2 Reyes 17 - DIOSPA QHELQACHISQ

Asiriamanta soldadokuna israelitakunata atipanku

¹ Kuraj kamachej Ajaz Judá suyuta chunka iskayniyoj watataña kamachishajtin, Eláj churin Oseas Israel suyupi kamachiyta qallarerqa. Samaria llajtamantapachataj jisq'on watata kamacherqa.

² Oseasqa mana Tata Diospa munasqanman jinachu ruwarqa. Jinapis payqa mana paymanta ñawpajta Israelta kuraj kamachejkuna jina sajrapunichu karqa.

³ Chantá Asiria suyuta kuraj kamachej Salmanasar jamuspa, Oseaspa contranta maqanakorqa. Chantá atipaykuspa, kamachinman tukucherqa, impuestotapis munajta mana munajta pagacherqa.

⁴ Aswan qhepanejmanrí Asiria suyuta kuraj kamachejqa Oseas paypa contranpi oqharikushasqanta jap'erparerqa. Oseasqa Egipto suyuta kuraj kamachej So sutiyojman kachakunata kachasqa yanapananta mañakunanpaj. Chantapis impuestota manaña Asiriaman pagasqachu, imaynatachus sapa wata pagaj, jinataqa. Chayrayku Asiria suyuta kuraj kamachejqa Oseasta jap'ichispa, carcelman wisq'aykucherqa.

⁵ Chantá Asiria suyuta kuraj kamachejqa soldadonkunawan tukuynin Israel suyuman junt'aykorqa. Samaria llajtaman chayaspataj, chay llajtata jap'inanpaj kinsa watata muyuykorqa.

⁶ Oseas jisq'on watataña kamachishajtin, Asiria suyuta kuraj kamachejqa Samariata jap'erqa, chaypi tiyakoj israelitakunatataj Asiriaman aparqa. Chaypi paykunata Jalajman, Jaborman, Gozán mayu qayllaman, medokunaj llajtankuman ima churarqa.

⁷ Ajina karqa israelitakuna Tata Diosninkoj contranpi juchallisqankurayku. Tata Diosqa Egipto suyuta kuraj kamachej faraonpa makinmanta paykunata kacharichisqa. Israelitakunatajrí waj dioskunata yupaycharqanku.

⁸ Chantá Tata Dios paykunaj ñawpaqenkumanta wijch'usqa, chay runakunaj usunkuta ruwallarqankutaj. Jinallatataj Israel suyuta kuraj kamachejkuna, ima usutachus apaykamorqanku, chaytapis ruwallarqankutaj.

⁹ Chantá israelitakunaqa mana allinta ruwaspa purisqankuta Tata Diosmanta pakayta munarqanku. Tukuy llajtapi, torrekunapi chantá perqayoj jatun llajtakunapipis waj dioskunata yupaychanankupaj altarkunata ruwakorqanku.

¹⁰ Chantá tukuy orqokunapi, tukuy thansarara sach'a urapi ima rumimanta lantikunata, Asera lantikunata ima sayacherqanku.

¹¹ Jinallataj inciensota q'oshñicherqanku, pikunatachus Tata Dios paykunaj ñawpaqenmanta wijch'usqa, chaykuna jinallataj q'oshñicherqanku. Israelitakunaqa ancha millayta ruwaspa, Tata Diosta k'arajta phiñacherqanku.

¹² Chay jawa, lantikunata yupaychanankuta Tata Dios mana munashajtinpis, paykunaqa yupaychallarqankupuni.

¹³ Tata Diosqa israelitakunata, jinataj Judá suyupi tiyakojkunata ima sut'inchajkunanejta k'amichisqa: Millayta ruwaspa purisqaykichejmanta noqaman kutirikamuychej. Chantá tataykichejkunaman qosqay kamachisqaykunata, yachachisqaykunatapis kasuychej. Chaykunata noqamanta sut'inchajkunanejta willacherqaykichej, nispa.

