2 Reyes 18 - DIOSPA QHELQACHISQ

Ezequías Judá suyuta kamachin

¹ Eláj churin Oseas Israel suyuta kinsa watataña kamachishajtin, Ajazpa churin Ezequías Judá suyuta kamachiyta qallarerqa.

² Kamachiyta qallarishaspa, iskay chunka phishqayoj watayoj karqa, Jerusalenmantapachataj iskay chunka jisq'onniyoj watata kamacherqa. Mamanqa Zacariaspa ususin Abí karqa.

³ Ezequiasqa ñawpa tatan David jinallataj, Tata Diospa munasqanman jina cheqanta ruwarqa.

⁴ Payqa orqo patapi waj dioskunata yupaychana altarkunata thuñiykorqa, rumimanta lantikunata p'akerqa, k'ullumanta ruwasqa lantikunapis llant'arparerqa. Jinallataj Moisespa broncemanta ruwasqan kataritapis p'akillarqataj, imajtinchus israelitakunaqa chay katarita diosta jina qhawaspa, inciensota q'oshñicherqanku. Jinataj broncemanta katarita Nejustán, nispa suticharqanku.

⁵ Ezequiasqa israelitakunaj Tata Diosninpi tukuy sonqo atinikorqa. Judá suyuta tukuy kuraj kamachejkunamanta, ni qhepata, nitaj ñawpajtapis, mana pay jina ujwanpis karqachu.

⁶ Payqa Tata Diosta kasuspapuni purerqa, manataj paymanta karunchakorqachu. Jinataj Tata Dios Moisesnejta qosqan kamachisqakunata tukuyninta junt'arqa.

⁷ Tata Diospis paywan karqa, chayrayku imatachus ruwasqanpi allinpuni rerqa. Ezequiasqa Asiria suyuta kuraj kamachejpa contranpi oqharikorqa, manañataj payta kasorqachu.

⁸ Jinallataj filisteokunawan maqanakuspa, Gaza llajtapi chantá chay llajtaj mojonnin chaypi atipaykorqa. Chantá qhawana torrekunapi, phatu perqawan muyuykuchisqa llajtakunapipis atipallarqataj.

Asiriata kuraj kamachejqa Samaria llajtata jap'in

⁹ Ezequías tawa watataña kamachishajtin, Eláj churin Oseaspis Israel suyuta qanchis watataña kamachishajtin, Asiria suyuta kuraj kamachej Salmanasarqa Samaria llajtata muyuykorqa.

¹⁰ Kinsa watamantaj Samaria llajtata jap'erqa. Chay karqa Ezequías sojta watataña kamachishajtin, Israel suyuta kuraj kamachej Oseaspis jisq'on watataña kamachishajtin.

¹¹ Chantá Asiria suyuta kuraj kamachejqa israelitakunata presochaspa, Asiria suyuman aparqa, chaypitaj paykunata Jalajman, Gozán mayu kantupi Jaborman, Media llajtayojkunaj llajtankuman ima churarqa.

¹² Israelitakunata chay jina llakiy qhatirerqa, Tata Diosninkoj nisqanta mana kasusqankurayku. Aswanpis paypa trato ruwasqanta p'akisqanku. Imatachus Tata Diospa kamachin Moisés paykunaman kamachisqanta mana uyarikorqankuchu, nitaj ruwarqankuchu.

Senaquerib Judá suyuman yaykuykun

¹³ Ezequías Judá suyuta chunka tawayoj watataña kamachishajtin, Asiria suyuta kuraj kamachej Senaqueribqa Judá suyumanta phatu perqawan muyuykuchisqa llajtakunata, tukuyninta jap'erqa.

¹⁴ Chantá Judata kuraj kamachej Ezequías Laquis llajtaman uj runata kacharqa, Asiria suyuta kuraj kamachejman ajinata nichispa: Noqaqa pantaykuni. Ama noqawan maqanakoj jamuychu, noqataj pagasqayki, mashkhatachá niwanki, chayta, nispa. Chantá Asiria suyuta kuraj kamachej Ezequiasta nerqa: 9.900 kilo qolqe metalta, 990 kilo qoritawan pagaway, nispa.

¹⁵ Chayrayku Ezequiasqa Tata Diospa Templonmanta, chantá wasinpi tukuy waqaychasqa qolqeta qorqa.

¹⁶ Jinallataj Judata kuraj kamachej Ezequiasqa Tata Diospa Templonpa punkunkunamanta, sayantakunamanta ima qorita orqhochispa, Asiria suyuta kuraj kamachejman qorqa. Chay punkukunata, chantá sayantakunata ima pay kikin qoriwan lluch'iykuchisqa.

¹⁷ Chaymanta Asiria suyuta kuraj kamachejqa Ezequiaspa contranpi kamachejkunata kacharqa: Tartanta, Rabsarista, Rabsacesta, chantá ashkha soldadotawan ima. Laquismantapacha Jerusalenta jap'ej rerqanku. Jerusalenman chayaspataj, pata estanqueman yaku pusana larq'a chaynejpi, awa t'ajsanaman ñan rejpi jarakorqanku.

¹⁸ Chantá Ezequiasta wajyacherqanku, paytaj mana rerqachu, manachayqa Hilciaspa churin, mayordomon Eliaquinta, qhelqerin Sebnata, kamachejta yanapaj Asafpa churin Yoajta ima kacharqa.

