2 Reyes 16 - DIOSPA QHELQACHISQ

Ajaz Judá suyupi kamachin

¹ Remaliaspa churin Pecajqa Israel suyuta chunka qanchisniyoj watataña kamachishajtin, Yotanpa churin Ajaz Judá suyupi kamachiyta qallarerqa.

² Ajaz kamachiyta qallarishaspa, iskay chunka watayoj karqa. Jerusalenmantapachataj chunka sojtayoj watata kamacherqa. Payqa mana Tata Diospa munasqanman jinachu ruwarqa, mana ñawpa tatan David jinachu purisqanrayku.

³ Manachayqa Israel suyuta kuraj kamachejkuna jina paypis ruwallarqataj. Ajazqa churinta q'olachispa, waj diosman jaywarqa. Ajina millayta ruwarqa, Tata Dios pikunatachus israelitakunaj ñawpaqenkumanta wijch'usqa, chay runakunaj usunkuman jina.

⁴ Ajinallatataj orqokuna patapi, moqokuna patapi, jinataj tukuy thansarara sach'a urapipis uywa ñak'asqata q'olachispa waj dioskunaman jaywarqa, inciensotapis q'oshñicherqa.

⁵ Chaypachata Siria suyuta kuraj kamachej Resinwan, Israel suyuta kuraj kamachej Remaliaspa churin Pecajwan ima Ajazpa contranta maqanakoj rerqanku. Chantá Jerusalenta muyuykorqanku, jinapis mana jap'iyta aterqankuchu.

⁶ Chaypachallataj Siria suyuta kuraj kamachej Resinqa Elat llajtata jap'erqa. Chantá chaymanta judiokunata wijch'uspa, chay llajtapi edomitakuna tiyakorqanku. Kunankamataj chaypi tiyakushanku.

⁷ Chantá Ajazqa Asiria suyuta kuraj kamachej Tiglat Pileserman kachakunata kachaspa, nicherqa: Noqaqa ñawpaqeykipi k'umuykukuni, churiyki jinataj kani. Chayrayku jamuspa, Siria suyuta kuraj kamachejpa makinmanta, chantá Israel suyuta kuraj kamachejpa makinmantawan kacharichikunaypaj yanapariway, imaraykuchus paykunaqa noqawan maqanakoj jamushanku, nispa.

⁸ Jinallataj Ajazqa Tata Diospa Templonmanta, chantá kuraj kamachejpa wasinmanta ima tukuynin qolqe metalta, qoritawan Asiria suyuta kuraj kamachejman t'inkata apacherqa.

⁹ Asiria suyuta kuraj kamachejtaj Ajazta uyarispa, Damasco llajtaj contranta maqanakoj rerqa, chantá chay llajtata jap'erqa. Chay llajtayojkunatataj presota jina Quir llajtakama aparqa. Jinallataj kuraj kamachej Resintapis wañuchillarqataj.

¹⁰ Chaymanta Judá suyuta kuraj kamachej Ajazqa Asiria suyuta kuraj kamachej Tiglat Pileserwan tinkumoj Damascoman rerqa. Ajaztaj Damascopi uj altarta rikorqa, kikinta dibujaspataj sacerdote Uriasman apachimorqa, kikisitunta ruwananpaj.

¹¹ Sacerdote Uriastaj kuraj kamachej Ajaz dibujasqata apachimusqanman jina, altarta kikisitunta ruwarqa. Kuraj kamachej Damascomanta kutimunanpajtaj altarqa ruwasqaña karqa.

¹² Ajaz Damascomanta chayamuytawan, altarta ruwasqata rikuspa, chaypi uywata ñak'aspa jaywarqa.

¹³ Chay altarpi uywata ñak'aspa q'olacherqa, jinallataj ch'aki mikhuy jaywasqantapis q'olachillarqataj, chantá jaywasqan pataman vinota jich'aykorqa. Jinallataj, k'acha kawsakuy jaywanamanta uywaj yawarnintapis altarman ch'ajchuykullarqataj.

¹⁴ Chantá Ajazqa Tata Diospa Templonpa ñawpaqenpi kaj altarta oqharichispa, patanejman apacherqa. Chaymantaj ruwachisqan altarta churarqa. Jinamanta ñawpa altarqa ruwachisqan altarwan, Templowan chay chawpinejpi jina karqa.

¹⁵ Chaymantataj Ajazqa sacerdote Uriasta kamacherqa: Jatun altarpi tutamanta uywa ñak'asqa q'olachinata, tardentaj ch'aki mikhuy jaywanata jaywanki. Jaywallankitaj kuraj kamachejpa q'olachinanta, ch'aki mikhuy jaywasqantapis. Jaywallankitaj tukuy runaj uywa ñak'asqata jaywaspa q'olachinankuta, ch'aki mikhuy jaywanankuta, vino jaywasqankutawan ima. Chayllapitaj ch'ajchunki q'olachinapaj uywa ñak'asqaj yawarninta, jaywanapaj ñak'asqa uywakunaj yawarninkutawan. Broncemanta altarrí kanqa chaypi noqa Tata Diosta imamantapis tapunaypaj, nispa.

¹⁶ Chantá sacerdote Uriasqa kuraj kamachej Ajazpa kamachisqanman jina ruwarqa.

¹⁷ Chaymantataj Ajazqa broncemanta yaku churanata orqhorqa, broncemanta torokunaj patanpi churasqa kasharqa, chay jatun kaj yaku churanatapis orqhollarqataj. Chantá rumiwan losasqa pataman churaykucherqa.

¹⁸ Jinallataj, Tata Diospa Templonpi samarina p'unchaypi kuraj kamachejpa tiyananta churanapaj corredortapis phaskacherqa. Phaskachillarqataj kuraj kamachejpa yaykunan punku karqa, chaytapis. Ajinata ruwarqa Asiria suyuta kuraj kamachejpa sonqonta suwananpaj.

¹⁹ Ajaz kamachishaspa imatachus ruwasqan, jinataj waj imakunata ruwasqanpiwan Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²⁰ Kuraj kamachej Ajaz wañupojtintaj, ayanta Davidpa llajtan nisqapi, ñawpa tatankunaj covachanpi p'amparqanku. Paypa cuentanmantataj churin Ezequías kamacherqa.