¹⁴ Paykunarí mana kasorqankuchu, astawanpis ñawpa tatankukuna jina sonqonkuta rumiyacherqanku, pikunachus Tata Diospi mana atinikusqankuchu, chaykuna jina.

¹⁵ Tata Diospa nisqanta, ñawpa tatankukunawan trato ruwasqanta, tukuy k'amisqantawan ima qhesacharqanku. Qhasi manakaj lantikunata yupaychaspa, manakajman tukorqanku. Paykunaqa muyuyninkupi tiyakojkuna jina kikillantataj ruwarqanku, Tata Dios manapuni chayta ruwanankuta nejtinpis.

¹⁶ Tata Diosninkoj tukuy kamachisqanta mana kasuspa, qorita unuyacherqanku. Chantá waka uñaman rijch'akoj iskay lantikunata ruwakorqanku. Asera nisqa lantikunatapis ruwakullarqankutaj. Chay jawaqa Baalta, chantá janajpi tukuy ch'askakunatawan yupaychallarqankutaj.

¹⁷ Chantá qhari wawankuta, warmi wawankutapis q'olachispa diosninkuman jaywarqanku. Jinallataj layqeriyoman, qhepanejman imachus kananmanta watunaman ima qokullarqankutaj. Tata Diospa rikunanta ajina millayta ruwanaman qokuspa, payta sinch'ita phiñacherqanku.

¹⁸ Chayrayku Tata Diosqa israelitakunaj contrankupi sinch'ita phiñakuspa, karuman presota jina apacherqa. Judá jatun ayllumanta kajkunalla Judá suyupi qhepakorqanku.

¹⁹ Chaywanpis Judá suyupi tiyakojkunapis manallataj Tata Diosninkoj kamachisqanta kasorqankuchu. Aswanpis israelitakuna imatachus apaykamusqankuta, chay jinallatataj ruwarqanku.

²⁰ Chayrayku Tata Diosqa israelitakunata qhesachaspa ñak'aricherqa, chantá awqankuwan atipaykuchispa, ñawpaqenmanta karuman wijch'orqa.

²¹ Maypachachus Tata Dios Davidpa mirayninmanta Israel suyuta t'aqarqa chaypacha, paykunaqa Nabatpa churin Jeroboanta kuraj kamachejninkupaj churasqanku. Jeroboantajrí israelitakunata juchallinaman apaykuspa, Tata Diosmanta karunchacherqa.

²² Israelitakunaqa Jeroboán imata ruwaspachus juchallerqa, chayllatataj ruwaspa purerqanku, manataj chayta saqerqankuchu.

²³ Chantá Tata Diosqa paymanta sut'inchajkunanejta nisqanman jina, israelitakunata ñawpaqenmanta wijch'orqa. Israelitakunaqa Asiria suyuman preso jina apasqa karqanku. Chaypitaj kunankama kashanku.

Samariaman waj llajtayojkunata apamunku

²⁴ Chaymanta qhepaman Asiria suyuta kuraj kamachej Babiloniamanta, Cutamanta, Avamanta, Jamatmanta, chantá Sefarvayinmanta ima runakunata Samariaman apamorqa. Israelitakunaj cuentankumantataj Samariapi llajtakunaman paykunata churarqa. Ajinata chay runakunaqa Samariamanta dueñochakaporqanku, llajtakunapitaj tiyakorqanku.

²⁵ Paykuna chaypi tiyakuyta qallarispa, Tata Diosta mana yupaychajchu kanku. Chayrayku Tata Diosqa paykunaj contrankupi leonkunata kachaykorqa. Chay leonkunataj paykunamanta wakinta wañuracherqanku.

²⁶ Chayrayku Asiria suyuta kuraj kamachejta nerqanku: Samaria llajtaman tiyakunankupaj kacharqanki, chaykunaqa chay suyoj Diosninta imaynatachus yupaychanata mana yachankuchu. Chayraykumin chay Diosqa paykunaman leonkunata kachaykun. Chaykunataj paykunata wañurachishanku, nispa.