¹⁹ Chantá Asiriamanta soldadokunata kamachejqa paykunata nerqa: Ezequiasta ajinata niychej: Asiriamanta kuraj kamachej nisunki: Imapitaj qan atinikushankiri?

²⁰ Qan nishanki. Maqanakunapaj sumaj wakichisqa kashani, ashkha soldadoykunapis tiyan, nispa. Chayqa yanqhata parlaylla. Imamanta jap'ikuspataj contraypi oqharikushankiri?

²¹ Qanqa Egipto yanapananpi atinikushanki. Egiptorí p'akisqa soqoso jina, pichus chaypi atikojtaqa makinta t'ojsispa pasarparenqa. Egipto suyuta kuraj kamachej faraonqa ajinamin paymanta jap'ikojkunapajqa.

²² Sichus niwankichejman: Noqaykoqa Tata Diosnillaykupi atinikuyku, nispa chayqa, noqa nisqaykichej: Manachu orqopi altarkunata Ezequías urmachispa kamacherqa: Judá suyupi chantá Jerusalenpi tiyakojkuna Jerusalenpi kaj altarllapi Diosta yupaychankichej? nispa.

²³ Kunanqa Asiria suyuta kuraj kamachej wiraqochiywan uj tratota ruwaychej: Sichus 2.000 soldadokunata tariwaj chayqa, noqa 2.000 caballokunata qosqayki chayman lloq'aspa, maqanakunankupaj.

²⁴ Imaynatataj qan sayaykuyta atiwaj kamachejniypa mana kasu ruwana kamachinkunallamanpisri? Qanqa Egiptomanta carretakunata, caballokunata jap'iyta suyashanki.

²⁵ Manachu noqapis Tata Dios kachamuwasqanrayku kay suyuta chinkachinaypaj jamushani? Tata Diosmin niwarqa: Riy, chay suyuta chinkachimuy, nispa.

²⁶ Chantá Hilciaspa churin Eliaquinwan, Sebnawan, Yoajwan ima kamachej Rabsacesta nerqanku: Ama jina kaspa, arameo rimaypi parlawayku, imaraykuchus noqayku chayta yachayku. Ama hebreo rimaypi parlaychu, imajtinchus perqa patapi kashajkuna uyarishanku, nispa.

²⁷ Asiriamanta soldadokunata kamachejrí nerqa: Wiraqocheyqa mana qankunaman, nitaj kamachejniykichejman willanallaypajchu kachamuwan. Manachayqa perqa patapi kashanku, chaykunaman willanaypaj kachamuwarqa. Paykunapis qankunawan khuska jatun jisp'ayninkuta mikhukaponqanku, jinallataj yaku jisp'ayninkutapis ujyakaponqanku, nispa.

²⁸ Chantá soldadokunata kamachejqa sayariytawan, hebreo rimaypi jatunmanta qhaparispa, nerqa: Asiria suyuta kuraj kamachejpa nisqanta tukuy uyariychej. Pay nisunkichej:

²⁹ Ezequiaswan ama q'otiyachikuychejchu. Payqa makiymanta manapuni kacharichisuyta atisonqachejchu.

³⁰ Ezequías nisonqachej: Tata Diosllapi atinikunachej, paytaj yanapawasunchej. Asiria suyuta kuraj kamachejqa mana kay llajtata jap'enqachu, nispa.

³¹ Qankunarí ama payta uyariychejchu. Manachayqa Asiria suyuta kuraj kamachej ajinata nisunkichej: Noqawan allinyakuychej, noqamantaj k'umuykamuychej. Ajinata ruwankichej chayqa, sapa ujniykichej uva sach'aykichejmanta, higo sach'aykichejmantapis mikhunkichej. Sapa ujtaj kikin pujyuykichejmanta yakuta ujyankichej.

³² Chaymanta qhepamantaj payqa qankunata uj sumaj jallp'aman pusasonqachej, qankunaj jallp'aykichej jinallamantaj. Chaypeqa trigo poqon, uva huerta tiyan, olivomanta aceite ruwanapaj chantá abeja misk'i ima. Chaypi sumajta tiyakunkichej, manataj wañuchisqachu kankichej. Ezequiastarí ama uyariychejchu. Tata Dios kacharichiwasunchej, nispalla payqa qankunata q'otiyashasunkichej.

³³ Mayqen suyoj diosnintaj llajtanta Asiria suyuta kuraj kamachejpa makinmanta kacharichiyta aterqari?

³⁴ Jamatpata, Arfadpatawan, maypitaj diosninku kashanri? Maypitaj kashan Sefarvayinpata, Henajta, Guivajtawan diosninkukunari? Paykunaqa Samariata makiymanta kacharichiyta aterqankuchu?

³⁵ Tukuy suyoj diosninkumanta mayqentaj makiymanta llajtanta kacharichiyta aterqari? Imaraykutaj yuyankichej Tata Diosqa makiymanta Jerusalenta kacharichinantari? nispa. Ajinata Asiria suyuta kuraj kamachejpa kachan nerqa.

³⁶ Chaywanpis runakunaqa mana imatapis kuticherqankuchu, imaraykuchus kuraj kamachej nisqa: Ama imatapis kutichinkichejchu, nispa.

³⁷ Chantá Hilciaspa churin kamachejpa mayordomon Eliaquín, qhelqerin Sebna, kamachejta yanapaj Asafpata churin Yoaj ima p'achankuta llik'irakuspa, kamachej Ezequiasman rerqanku, Asiria soldadokunata kamachej, imatachus nisqanta willaj.