarqanki.

¹⁶ Tata Dios, uyariway ari, ñawiykita kicharispa qhawarimuy, Senaqueribpa parlasqantapis uyariy. Payqa kawsaj Diospa contranta parlan.

¹⁷ Tata Dios, cheqapuni Asiria suyuta kuraj kamachejkunaqa suyukunata chinkacherqanku.

¹⁸ Diosninkutapis ninaman enqhaykorqanku, imaraykuchus chaykunaqa mana dioschu kanku. Chay lantikunaqa k'ullumanta, rumimantawan runaj ruwasqallan kanku. Chayrayku paykuna chaykunata phiriykorqanku.

¹⁹ Tata Diosniyku, mañarikuyku makinkumanta kacharichinawaykuta, tukuy suyoj qanlla Tata Dios kasqaykita yachanankupaj, nispa.

²⁰ Chantá Amozpa churin Isaías Ezequiasta nicherqa: Israelpata Tata Diosnin ajinata nin: Asiria suyuta kuraj kamachej Senaquerib jawa imatachus mañakuwasqaykita uyarini, nispa.

²¹ Chayrayku kuraj kamachej Senaqueribmanta Tata Dios ajinata nin: Senaquerib, Sión llajtaqa uj sipas jina asikuspa qanta pisipaj qhawasunki. Jerusalentaj ayqekushajta rikususpa, umanta khiwirispa qhepaykimanta alqorakusunki.

²² Pimantataj mana allinta parlaspa sonqonta nanacherqankiri? Pejpa contranpitaj qan chay jinata qhaparqacharqankiri? Pejpa contranpitaj mayta runaykacharqankiri? Israel suyoj may llimphu kaj Diosninpa contranta chayta ruwarqanki.

²³ Qanqa kachaykikunanejta Diosmanta alqorakuspa, nerqanki: Mana yupay atina carretaykunawan orqo pataman wicharini. Libanomanta mana wichariy atina orqokunaman wicharini. Jatuchaj cedro sach'ankuta k'utorqani, ajllasqa pino sach'ankutawan. Aswan jatun orqo patakama chayarqani, sach'arara cheqakunamanpis.

²⁴ Waj suyukunapi pujyuta allarqani, yakuntataj ujyarqani. Chakiywan saruspataj, Egiptoj mayunkunata ch'akicherqani, nispa.

²⁵ Manachu yacharqanki noqa, Tata Dios chay tukuy imata wakichisqayta? Unaymantapacha imatachus ruwanayta nerqani, kunantaj chayta junt'ashani. Chayrayku, sumaj perqawan muyuykuchisqa llajtakunata thuñiykuspa, raqayllamanña tukuchishanki.

²⁶ Chaypi tiyakojkunaqa mana imanayta atispa, mancharichisqa, p'enqachisqataj kanku. Paykunaqa pampa qhora jina kanku, q'omer ch'iki jinataj. Wasi patapi wiñaj qhora jina manaraj wiñashaspa ch'akirapunku.

²⁷ Noqaqa purisqaykita yachani, yaykusqaykita, llojsisqaykitapis. Noqapaj phiñakusqaykitapis yachallanitaj.

²⁸ Noqaj contraypi phiñakusqaykirayku, chhikata jatunchakusqayki ninriyman chayamun. Chayrayku senqaykiman ganchota churasqayki, simiykimantaj frenota. Chantá maynejtachus jamusqallaykitataj kutichisqayki, nispa.

²⁹ Chaymanta Isaiasqa Ezequiasta nillarqataj: Imachus kananmanta kaymin señal kanqa: Qankunaqa kay wata, qhepan watatawan ima pachanmanta poqojllata mikhunkichej. Kinsa kaj watapitajrí, tarpuyta atinkichej, tarpusqaykichejtapis oqhariyta. Uva huertatapis churankichej, poqosqantapis mikhunkichej.

³⁰ Judá suyumanta kawsashaj qhepakojkunaqa sach'a jina kanqanku. Ukhuman saphiykuspataj poqonqanku.

³¹ Jerusalenpi mana tukuychu wañonqanku. Sión orqopipis kawsajkuna kanqankuraj. Ajinata Tukuy Atiyniyoj Tata Dios ruwanqa, may jinata munakusqanrayku.

³² Chayrayku Tata Diosqa Asiria suyuta kuraj kamachejmanta ajinata nin: Mana Jerusalén llajtaman yaykumonqachu, manataj arcowan uj flechallatapis kacharenqachu. Escudonwan maqanakoj mana jamonqachu, manataj perqa wasarina moqotapis ruwanqachu.

³³ May ñantachus jamorqa, chayllatataj kutiriponqa, manataj kay llajtaman yaykumonqachu. Noqa Tata Diosmin chaytaqa nini.

³⁴ Noqa kay llajtata waqaychasaj. Noqarayku, chantá kamachiy Davidta munakusqayrayku, kay llajtata kacharichisaj, nispa.

³⁵ Chantá chay ch'isipacha Tata Diospa angelnin rispa, asiriokunaj soldadonkunamanta 185.000 runakunata wañucherqa. Q'ayantin sut'iyananpajtaj tukuy wañusqa rikhurerqanku.

³⁶ Chaymanta Asiria suyuta kuraj kamachej Senaqueribqa Nínive llajtaman kutiporqa, chantá chaypi qhepakorqa.

³⁷ Jinataj, uj kuti Senaqueribqa diosnin Nisrocpa yupaychana wasinman yupaychaj yaykorqa. Diosninta yupaychashajtintaj, churinkuna Adramelec, Sarezer ima payta wañucherqanku. Chantá Ararat cheqanejman ayqekorqanku. Paypa cuentanmantataj churin Esarjadón kuraj kamachej jina tiyaykorqa.