²⁷ Chantá Asiria suyuta kuraj kamachej nerqa: Chay llajtamanta kayman apamusqaykichej sacerdotekunamanta ujninta jaqayman kutichiychej, jaqaypi tiyakuspa, Diosninpa kamachisqanta chaypi tiyakojkunaman yachachinanpaj, nispa.

²⁸ Jinapi Samariamanta apasqanku, chaykunamanta ujnin kaj sacerdote jamuspa, Betelpi tiyakorqa. Paytaj Tata Diosta imaynatachus yupaychanankuta yachacherqa.

²⁹ Chaywanpis pikunachus waj suyukunamanta Samariaman tiyakoj jamusqanku, chaykunamanta sapa ujninku llajtankoj diosninkuta Samaria llajtayojkuna orqo patapi ruwasqanku altarkunaman churarqanku.

³⁰ Babilonia llajtayojkunaqa Sucot Benot sutiyoj diosninkoj lantinta ruwakorqanku. Cutá llajtayojkunataj Nergal sutiyoj diosninkoj lantinta ruwakorqanku, Jamat llajtayojkunataj Asima sutiyoj diosninkoj lantinta.

³¹ Avá llajtayojkunataj Nibejaz sutiyoj diosninkoj lantinta, chantá Tartac sutiyoj diosninkoj lantintawan ruwakorqanku. Sefarvayin llajtayojkunataj Adramelec, chantá Anamelec sutiyoj diosninkuta yupaychaspa, wawankukunata q'olachispa jaywarqanku.

³² Chay jawa Tata Diosta yupaychaj kanku chaypis, paykuna ukhumanta sacerdotekunata churakorqanku, orqo patapi waj diosta yupaychana altarkunapi ruwanayoj kanankupaj.

³³ Ajinaqa Tata Diosta yupaychaj kanku chaypis, diosninkukunatapis yupaychallajtaj kanku, imaynatachus llajtankupi ruwaj kanku, ajinallatapuni.

³⁴ Paykunaqa unay ruwaj kanku, jinata kunankamapis ruwashallankupuni. Tata Diosta mana yupaychankuchu, nitaj nisqanta, kamachisqanta, yachachisqanta ima kasunkuchu. Israel sutiwan sutichasqa Jacobpa mirayninman Tata Dios kamachisqakunata qosqanta, jinataj yachachisqanta mana kasunkuchu.

³⁵ Paykunawan Tata Dios tratota ruwaspa, kamachisqa: Ama waj dioskunata yupaychankichejchu, nitaj jatunchankichejchu, nillataj uywa ñak'asqata q'olachispa jaywankichejchu.

³⁶ Manachayqa noqa Diosnillaykichejta yupaychawaychej, uywa ñak'asqa q'olachisqatapis jaywawaychej, imaraykuchus noqamin Egiptomanta tukuy atiyniywan orqhomorqaykichej.

³⁷ Chayrayku kasuychejpuni yachachisqaykunata, kamachisqaykunata, yuyaychasqaykunata, qhelqaspa qorqaykichej, chaykunata. Amataj waj dioskunata yupaychaychejchu.

³⁸ Qankunawan trato ruwasqayta ama qonqapunkichejchu, amataj waj dioskunaman k'umuykunkichejchu.

³⁹ Astawanpis noqa Tata Diosnillaykichejta jatun respetowan maypaj qhawawankichej. Noqallamin tukuynin awqaykichejkunamanta kacharichisqaykichej, nispa. Ajinata Tata Dios paykunawan tratota ruwasqa.

⁴⁰ Paykunatajrí manapuni uyarikorqankuchu, astawanpis ñawpa usunkuta ruwaspallapuni kawsarqanku.

⁴¹ Chay runakunaqa Tata Diosta yupaychaj kanku chaypis, lantikunatapis yupaychashallajtaj kanku. Wawankupis, allchhinkupis, imaynatachus tatankukuna ruwaj kanku, ajinallatapuni kunankamapis ruwashanku.